RANOMANDRY MITSIRATSIRAKA

Pitika gilasy matsilotsilo izay fotsy mangilatra miforona etsy sy eroa, amin’ny ririnina mamirifiry, any amin’ny tany sasany. Lavalava toy ny fanjaitra ireny potika gilasy ireny. Matetika izy ireny no mitsatoka mahitsy eo amin’izay zavatra iforonany, ary eo amin’ny sisin’ilay zavatra no tena ahitana azy betsaka. Ahoana no mampisy azy ireny? Tonga dia lasa gilasy fa tsy mivadika ho ranonando ny eton-drano eny amin’ny rivotra, rehefa mipaka eny amin’ny hazo, na zavamaniry, na zavatra hafa. Amin’ny alina no tena itrangan’izany. Matetika no ahitana ranomandry mitsiratsiraka eo amin’ny varavarankely.

Niresaka tamin’i Joba momba “ny ranomandry mitsiratsiraka avy any an-danitra” i Jehovah. Nahoana no lazaina hoe “avy any an-danitra”? Eton-drano eny amin’ny rivotra mantsy no mivadika ho gilasy rehefa mipaka amin-javatra, araka ny efa voalaza tetsy aloha. (Jb 38:29) Hoy ny mpanao salamo, momba an’i Jehovah: “Aparitany toy ny lavenona ny ranomandry mitsiratsiraka.” (Sl 147:16) Tsotra kely amin’ny olona ny manaparitaka lavenona amin’ny tanany. Toy izany koa fa tsy sarotra amin’i Jehovah ny mampisy ranomandry mitsiratsiraka. Mandrakotra ny hazo, ny ahitra, ny trano, ary ny zavatra hafa izy ireny, toy ny hoe lavenona nafafin’i Jehovah tamin’ny tanany.

Nanome mana ho an’ny Israelita i Jehovah, tamin’izy ireo nirenireny tany an-tany efitra nandritra ny 40 taona. Izao no nitranga, araka ny Eksodosy 16:14: “Lasa etona ilay ando avy eo, ary nisy zavatra manify mikarepoka tany an-tany efitra, dia zavatra toy ny ranomandry mitsiratsiraka teny amin’ny tany.”