Ampiasao tsara ny fahazoanao misafidy
“TSY fantatro izay antony itiavany iny lokon’akanjony iny. Tsy mba te-hanao toa an’iny aho!” “Ny feon-kira taloha ve? Halako!” “Inona! mihinan-kena hoe hianareo? Tsy fantatrareo ve fa tsy misy zavatra manimba ny fahasalamana toa an’io!” Tsy isalasalana fa ho azonao hatao ny hanalava io fanonontononana fitiavan-javatra na fankahalan-javatra misy eo amin’ny olona io. Milazalaza tsara ny amin’ny fahasamihafan’ny fitiavan-javatra eo amin’ny olona ity fombam-pitenenana ity: “Izay tsara amin’ny iray, ratsy amin’ny hafa”. Mampiseho tsara, izany fahasamihafan’ny fitiavan-javatra izany, fa mahazo misafidy ny olona ary saro-bidy aminy tokoa izany. Tsy mahagaga izany satria tian’Andriamanitra ho toy izany. Nomen’Andriamanitra safidy sy fahazoa-misafidy malalaka ny olombelona, amin’ny fiainana. Nefa tsy milaza akory izany fa tsy misy fetrany ny fahafahan’ny olona. Eo amin’ny fivavahana, ohatra, eo amin’ny fampianarana sy ny fitondrantena, dia manome toro-hevitra tsara maro momba ny lalana tokony harahina ny Baiboly masina, Tenin’Andriamanitra. Mandrakariva ireny dia fanambarana tena saro-bidy nampahafantatra ny tsara sy ny ratsy. Amin’io lafiny io, dia tsy mamela ny olona hametra izay mety hatao Andriamanitra. Mahazo manaraka na tsy manaraka ireny toro-hevitra ireny, anefa ny olombelona, nefa tokony hizaka ny vokatry ny safidiny. Marina fa tsy manome lalàna mametra izay rehetra ataon’ny olona ny Baiboly. Nomeny fahafahana tanteraka ny olona, eo amin’ny fisafidianana, ny famosahan-kevitra sy ny fitiavan-javatra. Mahatsara kokoa ny fiainana ny fahasamihafan’ny fitiavan-javatra eo amin’ny olona. Ho dridralava ny fiainana raha mitovy fitia daholo ny olon- drehetra eo amin’ny zavatra amelan’ny Baiboly ny tsirairay hisafidy malalaka! Arak’izany, na dia tokony hanaraka mandrakariva ny fepetra araka ny Baiboly aza isika, dia samy mahazo mifidy ny sakafo, ny fitafiana, ny fialam-boly, ny fanaka sy ny zavatra maro hafa koa izay tiany. Na izany aza anefa, amin’izany fisafidianan’izany, dia tsy tokony hanakatsakana ny fahazoan’ny hafa misafidy. Ohatra, mety ho tia feon-java-maneno na hira hianao. Zonao izany. Nefa tsy isalasalana fa mila fahanginana ny mpiara-monina aminao, mba hahazoany mamaky teny. Tsy safidy tokony hanampontsampona ny safidiny ny anao. Raha mikiry mandefa feon-java-maneno mafy hianao ka manembatsembana azy, dia manakatsakana ny fahazoany misafidy. Tsy sitrany ny hihaino ny feon-java-manenonao nefa didinao izy. Manaram-po loatra amin’ny fahafahanao hianao. Ity ny fitsipika araka ny Baiboly tokony hotsarovanao: “Koa amin’izany, na inona na inona tianareo hataon’ny olona aminareo, dia mba ataovy aminy kosa tahaka izany”. (Matio 7:12, MN) Raha tsy tianao handidy anao amin’izay tiany ny hafa, dia aza didinao ny amin’izay tianao izy. Tokony ho heverina koa ny fieritreretana kristiana. Zava-tsoa amin’ny kristiana ny fahazoany mifidy izay feon-java-maneno na hira tiany nefa fantany koa fa ny hirahira sasantsasany dia anisan’ny fitaoman-dratsy sy manimba. Noho izany, dia tsy mihaino izany izy. Fenoiny zavatra marina sy madio ny sainy. Tsy manaram-po loatra amin’ny fahazoany misafidy izy ka manimba tena eo amin’ny ara-panahy. — Filipiana 4:8. Ny amin’ny fitafiana dia mahazo mifidy malalaka izay tiany ny kristiana. Nefa amin’izany dia tokony hahay handanjalanja tsara ny kristiana amin’ny fisafidianany, satria ny fitafiana heverin’ny mponina amin’ny tany sasany fa mety sy mahamendrika dia hoheverina angamba tsy maotina any amin’ny tany hafa. Mananatra ny vehivavy ny Baiboly mba hiravaka “amin’ny fitafiana mahamendrika amin’ny fahamaotinana sy fandanjalanjana”. (I Timoty 2:9, MN.) Tsy tokony hiseho ho tsy maotina ary ny vehivavy kristiana, na oviana na oviana. Tsy tokony hanaraka ny haitraitran’izao tontolo izao miharatsy fitondrantena izy. Fa tokony hampiseho fahendrena kosa ka tsy hitsangana ho mpitsara ny ataon’ny hafa.
