MPANDATSA-BIRIKY

Mpanao asa tanana mandrafitra biriky na vato. (2Mp 12:12; 22:6) Ny mpanao vato fahiny dia nipaika sy nanatsofa ary nandrafitra vato hanorenana rindrina sy trano samihafa (2Sa 5:11; 1Mp 7:9-12; 1Ta 22:2; 2Ta 24:12), fasana (Is 22:16), ary tionelin-drano (2Mp 20:20).

Anisan’ny fitaovana nampiasain’ny mpandatsa-biriky ny marotoa, famaky, tsofam-bato, filamatra, tady fandrefesana, ary pilao. (1Mp 6:7; 7:9; Is 28:17; Za 4:10) Nampiasa tantanana sy fandraka ny mpanao vato tany Ejipta, araka ny asehon’ny sary eo amin’ny tsangambato, ka azo antoka fa nampiasa izany koa ny Israelita mpanao vato. Norefesina ny vato nampiasaina hanorenana ary nasiana tsipika mainty mba harahin’ny mpipai-bato, tany Ejipta. Nasiana marika na isa koa ny vato tsirairay, mba hahafantarana ny toerany teo amin’ilay trano haorina.

Nahavita rafi-bato tsara tsy nilana rihitra ny mpanao vato fahiny, toy ny nanaovany ny vatobe tamin’ny zavatra naorina sasany tany Palestina tamin’ny andron’i Heroda. Na lelan’antsy aza tsy tafiditra eo anelanelan’izy ireny izao.​—Jereo TAOTRANO.