REKABITA
(Rekabìta) [An’i Rekaba].
Taranak’i Rekaba Kenita, avy tamin’i Jonadaba.—Je 35:6; 1Ta 2:55.
Tamin’ny andron’i Jonadaba, dia toa nonina tany amin’ny fanjakana tany avaratra ny Rekabita sasany, satria tany i Jonadaba no niaraka tamin’i Jeho (mpanjaka t. 904-877 T.K.) mba hamongotra ny fivavahana tamin’i Bala sy “ny sisa rehetra tamin’ny ankohonan’i Ahaba tany Samaria.” (2Mp 10:15-17) Nandidy ny fianakaviany i Jonadaba mba honina an-tranolay, tsy hamafy voa, tsy hanao tanimboaloboka, ary tsy hisotro divay, satria mpivahiny teo amin’ilay tany izy ireo. (Tsy fantatra na taloha na taorian’ny niarahany tamin’i Jeho izy no nanafatrafatra izany.)—Je 35:6-10.
Maromaro ny Rekabita nonina tany Joda tamin’ny faramparan’ny andron’i Joiakima (628-618 T.K.). Niditra tao Jerosalema ny Rekabita, mba ho voaro tamin’ny Kaldeanina sy ny Syrianina, rehefa nanafika an’ilay tany i Nebokadnezara. Nasain’i Jehovah nentin’i Jeremia tany amin’ny efitra fisakafoana tao amin’ny tempoly i Jazania mpitarika ny Rekabita sy ny Rekabita rehetra. (Je 35:1-4) Tsy maro be izy ireo matoa antonona tao amin’ny efitra fisakafoana iray tao amin’ny tempoly. Nasain’Andriamanitra nasian’i Jeremia kaopy nisy divay teo anoloan’izy ireo. Hoy i Jeremia: “Misotroa divay!” Tsy nety anefa izy ireo satria te hanaja ny tenin’ny razambeny. Nohazavainy fa noho ireo fahavalo nanafika ilay tany no nahatonga azy ireo hiala tamin’ny fonenany mahazatra.—Je 35:5-11.
Nahafaly an’i Jehovah ny nataon’ny Rekabita. Nankatò tanteraka sy nanaja ny razambeny izay olombelona ihany mantsy izy ireo. Ny Jodianina kosa anefa tsy nankatò ny Mpamorona azy. (Je 35:12-16) Nampanantena i Jehovah fa hamaly soa an’ireo Rekabita ireo ka hoy izy: “Hisy olona avy amin’ny taranak’i Jonadaba zanak’i Rekaba foana hitsangana eo anatrehako mandrakariva.”—Je 35:19.
Taorian’ny sesitany, tamin’ny andron’i Nehemia Governora, dia i “Malkia zanak’i Rekaba” no nanamboatra ny simba tamin’ny Vavahadin’ny Antontan-davenona. Raha toa io Rekaba io ihany ilay rain’i Jonadaba na razambeny, dia midika izany fa anisan’ireo tafaverina avy tany an-tsesitany ny Rekabita. (Ne 3:14) Milaza ny 1 Tantara 2:55 fa “razamben’ny taranak’i Rekaba” i Hamata.