FANOMPOANA

Asa na raharaha ataon’ny mpanompo na olona nanankinana asa. Mpanompon’i Jehovah ny Levita, teo amin’ny Israely fahiny. Nanao fanompoana manokana koa ny mpaminany. (De 10:8; 21:5; jereo LEVITA; MPANOMPO; MPISORONA.) Niova endrika ny fanompoana rehefa tonga tetỳ an-tany i Jesosy Kristy, satria nirahiny hanao mpianatra an’ireo olona any amin’ny firenena rehetra ny mpianany. (Mt 28:19, 20) Nasain’izy ireo hihavana amin’Andriamanitra amin’ny alalan’i Kristy àry ny olona lavitra an’Andriamanitra.​—2Ko 5:18-20.

Nila nampiofanina sy nampianarina ary nampiana tsara ireo nanaiky hihavana amin’Andriamanitra (2Ko 5:18), mba hanana finoana matanjaka sy ho afaka hanao mpianatra koa. (Ampit. 2Ti 4:1, 2; Tit 1:13, 14; 2:1; 3:8.) Nanome “lehilahy ho fanomezana” àry i Kristy Jesosy, lohan’ny fiangonana, rehefa niakatra tany an-danitra. Apostoly, mpaminany, mpitory ny vaovao tsara, mpiandry ary mpampianatra no nomeny “mba hanitsiana ny olona masina, ka hanaovany asa fanompoana, sy hanorenana ny vatan’i Kristy.”​—Ef 4:7-16; jereo FANOMEZANA AVY AMIN’ANDRIAMANITRA.

Anisan’ny fanompoana teo anivon’ny fiangonana koa ny fanomezana izay nilain’ireo rahalahy mahantra mendrika ny hampiana. Voatendry hizara sakafo tamin’ny vehivavy kristianina mpitondratena, ohatra, i Stefana sy ny lehilahy enina hafa tsara laza. (As 6:1-6) Nandefa fanampiana ho an’ireo rahalahy nahantra tany Jodia koa ireo fiangonana tany Makedonia sy Akaia. (2Ko 8:1-4; 9:1, 2, 11-13) Vonona hitondra an’ilay fanampiana tany Jerosalema i Paoly rehefa voangona ilay izy. Niangaviany hiara-mivavaka aminy àry ireo rahalahy tany Roma, mba hankasitrahan’ireo olona masina homena an’ilay fanampiana ilay fanompoana nataony.​—Ro 15:25, 26, 30, 31; jereo FANOMPOANA MASINA.

Naneho fitiavana toy izany koa ny Kristianina tany Antiokia, any Syria, taona vitsivitsy talohan’izay, satria nandefa fanampiana ho an’ireo rahalahy tany Jodia tratran’ny mosary izy ireo.​—As 11:28-30.