Aoka isika andeha amin’ny finoana eo anivon’ny fandriky ny zavatra hita maso
NY FANDRIKY ny zavatra hita maso! Tsy tambo isaina tokoa izany ary mahery tokoa! Noho ny ota nataon’ireo ray aman-drenintsika voalohany indrindra, dia nihenjana tamin’ny fitiavana zavatra ratsy ny fon’ny olombelona taranany, dia ny fitiavan-tena tafahoatra, ny fitsiriritana na ny fitiavam-pahafinaretana. Ireo izay hanararaotra ny fahafoizantsika ny zavatra hita maso no olona izay manana zavatra mahafinaritra hamandrihana antsika, toy ny trano tsara tarehy, fiarakodia vaovao, fanaka sarobidy sy fitafiana vaovao hamidy, izany hoe zavatra hita maso nataon’ireo olona ireo hanintona ny fisainantsika izay efa nitontongana rahateo. — Genesisy 8:21.
Mpamitaka anefa ny zavatra hita maso. Arakaraka ny ananana azy no angetahetana ny hitomboany. Ambonin’izany indray dia mitera-pahadisoana betsaka izy amin’ny tombon-tsoa ara-panahy ananan’ny kristiana sy ny fifandraisany amin’ny Andriamaniny. Ny fahefana mpamitaka ny harena dia mamono ny tena. Koa rariny tokoa arak’izany ny nanomezan’ny apostoly Paoly ity fampandrenesana manaraka ity hoe: “Aoka tsy ho amin’ny fitiavam-bola ny toe-tsainareo fa mianina amin’izay anananareo.” — Matio 13:22; Hebreo 13:5, MN.
Ny haren’ny tany dia mpamitaka koa noho izy tsy maharitra, satria ny apostoly Jaona dia mampahatsiaro antsika ilay teny hoe: “Fa ny zavatra rehetra eo amin’izao tontolo izao, dia ny filan’ny nofo sy ny filan’ny maso ary ny rehaka momba izao fiainana izao, dia tsy avy amin’ny Ray fa avy amin’izao tontolo izao ihany. Ary mandalo izao fiainana izao sy ny filany, fa izay manao ny sitrapon’Andriamanitra no maharitra mandrakizay.” — I Jaona 2:16, 17.
Tsy azontsika atao ny manompo tompo roa. Koa dia mipetraka ny fanontaniana noho izany, hoe: “Inona no zavatra mitana ny laharana voalohany indrindra eo amin’ny fiainantsika?” Tsy maintsy ataontsika ny mamelona ny tenantsika sy miahy izay zavatra ilain’ny ankohonantsika, fa raha tsy izany dia ho ratsy lavitra noho ny olona tsy manam-pinoana aza isika. Izany anefa tsy milaza akory fa tsy ho azontsika atao ny mikatsaka voalohany indrindra sy tsy mitsahatra ny Fanjakan’Andriamanitra sy ny fahamarinany. Raharaha momba ny fialohana sy ny fahalehibeazana izany. Raha tahiny iniantsika atao ny manao tsinontsinona ny zavatra ara-panahy, dia miharihary amin’izany fa ny fanangolen’ny zavatra hita maso no ankasitrahantsika.—I Timoty 5:8; Matio 6:33.
Mba hahazoantsika miala tsy ho voafandriky ny zavatra hita maso mpamitaka, dia tsy maintsy ataontsika izay ananana finoana mafy orina. Ny fandalinana ny Tenin’Andriamanitra, ny fiarahana amin’ireo olona izay mitady handositra ny fandriky ny zavatra hita maso, ny vavaka ary ny fandraisana anjara amin’ny raharaham- pitoriana kristiana, dia hanampy antsika ho tonga matanjaka amin’ny finoana. Tena mahasoa tokoa ny hanarahantsika ireo ohatra tsara voalaza ao amin’ny Baiboly nataon’ireo olona taloha, izay nandeha tamin’ny finoana teo anivon’ny fandriky ny zavatra hita maso. — Hebreo 12:1.
