SARÔNA

(Sarôna).

1. Lemaka amoron-tsiraka eo anelanelan’ny Lemak’i Dora (atsimon’i Karmela) sy ny Lemak’i Filistia. Mirefy 60 km eo ho eo ny halavan’i Sarôna manomboka eo amin’ny sisiny avaratra, eo amin’ny Reniranon’ny Voaibe (Nahr ez-Zerka), ka hatrany Jopa any atsimo, ary 16 km ka hatramin’ny 19 km eo ho eo ny sakany. Feno dongom-pasika lehibe ilay morontsiraka, sady andalovan’ny lalambe maromaro izay nivezivezen’ny miaramila sy ny mpivarotra fahiny.

Tena nahavokatra be i Sarôna (ampit. Is 35:2) satria nanana sakelidrano maro. Tany ny omby aman’ondry no niraoka ahitra. (1Ta 27:29; ampit. Is 65:10.) Feno alana hazo oaka vaventy ny faritra avaratr’i Sarôna fahiny, fa ny faritra atsimo kosa dia mbola toeram-pambolena hatramin’izao. Toa lasa lao ny ankamaroan’iny faritra iny, rehefa nanafika azy ny Asyrianina tamin’ny taonjato fahavalo T.K.​—Is 33:9.

Hoy ilay Solemita: “Izaho dia safrona ihany, safrona maniry eny amin’ny lemaka amoron-tsiraka.” Toa te hilaza izy fa toy ny iray tamin’ireo voninkazo tsotra naniry tany Sarôna ny tenany.​—To 2:1.

2. Milaza ny 1 Tantara 5:16 fa ny fokon’i Gada dia nonina “tany Gileada sy Basana sy tany amin’ireo tanàna niankina taminy ary tany amin’ny kijanan’i Sarôna rehetra.” Misy manam-pahaizana milaza fa nentin’ny Gadita niraoka ahitra tany amin’ny lemak’i Sarôna tany amoron-tsiraka ny andiam-bibiny. Tany atsinanan’i Jordana anefa ny anjara tanin’i Gada, ary tany no nisy an’i Gileada sy Basana. Maro àry no milaza fa nisy toerana nantsoina hoe Sarôna koa tany amin’ny faritanin’i Gada.