ZAREDA, LOHASAHA FALEHAN-DRIAKAN’I

(Zarèda).

Lohasaha falehan-driaka nitobian’ny Israelita mba hialana tamin’ny sisin-tanin’i Moaba, rehefa avy nirenireny efa ho 38 taona izy ireo taorian’ny fikomiana tao Kadesi-barnea. (No 21:12; De 2:13, 14) Maro no milaza an’i Zareda ho ny Lohasaha Falehan-driaka el-Hasaʼ, izay iavian’ny sakelidrano farany atsimo mivarina ao amin’ny Ranomasina Maty. Io lohasaha io no sisin-tany manasaraka an’i Moaba sy Edoma. Mirefy 56 km ny halavany, ary avy any amin’ny 1190 m eo ho eo izy io no midina ao amin’ny Ranomasina Maty, eo amin’ny farany atsimoatsinanana. Misy 5 na 6 km eo ho eo ny sakan’io lohasaha io any amin’ny tampony. Ahitana sisan’ireo tanàna voaro mafy naorin’ny Edomita eo atsimon’ny Lohasahan’i el-Hasaʼ, satria teo no mora niampitana.