Mosesy dia nifidy ny fandehanana amin’ny finoana toy ny voahosotr’Andriamanitra, fa tsy nanao izay hahazoam-pahafinaretana tamin’ireo harem-ben’i Egypta. Talohan’i Mosesy, dia tao koa i Abrahama izay nifidy ny fandehanana amin’ny finoana raha tao an-tanin’olon-kafa fa tsy nanao izay hahazoam-pahafinaretana tamin’ireo zava-mahafinaritra sy manintona tao an-tananan’i Ora fahizay, ilay tanàn-dehiben’ny Kaldeana. Tao koa i Joba manarak’izay natanjaka tokoa tamin’ny fananan-karena, kanefa tsy nametraka ny fitokiany tamin’ireo harem-beny fa nitazona mafy kosa ny fahamarinany, na dia very taminy avokoa aza ireo hareny ireo. — Hebreo 11:24-26, 8-11; Joba 31:24-28.
Raha ny amin’ny andron’ny Soratra Masina kristiana indray no tiantsika ahitana toy izany, dia Saoly avy any Tarsosy no hitantsika. Lehilahy nanam-pahaizana tokoa izy, fa hainy natao ny nibanjina fiainana iray izay nety ho nahazoany laza sy voninahitra ary harem-be, kanefa dia nafoiny tanteraka izany rehetra izany mba handehanany amin’ny fiainana araka ny finoana, ka nahatonga azy mahantra ara-nofo kosa manan-karena betsaka amin’ny ara-panahy. Ary moa ny ohatra lehibe indrindra amin’izy rehetra ireo va tsy Jesosy Kristy? Harem-be manao ahoana akory no nafoiny tao an-danitra mba andehanana manao ny sitrapon’Andriamanitra eto ambonin’ny tany? Ary fotoana firifiry akory, izay nahazoany nanangona haren’ny tany, no nafoiny mba hahazoany mandeha amin’ny finoana! Tsy nanan-toerana na iray akory aza izy hametrahany ny lohany! — Lioka 9:58; II Korintiana 6:10.
Ankehitriny, eto amin’izao tontolo izao, dia misy minisitra kristiana 30 000 mahery manao ny raharaham-pitoriana mandava-taona, ka hita amin’izany ny mpitory mandava-taona, ny misionary, ny mpikarakara ny fikambanana isam-paritany ary ireo olona rehetra ao amin’ny Betela; hitan’izy ireo tamin’ny fanandramana nataony ny fahamarinan’ny teny nataon’i Davida manome toky fa tsy handao ny marina na oviana na oviana Jehovah. Tianao va ny ho isan’izy ireo? Raha tahiny tsy azonao atao izany, angamba ho tianao kosa ny ho tonga mpitory manokana mandritra ny iray volana ao anatin’ny taona iray? Eny, na dia voatazon’ireo fahasahiranana samihafa noho ny fikarakarana ny ankohonanao aza hianao, ka tsy afaka higoka ny tombon-tsoa amin’ny fanaovana ny raharaham-pitoriana amin’ny fotoana feno, moa va manao izay azonao atao hianao amin’ny fanamboarana ny sain’ny zanakao ho tia io asa tsara loatra io? — Salamo 37:25; Deoteronomia 6:7.
Mandehana arak’izany amin’ny finoana, sahala amin’ny hoe hitanao “Ilay tsy hita maso” (Hebreo 11:27). Aza adinoina izao manaraka izao: ny harena hita maso vidim-bola dia mandalo ihany ary tsy afaka hanompo anao eo amin’ny fotoana izay hirehetan’ny fahatezeran’i Jehovah ao Haramagedona (Ohabolana 11:4). Ataovy mitana ny laharana voalohany indrindra ao amin’ny fiainanao ny harena ara-panahy, mifalia mandrakariva amin’ny fahasoavana atolotr’Andriamanitra ny vahoakany amin’ny endriky ny sakafo ara-panahy, ny famangivangiana ary ny raharaha kristiana. Amin’izany, dia hanangona harena be tokoa any an-danitra hianao, dia harena tsy mety lo mandrakizay. — Matio 6:19-21