Iharam-pamelezana ny fanambadiana

TAO amin’ny filazam-baovao izahay dia nanamarika fanambarana roa momba ny fanambadiana amin’izao androntsika izao. Ny anankiray manatsara azy, ny anankiray manaratsy. Ny nanoratra ny voalohany dia mpandinika ny toe-tsaina iray any Toronto, ny dokotera Alan Lyall. Nanambara tamin’ny mpanao gazety iray ao amin’ny Toronto Star izy fa madiva hiverina amin’ny fitiavan-javatra ankehitriny indray ny fanambadiana, na dia tao aza ny famelezana maro nihatra taminy tao anatin’izao taona faramparany izao. Nahoana? Nanolotra izao fanazavana izao izy: “Mety hiharihary ho anankiray amin’ireo fomba fiaina mahafapo indrindra ny fanambadiana.”

Araka ny fanambarana faharoa anefa, dia fanambadiana be dia be no ahitana fahoriana aoka izany. Ny vehivavy tanora mpanao gazety iray izay manaratsy na dia ny hevitra ny amin’ny fanambadiana aza, dia nanambara toy izao: “Rehefa mijery ny fanambadiana aho, dia olona mijaly indrindra no hitako. Ary ny hany holazaiko ny amin’ny fijaliana, dia ny faniriana ny hitsaharany ambonin’ny zavatra rehetra.” Moa ve ny fanambadiana heverinareo ho fomba fiaina mitondra fahafahampo sa ho toy ny loharanom-pijaliana indrindra?

Tsy azo lavina fa ny fanambadiana sasany dia mahita fahoriana sy fijaliana. Miharihary izany amin’ny habetsahan’ny fisaraham-panambadiana any amin’ny tany azo anaovana izany. Any Etazonia, ny isan’ny fisaraham-panambadiana dia avy telo heny tao anatin’izao roapolo taona farany izao. Any amin’ny Firaisana sovietika dia toa hoe fanambadiana iray amin’ny telo no miafara amin’ny fisarahana. Any Aostralia, dia avy efatra heny ny isan’ny fisaraham-panambadiana tao anatin’ny herintaona monja satria nanomboka nanan-kery ny lalàna vaovao iray momba an’io zava-manahirana io. Araka ny Financial Times any Londres, any Angletera, izay itomboan’ny isan’ny fisaraham-panambadiana, ny vola fanampiana arotsaka ho an’ny vehivavy misara-panambadiana na ho an’ny ankizy dia tafakatra ho arivo tapitrisa livatra (eo amin’ny 130 000 tapitrisa ariary) tao anatin’ny herintaona.

Inona no loharanon’izany fikorontanana eo amin’ny fanambadiana izany?

Tsy misy tanteraka mihitsy

Aoka holazaintsika voalohany indrindra fa tsy misy tanteraka mihitsy. Isika rehetra dia samy manana toetoetra sasany mety hahasosotra ny hafa. Raha indraindray fotsiny no ahitantsika ny olona iray, dia tsy zava-dehibe ireny haitraitra ireny. Nefa raha manambady an’io olona io isika, dia mety hisongadina izany. Mety hiteraka fifandirana manimba izany. Mety hiafara amin’ny herisetrany fiharatsian’ny fifandraisana. Any Kanada, ohatra, dia hita fa vehivavy iray amin’ny folo no iharan’ny famelezana avy amin’ny vadiny.

Ny tsy fitovian-toetra na tsy fitovian’ny zava-kendrena noferana dia mety hiteraka zava-manahirana lehibe. Inona no mitranga rehefa manambady olona tsy tia miresaka ny olona be resaka iray? Na rehefa mihevitra ho lehibe ny zava-tsarobidy ara-nofo ny iray amin’ny mpivady tsy toy ny anankiray? Mihevitra angamba ilay vehivavy fa ho afa-baraka raha tsy afaka manome azy karazam-piainana toy ny hitany tao an-tranon-dray aman-dreniny ny lahy. Na mety hanokana ora maro be amin’ny asa ilay lehilahy ka mahatsiaro fa tsy raharahaina ny vadiny.

Ny fimamoana dia antony lehibe hafa koa mahatonga fahatapahan’ny fatoram-panambadiana. Toy izany koa ny fahalotoam-pitondrantena. Ao anatin’ny fitambaran’olona misy antsika moramorainy, dia misy mihevitra fa mety hahasoa ny fivadihana vetivety. Milaza toy izao anefa ireo izay mamotopototra ny amin’izany: “Tsy miteraka vokatra tsara ny fivadihana. Olona maro no mihevitra fa mety hitondra zavatra hafa kely eo amin’ny fanambadiany ny fisakaizana anitsakitsaham-bady, nefa raha ny marina dia loharanon-java-manahirana lehibe foana izany. Tsy mba tsy nisy fijaliana mihitsy tamin’izany.” Ny filazana avy any Angletera dia nanamafy izany fanatsoahan-kevitra izany ka nampiseho fa ny fanitsakitsaham-bady no anankiray amin’ny antony lehibe indrindra miteraka fisaraham-panambadiana ao amin’io tany io. Raha ny marina, izay manitsakitsa-bady dia ‘manimba tena’. — Ohabolana 6:32.

Moa ve ianao koa efa mba nieritreritra ny mety ho herin’ny fahasahiranana ara-toe-karena eo amin’ny fanambadiana. Rehefa samy miasa ny mpivady, ary izany matetika no hita amin’izao androntsika izao, dia mety hisaratsaraka ny fianakaviana. Ary rehefa mitrosa be ny mpivady iray, dia matetika izany no miteraka fihenjanana, fifanebahana sy alahelo.

Ambonin’izany, ny fironana amin’izao andro izao ‘samy hanao izay ataony avy’ dia manimba ny fijoroan’ny fanambadiana. Misy mpivady mahita fa sarotra ny mizatra amin’ny zavatra tian’ny iray. Matetika izy ireny no manantena ny hanana fahafahana sahala amin’ny fony mbola mpitovo, ao anatin’ny fanambadiana. Ny olona manambady izay tsy mahay mampitombo ny fahaizany manome dia mahita fahasahiranana lehibe.

Mety hamorona zava-manahirana koa ny havana, indrindra fa any amin’ny tany izay iheverana ny fanambadiana ho toy ny firaisan’ny fianakaviana roa fa tsy ny olon-droa. Mahery dia mahery amin’izay ny fitaoman’ny fianakaviana. Mety hanana reny tia manapaka aoka izany ilay lehilahy, hany ka amin’ny farany dia izy no manao ireo fanapahan-kevitra fa tsy ilay zanany lahy. Na ilay vehivavy koa no manana ray aman-dreny izay manantitrantitra mba hanaovany izay lazain’izy ireo fa tsy mamela an’ilay mpivady hikarakara ny raharahany.

Ireo no sasantsasany amin’ny fahasahiranana mety ho hitan’ny mpivady aorian’ny fampakaram-badiny. Noho izany, dia marina tanteraka, fa iharam-pamelezana foana ny fanambadiana ary iharam-panerena mafy foana. Hahatohitra izany ve izy? Amin’ny maha-fikambanan dia eny, satria izy io dia mety hiharihary fa “anankiray amin’ireo fiaina mahafapo indrindra”. Mazava ho azy anefa fa mety haningana ny fanambadiana sasany. Fantatrao ve ny fomba hanalavirana fiafarana ratsy toy izany?

[Sary, pejy 3]

FIMAMOANA

FIVADIHANA

RENDRARENDRA

FITAOMAN’FIANARAKAVIANA

TROSA