PAFO

(Pàfo).

Tanàna teo amin’ny morontsiraka andrefana amin’ny nosy Sipra. Tonga tao i Paoly sy Barnabasy ary Jaona Marka rehefa avy namakivaky an’ilay nosy, ary tao izy ireo no nihaona tamin’i Barjesosy mpilalao ody (Elyma), izay nanohitra ny fitoriana nataon’izy ireo tamin’i Sergio Paolo governoram-paritra. Nanao fahagagana i Paoly, ka nataony jamba vetivety i Barjesosy. Nahita izany i Sergio Paolo, ka niova ho Kristianina.​—As 13:6-13.

Roa ny tanàna any Sipra antsoina hoe Pafo: I “Pafo Tranainy” sy i “Pafo Vaovao.” I Pafo Vaovao no tanàna resahin’ny Asan’ny Apostoly. Izy io no renivohitry ny faritanin’i Sipra, izay notantanan’ny Antenimieran-doholona, tamin’i Paoly nanao ny dia misionera voalohany. Voalaza fa ilay tanàna rava ao amin’ny seranan-tsambo fahiny tao Pafo io tanàna io. Tokotokony ho 15 km any avaratrandrefan’i “Pafo Tranainy” (Koklia) no misy azy io. Voajanahary io seranana fahiny io ka nampiasain’ny tafika an-dranomasina tamin’ny andron’ny Grika sy Romanina. Azo antoka fa teo i Paoly sy ny namany no naka sambo, ka nankany avaratra avaratrandrefana tany Perga, tany Azia Minora. Mbola ao ireo rarivato fiantsonana teo amin’ilay seranana, sy izay sisa tsy rava tamin’ireo tranom-panjakana sy tranon’olona ary mandan’ny tanàna.

Azo antoka fa nankany Pafo indray i Barnabasy sy Marka tamin’ny taona 49 tany ho any.​—As 15:36-39.