Fanontanian’ny mpamaky

● Raha misy zanaka, ao an-tokantranon’ny loholona na mpikarakara momba ny asa, manjary “ampangaina ho mpanaram-po amin’ny ratsy”, inona moa no mametra raha azon’ny filoham-pianakaviana atao ny manohy manompo ny kongregasiona amin’ny maha-tompon’andraikitra voatendry?

Asehon’ny Soratra Masina mazava fa ny lehilahy manambady izay manompo ao anatin’ny kongregasiona dia tokony ho filoham-pianakaviana faka tahaka. Izao no vakintsika: “Koa ny mpitandrina dia tsy maintsy (...) manapaka tsara ny ankohonany, mampanaiky ny zanany amin’ny fahamaotinana tsara (fa raha misy olona tsy mahay mitondra ny ankohonany, hataony ahoana no fitandrina ny fiangonan’Andriamanitra?).” (I Timoty 3:2, 4, 5). “Aoka ny diakona [mpikarakara momba ny asa, MN] samy hanam-bady tokana sady hanapaka tsara ny zanany sy ny ankohonany.” — I Timoty 3:12.

Ara-drariny ny hanantenan’ny kongregasiona ny haha-ohatra tsara dia tsara an’ireo loholona sy mpikarakara momba ny asa mbamin’ny ankohonany, amin’ny fomba fiaina kristiana. (Jereo I Timoty 4:12; I Petera 5:3.) Raha tsy izany intsony no izy, dia mety hisy vokany manimba eo amin’ny fahasalamana ara-panahin’ny kongregasiona izany. Ohatra, raha toa manao tsirambina ireo zanaky ny loholona sy ny mpikarakara momba ny asa raha ny amin’izay mikasika ny fampiharana an’ireo fotopoto-pitsipika ao amin’ny Baiboly, izany dia mety hamporisika ny ankizy hafa ao amin’ny kongregasiona hanao toy izany koa ka hanala tsiny ny fitondrantena ratsin’ny tenany. (Jereo I Korintiana 8:9-13; 10:31, 32.) Vao mainka ratsy kokoa ihany ny tarehin-javatra rehefa manao fahadisoana lehibe ny zanaky ny loholona sy mpikarakara momba ny asa.

Araka izany, rehefa manala baraka ny fianakaviana sy ny kongregasiona ny zanaka toy izany, dia ny kolejin’ny loholona no tokony hamantatra raha mahafeno an’ireo fepetra takina ilay ray mba hanohizana manompo amin’ny maha-loholona na mpikarakara momba ny asa. Tsy ny fahatsiarovany tena manokana ho mahafeno an’ireo fepetra takina mba hanompoana, na dia ao aza ny tarehin-javatra misy ao an-tokantranony, no tokony hanan-kery eo amin’ny fanapahan-kevitra hataon’ny kolejin’ny loholona.

Mba hahafahana manohy manompo, ny lehilahy iray dia tokony hanome porofo miharihary fa hainy ny mitondra ho an’ny fianakaviany ny fanampiana ara-panahy ilainy ka tsy niseho ho nanao tsirambina aoka izany izy tamin’io lafiny io. Ny ray malina iray, amin’ny ankapobeny, dia afaka manamarika ireo zava-manahirana mitranga ao anatin’ny fianakaviany alohan’ny hitomboany aoka izany ka tsy ho voafehy intsony mihitsy. Noho izy lehilahy mahay mitondra ny ankohonany, dia hainy ny manao fandaharana mba hanaraha-maso ny tarehin-javatra ratsy eo anivon’ny ankohonany. Hanao zavatra ratsy angamba ireo zanany, nefa tokony ho hainy ny hanome azy ireo ny fitarihana sy ny lalàm-pifehezana ilaina, mba tsy hahatonga azy ireny ho “mpanaram-po amin’ny ratsy”. — Titosy 1:6.

