TAOLAN-TEHEZANA
Taolan-tratra lavalava fisapisaka sy somary mibiloka. Miisa 24 ny fitambaran’ny taolan-tehezan’ny olombelona. Mandeha tsiroaroa izy ireo, ka toy ny vata makarakara miaro ny fo sy ny havokavoka. Mamorona selan’ny ra ny tsokan’ny taolan-tehezana.
Tsy toy ny namoronana an’i Adama no namoronan’Andriamanitra ny vehivavy, satria tsy naka vovo-tany indray izy mba hanaovana olona hafa tanteraka. Naka taolan-tehezana iray avy tamin’i Adama kosa izy, ary avy tamin’iny no nanamboarany fameno nifanentana tsara tamin’i Adama, ka nataony vehivavy nantsoina hoe Eva. (Ge 2:21, 22) Lavorary foana i Adama na izany aza, ary ‘taolana avy tamin’ny taolany sy nofo avy tamin’ny nofony’ ny vadiny. (Ge 2:23; De 32:4) Tsy nanova ny tsirinain’i Adama ny nanesorana ny taolan-tehezany ka tsy nisy vokany teo amin’ny taranany, fa samy nanana taolan-tehezana 24 ny taranany, na lahy na vavy.
Tsara homarihina fa raha esorina ny taolan-tehezana iray kanefa avela ao ihany ny fonony manarona azy io, dia mbola haniry sy hitombo indray ilay izy. Marina fa tsy voalaza hoe nampiasa an’izany toetra mampiavaka ny taolan-tehezana izany i Jehovah Andriamanitra, nefa azo antoka fa fantany tsara izany satria izy no namorona ny olombelona.
Ao amin’ny fahitana azon’i Daniela no ahitana indray ny teny hoe “taolan-tehezana”, ao amin’ny Baiboly. I Belsazara no mpanjakan’i Babylona tamin’izay. I Babylona sy ireo tarana-mpanjaka tao no mifanitsy amin’ilay biby voalohany tao amin’ilay fahitana. Toy ny orsa kosa ny biby niseho nanaraka, ary mifanitsy amin’i Media-Persa sy ireo tarana-mpanjaka tao aminy izy io. Nisy taolan-tehezana telo teo am-bavan’ilay biby toy ny orsa. Mety hidika izany fa hanohy ny fandreseny any amin’ny faritra telo samy hafa ny mpanjaka mifanitsy amin’io biby io. Ary izany tokoa no nataon’i Media-Persa. Ampiasain’ny Soratra Masina ny isa telo ho fanamafisana. Ireo taolan-tehezana telo àry dia natao hanamafisana fa tsy ho afa-po mihitsy amin’izay faritany efa azony ilay mpanjaka mifanitsy amin’ny orsa fa mbola te handresy faritany vaovao foana.—Da 7:5, 17; jereo BIBY AN’OHATRA.