TENDROMBOHITRA FIVORIANA

Teny ao amin’ny Isaia 14:13. Niteny anakampo ny mpanjakan’i Babylona ao hoe: “Ambonin’ny kintan’Andriamanitra no hanandratako ny seza fiandrianako, ary hipetraka eny amin’ny tendrombohitra fivoriana aho, any amin’ny farany avaratra.”

Misy manam-pahaizana milaza fa tendrombohitra lavitra tany avaratra, izay noheverin’ny Babylonianina fa fonenan’ireo andriamaniny, ilay “tendrombohitra fivoriana.” Tsy faminaniana momba an’izay holazain’ny mpanjakan’i Babylona anefa ny Isaia 14:13, fa filazana kosa ny faniriany laza sy ny toe-tsainy. (Ampit. Is 47:10.) Anisan’ny teny fanarabiana an’ilay mpanjaka holazain’ireo Israelita tafaverina any amin’ny taniny izy io. (Is 14:1-4) Ny Soratra Masina àry, fa tsy izay ninoan’ilay mpanjaka mpanompo sampy, no manampy antsika hahalala hoe inona ilay “tendrombohitra fivoriana.” Azo antoka fa tsy te hanandratra ny seza fiandrianany ho ambonin’ny kintan’ny andriamaniny izy. Tsy andriamanitra babylonianina koa, fa ilay Avo Indrindra, no resahin’ny Isaia 14:14. Misy ifandraisany amin’ilay Andriamanitra Avo Indrindra àry ilay “tendrombohitra fivoriana.”

Teo amin’ny Tendrombohitra Ziona (anisan’izy io ny tempoly teo an-tendrombohitra Moria) ihany Andriamanitra no azo lazaina hoe nihaona tamin’ny vahoakany tafavory, tamin’ny andron’i Isaia. (Ampit. Is 8:18; 18:7; 24:23; Jl 3:17.) Mety ny niantsoana azy io hoe “tendrombohitra fivoriana”, satria tsy maintsy niseho intelo isan-taona teo anatrehan’i Jehovah tao amin’ilay toerana masina ny lehilahy israelita rehetra. (Ek 23:17) Resahin’ny Salamo 48:1, 2 fa any avaratra tokoa ny Tendrombohitra Ziona, mifanaraka amin’ilay hoe “any amin’ny farany avaratra” ilay “tendrombohitra fivoriana.”