PEREZA

(Perèza) [Tataka; Rovitra eo Am-piterahana].

Iray amin’ireo kambana roa lahy zanak’i Joda tamin’i Tamara vinantovaviny. Rehefa niteraka azy ny reniny, dia i Zera rahalahiny no nipoitra voalohany. Nihemotra anefa i Zera, ka i Pereza no nivoaka voalohany. Tataka na rovitra mihitsy i Tamara tamin’izay! (Ge 38:24-30) Nanan-tombo i Pereza raha oharina amin’i Zera rahalahiny satria izy foana no tononina voalohany. Ny taranany no nalaza kokoa noho ny an’i Zera. (Rt 4:12) Hita ao amin’ny lisitry ny taranak’i Jakoba nankany Ejipta ny anaran’i Pereza sy ny zanany roa lahy, dia i Hezrona sy Hamola. Lasa lohan’ny fianakaviambe teo amin’ny fokon’i Joda izy telo mianaka, tany Ejipta. (Ge 46:8, 12) Izay ihany no fantatra momba an’i Pereza.

Ao amin’ny tetirazana no tena ahitana ny anaran’i Pereza, ary manomboka amin’ny anarany ny fitanisana ny ankamaroan’ny tetirazan’i Joda. (1Ta 2:4, 5, 9-55; 4:1-20) Hita tamin’ilay fanisam-bahoaka faharoa tany an-tany efitra fa ireo fianakaviambe avy tamin’i Pereza sy ny zanany roa lahy no tena betsaka tao amin’ny fokon’i Joda. (No 26:20-22) Tao amin’ny antoko-miaramila voalohany ny sasany tamin’ny taranak’i Pereza, rehefa nozaraina ho antokony nanompo isam-bolana ny tafik’i Davida. (1Ta 27:3) Maro ny taranak’i Pereza niverina avy tany an-tsesitany tany Babylona, ary 468 tamin’izy ireo no nonina tao Jerosalema. (1Ta 9:3, 4; Ne 11:4, 6) Misy tetirazana manomboka eo amin’i Pereza, mitanisa an’i Boaza hatrany amin’i Davida, ary tonga any amin’i Jesosy Mesia amin’ny farany.​—Rt 4:18-22; 1Ta 2:4-15; Mt 1:3; Lk 3:33.