JOAHAZA
(Jôahàza) [I Jehovah Anie Hihazona; I Jehovah dia Nihazona].
1. Fomba hafa anoratana ny anaran’i Ahazia, izay nandimby an’i Jorama rainy ka lasa mpanjakan’ny Joda tamin’ny faramparan’ny taonjato fahafolo T.K. (2Ta 21:16, 17; 22:1) Lasa tovona fa tsy tovana intsony ny anaran’Andriamanitra amin’ilay hoe Joahaza, izay hita koa ao amin’ny soratra nataon’ny Masoreta. (2Ta 25:23) Natao hoe Azaria koa i Joahaza, indray mandeha.—2Ta 22:6b; jereo AHAZIA No. 2.
2. Zanakalahin’i Jeho sy mpandimby azy, ka lasa mpanjakan’ny Israely nandritra ny 17 taona (876-t. 860 T.K.). (2Mp 10:35; 13:1) Nofehezin’i Hazaela mpanjakan’i Damaskosy any Syria ny ankamaroan’ny fanjakan’i Joahaza, satria nalainy tamin’i Jeho ny faritanin’ny Israely rehetra tany atsinanan’ny Reniranon’i Jordana. (2Mp 10:32-34) Nanao izay ratsy teo imason’i Jehovah koa i Joahaza, ka mbola navelan’i Jehovah hampahory ny Israely i Hazaela tamin’ny andro rehetra nanjakany. Mpitaingin-tsoavaly 50 sy kalesy 10 ary lehilahy 10 000 nandeha an-tongotra àry sisa no tao amin’ny tafiny. Nitady sitraka tamin’i Jehovah ihany anefa izy, ka tsy navelan’i Jehovah haringan’i Syria tanteraka ny Israely, noho ny fifanekena nataony tamin’i Abrahama sy Isaka ary Jakoba. (2Mp 13:2-7, 22, 23) Nalevina tany Samaria izy rehefa maty, ary nodimbiasan’i Joasy zanany.—2Mp 13:8, 9; 2Ta 25:17.
3. Rain’i Joa mpanoratra ny raharaham-panjakana tamin’ny andron’i Josia Mpanjaka.—2Ta 34:1, 8.
4. Zanakalahin’i Josia sy mpandimby azy, ka lasa mpanjakan’ny Joda. Hamotala no anaran-dreniny. (2Mp 23:31) Nantsoin’i Ezra sy Jeremia hoe Saloma i Joahaza, hoy ny sora-tanana sasany, satria mety ho izany, hono, no anarany talohan’ny naha mpanjaka azy. (1Ta 3:15; Je 22:11) Toa i Joahaza no nofidin’ny vahoaka ho mpanjaka, rehefa novonoin’i Farao Neko mpanjakan’i Ejipta i Josia rainy. Tsy izy anefa no zokiny indrindra tamin’izy mirahalahy avy mbola velona.—2Mp 23:29, 30.
Lasa mpanjaka izy tamin’izy 23 taona, ary ratsy ny fitondrany nandritra ny telo volana (teo am-piandohan’ny 628 T.K.). Nogadrain’i Farao tao Ribla izy avy eo. Nentina ho babo tany Ejipta izy tatỳ aoriana ka maty tany, araka ny faminanian’i Jeremia.—2Mp 23:31-34; Je 22:10-12.