NETOFA
(Netòfa) [avy amin’ny fototeny midika hoe “mitete; mandatsaka”], Netofatita (Netofatìta).
Tanàna kelin’i Joda i Netofa, angamba tao Kirbet Bedd Faloh, tokotokony ho 4 km any atsimo atsimoatsinanan’i Betlehema. Netofatita no niantsoana ny mponina tao, ary io teny io no resahin’ny Baiboly bebe kokoa. Toa mpihavana mantsy ny Netofatita sy ny mponina tao Betlehema.—1Ta 2:54.
Netofatita ny lehilahy maherin’i Davida toa an’i Maharay sy Haleba (Heleda; Helday), izay samy lasa lehiben’ny antoko-miaramila. (2Sa 23:8, 28, 29; 1Ta 11:26, 30; 27:13, 15) Nisy Netofatita tsy nalefa sesitany tany Babylona fa nijanona tao Joda, ary nanohana an’i Gedalia Governora. (2Mp 25:23; Je 40:8) Maromaro ny taranak’ireo Netofatita natao sesitany tany Babylona nody niaraka tamin’i Zerobabela tamin’ny 537 T.K. (Ezr 2:1, 2, 22; Ne 7:26) Tonga tany Jerosalema ny Levita sasany nonina tany amin’ny tanàna kelin’ny Netofatita, mba hitokana ny manda voaorina indray.—1Ta 9:14, 16; Ne 12:27, 28.