Fanontanian’ny mpamaky
● Rehefa mandika lahateny amin’ny fitenin’ny moana sady marenina ny anabavy iray, moa ve ny torohevitr’i Paoly voarakitra ao amin’ny I Korintiana 11:3-16 mandidy azy mba hisaron-doha?
Koa satria ilay anabavy mandika teny tsy milaza hevitry ny tenany, dia tsy mampianatra ny kongregasiona izy ka noho izany dia tsy voatery hisaron-doha. Tsy manao afa-tsy ny mampita filazana amin’ny fiteny hafa izy, eo dia ny fitenin’ny moana sady marenina. Ho toy izany koa raha voatery mandika vavaka izy. Nefa ho tiany kokoa angamba ny hisaron-doha, noho ny fahafantarana fa mandray anjara lehibe ho an’ny mpihaino izy ary antenaina ny anamarihany fihetseham-po sy fanovam-peo ao amin’ny lahateny mba handikana tsy misy diso ny hevitr’ilay mpandaha-teny. Hieritreritra angamba izy fa amin’ny fisaronan-doha dia hanalavitra ny fanomezana fiheveran-diso hoe mampianatra na mivavaka tsy misaron-doha eo anatrehan’ny kongregasiona izy. Ireo anabavy mandika teny dia hanao fanapahan-kevitra amim-pahendrena arakaraka ny toe-javatra sy amin’ny fiheverana ny fieritreretany.
Ao amin’ny fivorian’ny kongregasiona iray dia mety ho marenina ny hany rahalahy ao. Raha mahay miteny mazava sy mafimafy izy mba ho azon’ny mpanatrika, dia ho tsara ny hitarihany raharaha sy ny hanaovany vavaka raha mahafeno an’ireo fepetra izy. Raha milaza hevitra amin’ny alalan’ny fihetsehana izy, dia afaka mitari-draharaha sy manao ny vavaka raha mahay mandika teny tsara ho an’ny hafa ny anabavy iray. Tsy voatery hisaron-doha izy, nefa araka ny efa hitantsika, dia hanao izany angamba izy noho ny toe-javatra na noho ny fieritreretany. Nefa kosa raha tsy mahay miteny tsara ilay rahalahy na tsy mahay miteny mihitsy ka tsy misy mpandika teny mahay ao amin’ny mpanatrika, dia hitari-draharaha sy hivavaka ny anabavy mahay iray, ka hisaron-doha. Nilaza ny apostoly Paoly fa rehefa miteny amin’ny “fiteny” tsy azon’ny mpanatrika ny olona iray, dia hangina izy ireo, raha tsy misy mpandika teny tonga eo (I Korintiana 14:27, 28). Mba hanalavirana tsy ho sakodiavatra na mba tsy hisian’izay rehetra mety ho fifandisoan-dresaka rehefa mety hitranga ny tarehin-javatra karazan’izany, dia hanao fandaharana mety mialoha ireo loholona.