JABINA

(Jabìna) [mety hidika hoe Mahay Manavaka; Mahira-tsaina; na Ilay Nanorina].

Mety ho anaran’ny tarana-mpanjaka kananita tao Hazora, na anaram-boninahitr’izay mpanjaka tao.

1. Mpanjakan’i Hazora, tamin’i Josoa naka ny Tany Nampanantenaina. Nanangana ny vondron’ny mpanjaka kananita tany amin’ny ilany avaratra i Jabina mba hiady tamin’ny Israely. Nanangona tafika “maro be toy ny fasika ... niaraka tamin’ny soavaly sy kalesin’ady be dia be” izy ireo, ary nitoby teo amoron’ny ranon’i Meroma. Resin’i Josoa izy ireo rehefa notafihiny tampoka sy nenjehiny. Novonoina i Jabina, rehefa azo babo ny tanànan’i Hazora ka nodorana.​—Js 11:1-14; 12:7, 19.

2. Mpanjaka kananita nitondra tao Hazora tatỳ aoriana kokoa, rehefa naorina indray ilay tanàna. Mety ho taranak’ilay Jabina No. 1 izy. Toa nisy mpanjaka niray dina taminy, nefa nantsoina hoe “mpanjakan’i Kanana” izy. Nahoana? Satria izy angamba no lehibe indrindra tamin’ireo mpanjaka kananita, ka tena nahery sy nanam-pahefana. Na io anarana io no mety ho nanavahana azy tamin’ireo mpanjakan’ny firenen-kafa. Nanana kalesin’ady 900 nisy lelan’antsy ny tafik’i Jabina notarihin’i Sisera. Lasa nalaza kokoa i Sisera raha oharina amin’i Jabina.​—Mpts 4:2, 3; 5:19, 20.

Navelan’i Jehovah hampijalin’i Jabina sy hampahoriny nandritra ny 20 taona ny Israely, satria nivadi-pinoana. Niantso vonjy tamin’i Jehovah anefa izy ireo. Nanendry an’i Baraka sy Debora àry i Jehovah mba hitarika ny Israely handresy ny tafik’i Jabina. Ny vadin’i Hebera Kenita, izay tsara fihavanana tamin’i Jabina, no namono an’i Sisera. (Mpts 4:3-22) Tsy nitsahatra niady tamin’i Jabina ny Israely, ary novonoin’izy ireo izy tamin’ny farany.​—Mpts 4:23, 24; Sl 83:9, 10.