FEHIVAVA

Zavatra amehezana ny vavan’ny biby mba tsy hanaikerany na hihinanany.

Matetika no nampiasa omby ny tany Palestina fahiny rehefa teny am-pamoloana. Noborahina ireo amboaram-barimbazaha be dia be, naparitaka sy natao misavovona, ary nasaina nohosihosen’ny omby iray na maromaro, na nampiasana fitaovana fanosihosena na zavatra hafa. Hoy ny Lalàn’i Mosesy: “Aza asiana fehivava ny omby miasa eny am-pamoloana.” (De 25:4) Tsy nijaly àry ilay omby niasa mafy nanosihosy satria navela hihinana.​—Ampit. Oh 12:10.

Nampiharin’ny apostoly Paoly tamin’ny olona niasa mafy koa ilay toro lalana ao amin’ny Deoteronomia 25:4. Hoy izy tamin’i Timoty: “Aoka hatao mendrika hahazo fanajana roa heny ny anti-panahy mahay mitondra, indrindra fa izay mikely aina amin’ny fitenenana sy ny fampianarana.” Nohamafisiny izany rehefa naveriny ilay lalàna hoe tsy tokony hasiana fehivava ny omby miasa eny am-pamoloana. (1Ti 5:17, 18) Naveriny koa izy io tamin’izy nanoratra ho an’ny Korintianina. Hoy izy avy eo: “Ny omby ve no ahin’Andriamanitra? Sa noho isika indrindra no nilazany izany? Tena noho isika no nanoratana izany, satria izay miasa tany dia tokony hiasa amin’ny fanantenana ny hahazo vokatra, ary izay miasa eny am-pamoloana dia tokony hanao izany amin’ny fanantenana ny hahazo ny anjarany.” Hoy ny fanatsoahan-keviny: “Nodidian’ny Tompo hivelona amin’ny vaovao tsara izay mitory ny vaovao tsara.”​—1Ko 9:8-14.

Nilaza i Davida fa hasiany “fehivava” ny vavany, izany hoe hambenany mba tsy hanota.​—Sl 39:1.