ZIBA

(Zìba).

1. [Gazela]. Loham-pianakaviana teo amin’ny fokon’i Benjamina. Zanakalahin’i Saharaima tamin’i Hodesy vadiny i Ziba.​—1Ta 8:1, 8-10.

2. Ilay mpanompon’ny ankohonan’i Saoly nanontanian’i Davida ary nampahafantatra azy momba an’i Mefiboseta, ilay zanakalahin’i Jonatana. Nasain’i Davida nentina tany Jerosalema i Mefiboseta izay nalemy tongotra. Notendreny koa i Ziba sy ny zanany lahy 15 ary ny mpanompony 20 mba hikarakara ny lovan’i Mefiboseta. (2Sa 9:2-12 [Maro no mihevitra fa fahadisoan’ny mpanao dika soratra ilay hoe “eo an-databatro” eo amin’ny andininy faha-11, fa “eo an-databatr’i Davida” [jereo Kat.] no tokony ho izy. Mety ho namerina fotsiny ny tenin’i Davida koa anefa i Ziba eo.]) Nitondra sakafo sy biby ho an’i Davida i Ziba, tamin’i Davida nandositra niala tany Jerosalema noho ny fikomian’i Absaloma. Tena nilainy izany vatsy izany. Najanon’i Ziba tany Jerosalema anefa i Mefiboseta, na dia te handeha tany amin’i Davida aza. Nilaza tamin’i Davida izy hoe i Mefiboseta mihitsy no te hijanona, satria nanantena hoe haverina amin’ny ankohonan’i Saoly ny fanjakana. Tsy nanadihady i Davida rehefa nandre izany, fa tonga dia nomeny an’i Ziba ny fananan’i Mefiboseta.​—2Sa 16:1-4.

Nody tany Jerosalema i Davida rehefa rava ny fikomian’i Absaloma, ary i Ziba no anisan’ireo voalohandohany niarahaba azy. Nitsena an’i Davida i Mefiboseta taorian’izay, ary niarahaba azy tonga soa. Notantarainy taminy koa hoe namitaka sy nanendrikendrika azy i Ziba. Rehefa nahafantatra izany i Davida, dia niova hevitra izy hoe hifampizaran’i Mefiboseta sy Ziba ny fananan’i Mefiboseta. Hoy anefa i Mefiboseta: “Aleo alainy [Ziba] izy manontolo, fa ny mpanjaka tompoko aza efa tonga soa aman-tsara atỳ an-tranony.”​—2Sa 19:17, 24-30.