FANJAIRANA

Fanakambanana zavatra amin’ny kofehy. Efa hatry ny ela no be mpanao ny asan’ny mpanjaitra sy mpanao peta-kofehy. (Ek 26:1; 35:35; Jb 16:15; Mpto 3:7; Ezk 13:18) “Nanjaitra ravin’aviavy” i Adama sy Eva, lehilahy sy vehivavy voalohany, “dia nataony sikina.” (Ge 3:7) Mety ho natambatr’izy ireo tamin’ny tahon’aviavy fotsiny ireo ravina lehibe.

Vao mainka hitatra ny rovitra raha tapa-damba vaovao no hanampenana akanjo tonta, hoy i Kristy Jesosy, tamin’izy nanazava hoe nahoana ny mpianany no tsy mifady hanina, tsy toy ny Fariseo sy ny mpianatr’i Jaona. (Mr 2:18, 21) Hifintina mantsy ilay tapa-damba rehefa sasana, ka handrovitra an’ilay akanjo tonta. Tokony ho takatr’ireo nihaino an’i Jesosy àry fa tokony hanara-dia azy amin’izay izy ireo, fa tsy hanery ny mpianatr’i Jesosy hanaraka ny fombafomban’izy ireo. Efa nohazavain’i Jaona koa fa nanomana ny fahatongavan’i Kristy fotsiny izy, ka tsy haharitra ny asany.​—Jn 3:27-30.