MOLOTRA
Anisan’ny vava ny “molotra” (heb.: safah; gr.: keilôs), ary tena ilaina mba hitenenana. Ampiasaina an’ohatra izy io mba hilazana teny na fiteny. (Oh 14:3; 1Ko 14:21) Indraindray izy io tanisaina miaraka amin’ny ‘lela’ (Sl 34:13; Jb 27:4) sy ‘vava.’ (Sl 66:14; Oh 18:20) Tamin’ny mbola tsy nisafotofoto ny fiteny tao Babela, dia “mbola nampiasa fiteny [a.b.t.: molotra] iray ihany ny tany manontolo, sady nitovy ny teny nampiasainy.” (Ge 11:1, 6-9; toy izany koa ny hoe ‘fiteny’ ao amin’ny Sl 81:5; Is 19:18.) Nampanantena i Jehovah fa ‘hovany ho fiteny [molotra] madio’ ny fitenin’ny olona, ka hiray saina izy ireo mba hidera an’i Jehovah sy hiresaka momba ny fikasany izay hotanterahiny amin’ny alalan’i Kristy Jesosy.—Ze 3:9; ampit. Oh 12:19.
Tsy tena ahalalana ny ao am-po izay lazain’ny molotra, satria mety hihatsaravelatsihy ny olona. (Mt 15:8) Tsy azon’ny molotra afenina amin’Andriamanitra kosa anefa izay tena ao am-po (He 4:13), ary na ho ela na ho haingana dia tsy maintsy avoakan’ny molotra ihany izany.—Oh 26:23-26; Mt 12:34.
Tsy te hiresaka tamin’i Farao i Mosesy, ka nohazavainy fa “tsy voafora molotra” izy, izany hoe hoatran’ny nisy fonony nanarona ny molony ka lasa lava sy natevina loatra ary tsy nahafahany niteny tsara. Angamba izy somary sahirankirana rehefa niteny. (Ek 6:12, 30) Niantso an’i Isaia tao amin’ny fahitana koa i Jehovah mba hirahiny. Nazoto i Isaia saingy nitaraina hoe: ‘Maty aho fa olona maloto molotra, nefa izaho nahita an’i Jehovah.’ Nihevitra izy hoe tsy mendrika ny hampita ny hafatra madio avy amin’i Jehovah. Nisy anjely àry nasain’i Jehovah nikasika ny molony mba hanadio izany.—Is 6:5-7; ampit. Jn 15:3; Is 52:11; 2Ko 6:17.
Nampirisihin’i Hosea ny Israelita mba hanolotra ny vokatry ny molotra, dia ny “vantotr’ombilahy” fiderana. Toy ny vantotr’ombilahy natao sorona mantsy ny fiderana avy amin’ny fo. (Ho 14:2) Izany no tao an-tsain’i Paoly tamin’izy nampirisika ny Kristianina mba hanao “sorona fiderana ho an’Andriamanitra, ... dia ny vokatry ny molotra izay manao fanambarana ampahibemaso momba ny anarany.”—He 13:15.
Midika hoe teny mamitaka ny hoe “molotra manao teny fandokafana.” (Sl 12:2, 3) Samy ratsy ny vokatry ny molotra toy izany sy ny molotra manao teny henjana na mandainga, satria mahatonga ratra lalina toy ny ataon’ny sabatra na manapoizina toy ny bibilava. (Sl 59:7; 140:3; Ro 3:13) Mitsaontsaom-bava sy tsy mitandrina ny olona “be resaka” (a.b.t.: manana molotra misokatra be). (Oh 13:3) Mety hifotitra aminy izany, satria ataon’Andriamanitra ampamoaka ny olona noho izay lazainy.—De 23:23; No 30:6-8; Oh 12:13; ampit. Jb 2:10; Mt 12:36, 37.