ANDRIAMANITRA TSY FANTATRA

Ampahany tamin’ilay soratra hitan’ny apostoly Paoly teo amin’ny alitara iray tany Atena. Natahotra an’ireo andriamanitra ny Atenianina, ka nanorina tempoly sy alitara maro be. Nataony andriamanitra mihitsy aza ny Laza, Fahamaotinana, Hery, Fandresen-dahatra, ary Fangorahana, ka nanaovany alitara. Nanorina alitara misy soratra hoe “Ho An’Andriamanitra Tsy Fantatra” izy ireo, satria natahotra angamba sao nisy andriamanitra hadinony ka tsy ho faly amin’izy ireo. Io alitara io no noresahin’i Paoly tao amin’ny fampidiran-dresany, tamin’izy nitory tamin’ny Stôika sy Epikoreanina ary olon-kafa tonga nihaino azy teo amin’ny Areopago (Havoanan’i Marsa). Nahay nandanjalanja izy rehefa nilaza fa ny momba an’io Andriamanitra tsy fantatr’izy ireo io no notoriny.​—As 17:18, 19, 22-34.

Nisy alitara toy izany tokoa tany Gresy, hoy i Philostrate (taona 170?-245) sy Pausanias (taonjato faharoa), izay samy mpanoratra grika. Niresaka momba ny alitara ho an’ireo “andriamanitra nantsoina hoe Tsy Fantatra” i Pausanias. (Ny Mombamomba An’i Gresy, Attique I, 4) Nanoratra koa i Philostrate hoe: “Hita fa hendry sy lalin-tsaina kokoa izay midera ny andriamanitra rehetra, indrindra fa eto Atena, izay misy alitara naorina ho an’andriamanitra tsy fantatra.”​—Ny Fiainan’i Apollonius avy any Tyane, VI, III.