TEHIM-PANJAKANA

Tehin’ny mpitondra na mpanjaka, ary mariky ny fahefany. Teny an’ohatra ilazana mpanjaka (Ezk 19:10, 11, 14) na fahefana (Za 10:11), indrindra fa ny an’ny mpanjaka ny hoe “tehim-panjakana” indraindray.

Novonoina ho faty izay nankeo anatrehan’ny mpanjakan’i Persa fahiny nefa tsy nasaina, raha tsy notondroiny tamin’ny tehiny volamena.​—Es 4:11; 5:2; 8:4.

Naminany i Jakoba hoe: “Ny tehim-panjakana tsy hiala amin’i Joda.” Ho lasan’ny fokon’i Joda àry ny fanjakana, mandra-pahatongan’i Silo. (Ge 49:10; jereo TEHIM-PAHEFANA.) “Sabatra” nampiasain’i Jehovah handresena ny fanjakan’ny Joda sy hamaboana ny mpanjakany ny Babylonianina, tatỳ aoriana. Hoy mantsy i Jehovah: “Sabatra! Sabatra! Efa norangitina ilay sabatra sady efa nokosehina hangirana. ... Lavin’izy io sahala amin’ny nandavany ny hazo rehetra ve ilay tehim-panjakan’ny zanako? ... Efa nodinihina tsara ilay sabatra. Dia ahoana raha lavin’izy io koa ilay tehim-panjakana?” (Ezk 21:9, 10, 13) Nataon’ilay “sabatra” toy ny hazo rehetra (hokapaina) na toy ny mpanjaka sy fanjakana hafa naripany àry ny “tehim-panjakan’ny” mpanjaka taranak’i Davida tany Joda.

Resahin’ny Salamo faha-2 fa hampiasa tehim-by ilay voahosotr’i Jehovah mba hamotehana an’ireo firenena. (Sl 2:2, 6, 9; ampit. Ap 12:5; 19:15.) Nampiharin’i Petera tamin’i Jesosy Kristy io faminaniana io. (As 4:25-27) Ara-drariny foana ny fampiasan’i Jesosy Kristy ny fahefany, ka lazaina fa tehim-pahitsiana ny tehim-panjakany.​—Sl 45:6, 7; He 1:8, 9.

Hoy ny Salamo 125:3: “Tsy hijanona maharitra eo amin’izay anjaran’ny olo-marina ny tehim-panjakan’ny ratsy fanahy.” Toky ho an’ny olo-marina izany hoe tsy hampahory azy tsy misy farany ny mpitondra ratsy fanahy.