SABEANINA

(Sabeànina).

1. Mpanafika nandroba ny fananan’i Joba tany amin’ny tany Oza. Nalain’izy ireo ny ombiny sy ny ampondravaviny, ary novonoiny ny mpanompony. (Jb 1:14, 15) Niresaka ny amin’ny “antokona Sabeanina mpivezivezy” koa i Joba ao amin’ny Joba 6:19.

Sarotra ny mamantatra hoe iza no razamben’ireo Sabeanina ireo, satria olona maromaro no nitondra ny anarana hoe Sheba. Sheba, ohatra, no anaran’ny zanakalahin’i Joksana, zanak’i Abrahama (Ge 25:1-3), ary mety ho taranak’izy io ireo mpandroba sabeanina. Milaza anefa ny ankamaroan’ny manam-pahaizana fa mety ho avy amin’i Sheba taranak’i Kosy, zanak’i Hama ny Sabeanina (Ge 10:6, 7), na mety ho avy amin’i Sheba, zanakalahin’i Joktana, taranak’i Sema.​—Ge 10:21-29.

2. Lehilahy ranjanana resahin’ny Isaia 45:14 fa hiaraka amin’ny mpiasa avy any Ejipta sy ny mpivarotra avy any Etiopia, ary hanaiky an’i Jehovah sy ny vahoakany. Miara-voatonona koa i Ejipta sy Etiopia ao amin’ny Isaia 43:3, saingy “Seba” no ampiasaina ao fa tsy “Sabeanina.” Ny mponin’i Seba àry no natao hoe Sabeanina.​—Jereo SEBA No. 2.

3. Taranak’i Sheba (tsy tena fantatra na avy amin’i Sema na avy amin’i Hama) nanorina fanjakana teny akaikin’ny tendron’ny Saikinosin’i Arabia. Azo inoana fa avy any amin’io faritra io ilay mpanjakavavin’i Sheba nitsidika an’i Solomona. (1Mp 10:1) Sabeanina matetika no iantsoan’ireo boky an’io fanjakana io, ary izany koa angamba no iantsoan’ny Baiboly azy.​—Jereo SHEBA No. 6.

Misy Baiboly manao hoe “Sabeana” ao amin’ny Ezekiela 23:42 (JM), satria izany no fahazoany ilay fanamarihana an-tsisim-pejin’ny Baiboly hebreo. “Mpimamo” (na “mpiboboka”) anefa no ao amin’ilay andininy, ka io no ampiasain’ny ankamaroan’ny Baiboly maoderina.​—Prot., Kat., TV.