HALLEL

Hira fiderana an’i Jehovah. “Hallel Ejipsianina” no iantsoan’ny asa soratra jiosy ny Salamo faha-​113 ka hatramin’ny faha-​118. Nohiraina tao amin’ny tempoly sy synagoga izy io tamin’ny Paska (Pesahim 10:5-7), Pentekosta, fetin’ny Trano Rantsankazo, ary fetin’ny Fitokanana (Sokkah 4:8; Taanit 4:5), hoy ny Mishnah. Notononina ny tapany voalohany (Sl 113 hoy ny Sekolin’i Samay; Sl 113 sy 114 kosa hoy ny Sekolin’i Hilela) rehefa nararaka tao amin’ny kaopy faharoa ny divay ary nohazavaina ny dikan’ny Paska, raha tao an-trano no nankalazana azy io. Nofaranana ny Hallel rehefa nampandalovina ny kaopy fahefatra nisy divay. Nohiraina tamin’ny fety sy nohirain’ireo nampandalo kaopy fahadimy nisy divay tamin’ny Paska, hono, ny “Hallel Lehibe” (heverina ho Sl 136 fotsiny, na Sl 120-136, na Sl 135:4–136:26).