MYRA

(Mỳra).

Tanàna lehibe tao amin’ny faritanin’i Lykia. Eo amin’ny havoana tokotokony ho 3 km miala ny morontsiraka atsimoandrefan’i Azia Minora no misy an’i Myra, eo amoron’ny reniranon’i Andracus. Demre no anaran’ilay toerana ankehitriny. Toa sady anaran’ilay tanàna fahiny no anaran’ilay seranana tena tsara tao ny hoe Myra.

Tonga tao Myra ny apostoly Paoly tamin’izy voafonja hoentina ho any Roma. Avy tany Kaisaria izy tamin’izay ary nandalo tao Sidona. Tao Myra i Paoly sy ireo niara-dia taminy no nafindra tao amin’ny sambo mpitondra varimbazaha avy tany Aleksandria ho any Italia. (As 27:1-6, 38) Raha avy eo Aleksandria (tanàna ejipsianina) no mandeha mahitsy mianavaratra miampita ranomasina, dia tonga any Myra. Efa zatra nanitsy teo angamba ny sambo avy tany Aleksandria, na mety hoe notoherin’ny rivotra (As 27:4, 7) ilay sambo, ka tsy maintsy niova lalana ary niantsona tao Myra.

Misy sora-tanana tranainy manampy hoe “sy tany Myra” aorian’ny hoe “Patara” ao amin’ny Asan’ny Apostoly 21:1. (Jereo Jé, f.a.p.) Marina fa mifanaraka amin’ilay fitantarana ihany izany, kanefa tsy ampy ny porofo hilazana fa tena nisy an’io Myra io tao amin’ilay sora-tanana tany am-boalohany.