PELETITA

(Peletìta).

Mpiady tsy nivadika tamin’i Davida Mpanjaka, ary miara-voatonona foana amin’ny Keretita. Niampita an’i Kidrona niaraka tamin’i Davida ny Peletita, rehefa nandositra avy tao Jerosalema i Davida noho ny fikomian’i Absaloma (niandany tamin’izy io ny ankamaroan’ny miaramila). (2Sa 15:18, 23) Anisan’ireo nampitsahatra ny fikomian’i Sheba ny Peletita. (2Sa 20:7) Tsy niandany tamin’i Adonia toy ny nataon’i Joaba koa izy ireo, fa nanohana an’i Solomona izay nofidin’i Davida ho mpandimby azy. (1Mp 1:38, 44) Tsy anisan’ny tafika ny Keretita sy ny Peletita, fa mpiady nampiasain’i Davida Mpanjaka kosa. I Joaba mantsy no lehiben’ny tafika, fa i Benaia no lehiben’ny Keretita sy ny Peletita. (2Sa 8:18; 20:23; 1Ta 18:17) Tamin’ny andron’i Davida Mpanjaka ihany no nisy firesahana an’ireo Peletita. Midika angamba izany fa izy ihany no mpanjaka nampiasa azy ireo, fa tsy nisy hafa.​—Ampit. 2Sa 8:18 sy 23:22, 23.

Maro be ny tombantombana momba ny hoe iza marina ireo Peletita. Ireto ny roa amin’izany: 1) Iray fiaviana amin’ny Filistinina ny Peletita na angamba foko iray tany Filistia, satria mitovy be ny teny hebreo ilazana ny hoe Peletita sy Filistinina (ampiana litera iray fotsiny ny hoe פלתי [Peletita] dia lasa hoe פלשתי [Filistinina]). Tsy eken’ny sasany anefa ilay hevitra hoe nisy Filistinina lasa mpiaro an’i Davida, na dia mety hitombina ihany aza io hevitra io. 2) Mety ho ny andraikitra na ny toerana notanan’ireo mpiaro an’i Davida no nahatonga azy ireo hantsoina hoe Keretita sy Peletita. Mety ho ny Keretita no mpandringana, ary ny Peletita no mpihazakazaka. Nisy mpihazakazaka toy izany tokoa tamin’ny andron’i Saoly sy ny mpanjaka hafa taoriany. (1Sa 22:17; 2Mp 11:4; 2Ta 30:6) Vitsy kokoa anefa no manaiky an’ity hevitra faharoa ity.