Marina fa indraindray ny zanaka iray dia mety hihataka amin’ny lalan’ny fahamarinana na ho latsaka ao amin’ny fahotana na dia ao aza ny fiezahana mendri-piderana ataon’ilay ray mba hanampiana ny ankohonany amin’ny ara-panahy. Tena mety ho ohatra tsara dia tsara ireo zanany hafa raha ny amin’ny fiainana amin’ny maha-kristiana, ka izany dia manamarina fa nahazo fanabeazana tsara avy amin’ny ray aman-dreniny izy ireo. Nefa kosa, raha toa misy zanaka tsy ampy taona maro monina ao an-tranon-drainy, rendrika mifanesy ao anatin’ny fahasahiranana ara-panahy lehibe rehefa tonga eo amin’ny taona iray, ka manala baraka ny fianakaviana sy ny kongregasiona izy ireny, dia tena mety hampiahiahy tokoa raha ‘manapaka tsara ny ankohonany’ ilay ray. Mety àry ny hitandremana mba tsy hanala tsiny ny tarehin-javatra amin’ny fakana fotsiny, ohatra ao amin’ny Baiboly ny amin’ireo niova ho ratsy, toa an’i Esao, ireo zanakalahin’i Samoela mbamin’ny hafa koa (Genesisy 25:27-34; 26:34, 35; I Samoela 8:2, 3, 5). Tokony hotadidina ao an-tsaina fa ny ankamaroan’ireo izay nihataka tamin’ny fahamarinana ka resahin’ny Baiboly, dia olon-dehibe, afaka tanteraka nanao ny fanapahan-kevitry ny tenany. Izy ireny dia tsy mba voafehin’ny karazam-pahefana sy fitarihana toy ny ampiharina amin’ny zanaka tsy ampy taona ao amin’ny tokantrano iray, ary ireny no jerentsika eto.

Koa satria mety hotandindomin-doza ara-panahy ny kongregasiona rehefa manao fahadisoana tena lehibe tokoa ny zanaky ny loholona na mpikarakara momba ny asa, ireo lehilahy manana zanaka tafiditra amin’izany dia tokony hiara-miasa an-tsakany sy an-davany amin’ny kolejin’ny loholona mba hanaporofoana ny zava-misy. Tsy tokony hohamaivaniny ny fahadisoana an-karihary toy izany nataon’ireo zanany na hanandrana hanafina izany izy mba hitanana ny toerany. Ambonin’izany, dia tsy tokony hitondra an’ireo zanany amim-pahasiahana tafahoatra izy ireny (Efesiana 6:4). Tokony hirin’ireny ray ireny amim-pahatsorana ny hanampy amin’ny ara-panahy an’ireo zanany nikomy, raha mamela azy hanao izany ny toe-javatra. Ny zavatra tokony hahiny voalohany indrindra dia ny toe-piainana ara-panahin’ny fianakaviany fa tsy ny hahafantarana raha azony atao ny hanohy hanompo amin’ny maha-tompon’andraikitra voatendry. — Jereo I Timoty 5:8.

Noho izany toe-javatra izany, raha tena miteraka zava-manahirana lehibe tokoa ao anatin’ny kongregasiona ny fahotana lehibe nataon’ny zanaka monina ao an-tokantranony, raha ny amin’ny hoe moa ve mitondra ny ankohonany amin’ny fomba tsara ny lehilahy iray, dia tsy tokony hanohy hanompo amin’ny maha-loholona na mpikarakara momba ny asa izany lehilahy izany. Rehefa manompo amin’ny maha-loholona ny lehilahy iray ka mamela ny fisakaizana sy ny fangorakoraham-po loatra hisy heriny eo amin’ny fitsarany sy ny fanapahan-keviny ireo loholona hafa ao anatin’ny kongregasiona, ary manilika an’ireo fotopoto-pitsipika ao amin’ny Soratra Masina, amin’izay indrindra ny fanohizany manompo amin’ny maha-loholona, na dia tsy mahafeno an’ireo fepetra aza, no mety hanimba ny kongregasiona amin’ny ara-panahy. Ny antony dia satria izany mety handrava ny fanajana ny kolejin’ny loholona manontolo. Mety hanome fialan-tsiny ho an’ny ankizy hafa ao amin’ny kongregasiona koa izany, mba hanaovan-dratsy. Tsara àry ny hitadidiana ao an-tsaina fa tsy ny fahaiza-mandahateny na mandamin-javatra na ny maha-izy an’io lehilahy io mahafinaritra no tokony hoheverina. Ny anton-javatra mametra dia ny hahafantarana raha mahavita ny anjara asany amin’ny maha-ray amin’ny fomba tsara izy. Raha izany no hita vao ho afaka hanohy hanompo izy. Mazava ho azy fa rehefa izany no hita, dia tokony hohalavirin’ny kolejin’ny loholona ny fisehoana tsy amin’ny antony ho mpanakiana na mpila vaniny amin’ny fitanisana ny toeran’io rahalahy io ara-pianakaviana.