Mamela ny kristiana hahazo mifidy ny sakafo ivelomana koa ny Baiboly (I Korintiana 10:25). Ho tia mihinan-kena angamba ny olona iray, fa ho mpihinan-java-maniry kosa ny iray. Samy mahazo mihinana izay tiany hohanina izy. Raha misy olona tsy te-hihinan-kena na zavatra hafa, dia tsy tokony hisy haniny azy: “Aoka ny mihinana tsy hanamavo ny tsy mihinana, ary aoka kosa ny tsy mihinana tsy hitsara ny tsy mihinana, fa Andriamanitra efa nandray azy. Iza moa hianao izay mitsara ny mpanompon’ny hafa?” — Romana 14:3, 4, MN.
Nefa tokony hahay handanjalanja tsara ny kristiana matetra amin’ny fisafidianany, eo amin’ny momba ny sakafo. Raha fantany fa mety hahatafintohina kristiana hafa ny fihinanany sakafo sasantsasany na ny fisotroany zava-pisotro sasantsasany, dia tsy tokony haverimberiny fa tokony hohajaina ny zony. Tokony hampiasa ny fahazoany misafidy, amin’ny fanehoana fanajana ny hafa izy. — 1 Korintiana 10:23, 24, 32, 33; 8:7-13.
Koa satria mamela ny kristiana hisafidy malalaka, ny Tenin’Andriamanitra, amin’ny lafiny maro, dia adidin’ny tsirairay ny manaraka ity toro-hevitr’i Jesosy ity: “Aza mitsara mba tsy hotsaraina hianareo”. (Matio 7:1, MN). Tsy isalasalana fa tsy mitovy amin’ny anao ny fitiavan’ny hafa zavatra na ny fomba fanaony zavatra sasantsasany; amin’ny maha-kristiana anao, dia tsy anjaranao ny manakatsakana ny fahafahany amin’ny faniniana azy na amin’ny fitetezana olon-kafa anontaniana izay heviny na mety na tsia ny ataon-dRanona ary rehefa avy eo dia hanaratsy azy. Aleo manome ohatra tsara ny tena, mba hahazo dera izay manaraka anao noho ny fandrosoany ho amin’ny fahamatorana kristiana.
Tsy milaza akory izany fa eo amin’ny fianakaviana dia tsy tokony hamefy ny fahazoan’ny zanany misafidy ny ray aman- dreny, amin’ny famaizana sy ny fanitsiana azy. Adidiny izany. Ny mpikarakara kristiana koa dia manana andraikitra hihevitra amim-pitiavana izay hahasoa ny mpikambana rehetra eo amin’ny ara-panahy. Indraindray mety ho tsikariny fa misy toe- javatra mitombo sy mila hiteraka zava-manahirana lehibe; tokony hanome anatra tsara izy mba ho fampiomanana. Tsy manakatsakana ny fahazoanao misafidy izy amin’izany, fa maniry mafy mba hanampy anao hahita ny fomba fampiharana ny fitsipika araka ny Baiboly, hahazoanao mampiasa tsara izany fahafahana izany.
Zavatra mahafinaritra sy tena ilaina tokoa ny fahazoana misafidy ananan’ny olombelona, nefa tokony hampiasaina amim-pahendrena izany. Tokony ho fantatsika fa tsy mety hanana fahafahana tanteraka isika amin’ny lafiny rehetra sady hahazo sitraka amin’Andriamanitra sy hifanaraka amin’ny mpiara-belona amintsika. Ny kristiana matotra dia manaiky mandrakariva hotarihin’izao fitsipika araka ny Baiboly izao: “Aoka ho toy ny olona afaka hianareo, nefa aza mitondra ny fahafahanareo ho fanaronana ny fanaovan- dratsy, fa ho toy ny mpanompon’Andriamanitra”. — I Petera 2:16, MN.