JERAMELA

(Jeramèla) [Hamindra Fo Anie Andriamanitra; Namindra Fo Andriamanitra].

1. Lahimatoan’i Hezrona zafikelin’i Joda. I Rama (toa i Arny ihany) no rahalahiny, ary anisan’ny tarana-mpanjaka niavian’ny Mesia izy io. Voatahiry ny lisitry ny anaran’ny ankamaroan’ny taranak’i Jeramela. Nipetraka tany amin’ny faritra atsimo amin’ny faritanin’i Joda ny sasany tamin’izy ireny.​—1Ta 2:4, 5, 9-15, 25-42; 1Sa 27:10; Lk 3:33.

2. Zanakalahin’ny Levita Merarita iray atao hoe Kisy. Mety ho taranak’i Kisy koa anefa i Jeramela.​—1Ta 24:26, 29; 23:21.

3. Anisan’ireo telo lahy nirahin’i Joiakima Mpanjaka hisambotra an’i Jeremia sy Baroka, tamin’ny taona fahadimy nanjakany. Niverina tanam-polo anefa izy telo lahy, satria nafenin’i Jehovah ireo mpanompony tsy nivadika ireo.​—Je 36:9, 26.

Tamin’io taona fahadimy nanjakan’i Joiakima io, dia vao 12 taona teo ho eo i Joiakina, zanany sady tokony handimby azy, ary ireo zanany hafa aza mbola kely kokoa. Tsy ho nahavita ny iraka nampanaovina an’i Jeramela àry izy ireo. (2Mp 23:36; 24:6, 8) Nahoana àry no nantsoina hoe “zanaky ny mpanjaka” i Jeramela? Tsy hoe zanaka nateraky ny mpanjaka izy, fa angamba anisan’ny olona tao an-dapa na olona ambony sady tarana-mpanjaka.

Mahaliana ny soratra teo amin’ny tombo-kase iray, izay heverina fa efa tamin’ny taonjato fahafito T.K. Izao no voasoratra teo: “An’i Jeramela zanaky ny mpanjaka.”​—Gazety Momba ny Fizahana An’i Israely, Jerosalema, 1978, Boky Faha-28, p. 53.