Fitsanganana ho fiainana sy fitsanganana ho fitsarana
12 Noho izany, ny fitsanganan’izay rehetra hovelomina indray ao amin’ny Fanjakan’i Kristy dia mety hiafara, na amin’ny fiainan’olombelona tanteraka, na amin’ny fitsarana, izany hoe amin’ny famoizana izay rehetra mety ho fiainana. Miharihary mazava izany amin’ny famakiana ny Jaona 5:29 ao amin’ny Fandikan-teny eokimenikan’ny Baiboly izay andikana an’io andinin-teny io toy izao manaraka izao: “[Izy ireo] dia hivoaka avy ao ho amin’ny fitsanganana mitarika ho amin’ny fiainana; (...) ho amin’ny fitsanganana mitarika amin’ny fitsarana.”
13 Ao anatin’ny fe-potoam-pitsarana arivo taona, Jesosy Kristy sy ireo mpitsara lefiny dia hitsara ny olombelona araka ny rariny. Izao no nolazain’i Jesosy: “Araka izay reko no itsarako.” — Jaona 5:30.
14 Izay ho ren’i Jesosy avy amin’i Jehovah Andriamanitra, mpitsara tampony, dia hampidiriny ao anatin’ny fitsaran’ny tenany. Hampihatra ny raharaha ara-pitsarany izy, mifanaraka amin’ny filazalazana ara-paminaniana nomen’Andriamanitra ara-tsindrimandry an’Isaia (11:1-5) mpaminany, mikasika azy. Fa raha ny amin’ireo mpitsara 144 000 hampiarahina aminy, izy ireo dia hanaraka ny ohatra nomen’i Jesosy Kristy. Araka izany dia tena ho voatonona tokoa ny fitsaran’i Jehovah, satria ny Zanany, Jesosy Kristy, dia hitady foana izay hanaovana, tsy ny sitrapony, fa ny sitrapon’ny Rainy. Noho izany, dia tsy hisy fangatahana fitsarana ambony amin’ny didim-pitsarana havoakan’i Jesosy. Amin’ny faran’ny fe-potoam-pitsarana arivo taona, dia hametraka ny Fanjakana amin’ilay Mpitsara tampony izy, ka tsy hisy mihitsy fiampangana ho mivadibadika ho azo atao aminy (I Korintiana 15:24-28). Amin’izany Jehovah Andriamanitra dia handray an-tanana ny zavatra ho amin’ny fitsapana farany sy raikitra hampiharina amin’ny olona rehetra ho napetraky ny Zanany aminy indray. — Apokalypsy 20:7-15.
[Loharanon-kevitra]
Fehintsoratra 12-14 ihany