Manompoa amim-pahatokiana amin’ny maha-‘mpiara-miasa amin’ny fahamarinana’
“Manao asa mahatoky hianao na amin’inona na amin’inona ataonao amin’ireo rahalahy (...). Isika dia tokony handray tsara izay [olona, MN] toy izany, mba ho mpiara-miasa amin’ny fahamarinana.” — III Jaona 5-8.
1. Amin’ny fomba ahoana no tokony hanompoana an’i Jehovah mba hankasitrahany?
JEHOVAH dia mitady mpivavaka izay mivavaka aminy “amin’ny fanahy sy ny fahamarinana”. (Jaona 4:23, 24.) Mba ho mendrika ny fankasitrahan’Andriamanitra, ny fanompoam-pivavahana ataony dia tokony hifanaraka amin’izay nambarany ny amin’ny tenany sy ny fikasany. Izy ireny dia tokony hanaraka ny fitambaran’ny foto-pampianarana kristiana izay mampiharihary an’i Jesosy Kristy. Ilaina ny handehanana lalandava ao amin’izany fahamarinana izany mba hahatongavana amin’ny famonjena. — Efesiana 1:13, 14; I Jaona 3:23.
2. Inona no fanontaniana mipetraka, ary aiza no hahitantsika torohevitra mahasoa?
2 Ny Vavolombelon’i Jehovah dia tokony hanohy handeha ao amin’ny fahamarinana. Raha ny marina, dia ilainy ny fiaraha-miasa tanteraka ao amin’ny “fanompoana masina” amin’ny fampandrosoana amim-pahatokiana ny tombontsoan’ny Fanjakana amin’ny maha-‘mpiara-miasa amin’ny fahamarinana’. (Romana 12:1; II Jaona 5:8; Matio 6:33.) Nefa ahoana no hetezan’izany? Hahita torohevitra tena ilaina isika ao amin’ny taratasy fahatelon’ny apostoly Jaona azo tamin’ny tsindrimandrin’Andriamanitra.
Aoka isika handeha hatrany ao amin’ny fahamarinana
3. Amin’ny fomba ahoana ny fampidiran-dresaka ao amin’ny taratasin’i Jaona fahatelo no manipika ny fehin’ny fitiavana?
3 Ny teny fampidirana nataon’ilay apostoly dia manipika miharihary ny fehin’ny fitiavana kristiana. Izao no nosoratany:
“Izaho loholona mamangy an’i Gaio ilay Malala, ary tiako amin’ny fahamarinana.” (III Jaona 1).
Jaona dia miseho ho toy ny “loholona”, tsy isalasalana fa noho ny taonany sy ny fahamatorany ara-panahy. Gaio dia sakaiza kristiana iray tiany tokoa ary nipetraka tany amin’ny toerana iray tsy voalaza mazava. Antsoin’i Jaona hoe “ilay Malala” izy, tenim-pitiavana fampiasan’ireo kristiana voalohany matetika. — Romana 16:5; II Petera 3:1; Joda 3.
4, 5. a) Inona moa no faniriana sy vavaka nataon’i Jaona ho an’i Gaio? b) Ahoana no nampiasan’i Gaio ny fiainany?
4 Nanana antony tsara nitiavana an’i Gaio tokoa i Jaona. Izao tokoa no vakintsika:
“Ry malala, mangataka aho mba hambinina sy ho salama amin’ny zavatra rehetra anie hianao, tahaka izay anambinana ny fanahinao ihany. Fa faly indrindra aho, fony nisy rahalahy tonga ka nanambara ny fahamarinana, dia toy ny andehananao araka ny fahamarinana. Tsy manana fifaliana mihoatra noho izao aho, di any andrenesako fa mandeha araka ny fahamarinana ny zanako.” — III Jaona 2-4.
5 Ilay apostoly dia nivavaka mba ‘hambinina amin’ny zavatra rehetra’ Gaio, na amin’ny lafiny ara-panahy izany, na amin’ny ara-nofo, ary mba “ho salama”. Nefa izany firarian-tsoa mahazatra izany dia tsy hoe tsy maintsy nilaza akory fa narary Gaio (jereo Asan’ny apostoly 15:29). Rehefa mampiasa ny teny hoe “fanahy” i Jaona eto, ny tiany holazaina dia ny fiainana ankehitriny amin’ny maha-olona misaina. Ahoana anefa no nampiasain’i Gaio ny ‘fanahiny’, ny fiainany? Tamim-pahatokiana, tao amin’ny “fanompoana masina”.
6, 7. a) Inona no ‘nahafaly indrindra’ an’i Jaona? b) Tahaka an’i Gaio, fihetsika manao ahoana no tokony horaisin’ny vavolombelon’i Jehovah mahatoky eo anoloan ny fahamarinana?
6 Nisy rahalahy tonga tany Efesosy nitondra vaovao nampahery an’i Jaona, izay ‘nahafaly azy indrindra’. Afaka nifaly i Jaona satria Gaio sakaizany dia salama tsara tokoa ara-panahy sady nifikitra tamin’ny fahamarinana hatrany (Ohabolana 15:30; 25:25). Ireo “rahalahiny” resahina dia nety ho anisan’ny kongregasiona nisy an’i Gaio, na koa mpikambana amin’ny kongregasionan’i Efesosy, izay nankany amin-dry Gaio, angamba nitondra taratasy iray avy tamin’ny apostoly Jaona ho azy. — II Jaona 9.
7 Ireo rahalahy ireo dia ‘nanambara ny fahamarinana notanan’i Gaio’. Gaio dia nanaiky tsy nisy fepetra ny fahamarinana ny amin’i Kristy ary nanaraka ny zavatra notakin’i Jehovah. ‘Nandeha araka fahamarinana’ izy, tamin’ny fanarahana amim-pahatokiana hatrany ny fitambaram-pampianarana krsitiana. Raha ny marina, ny vavolombelon’i Jehovah mahatoky rehetra dia tsy vitan’ny hoe tokony ho ao “amin’ny fahamarinana” fotsiny, fa ‘handeha’ aminy koa, hanao ny fahamarinana ho fomba fiainany. Ny kristiana mahatoky dia manaraka foana “ny fahamarinana” amin’ny fandavana ny fivadiham-pinoana sy amin’ny fanompoana amin-jotom-po an’Andriamanitra, ‘amin’ny fo rehetra’. — II Jaona 1-4; Isaia 38:2, 3.
8. Nahoana i Jaona no afaka nihevitra an’i Gaio ho toy ny iray amin’ny ‘zanany’?
8 Nilaza i Jaona fa tsy nanana antony lehibe nanehoana fankasitrahana izy, nihoatra noho ny fandrenesany fa nanohy “nandeha arak any fahamarinana” na ‘niaina tao amin’ny fahamarinana’ ‘ny zanany’. (Bible en fran<u481>ais courant.) Angamba ilay apostoly tonga rain’i Gaio ara-panahy noho izy nanampy azy hahazo fahalalana marina ny Soratra Masina (jereo I Korintiana 4:14-17). Nefa na dia tsy hoe nampian’i Jaona manokana aza ity sakaiza Malala ity ho tonga amin’ny fahamarinana, noho ny haben’ny taonany, ny fahamatorany kristiana sy ny fitiavan-dray nananany ho azy, dia afaka nihevitra tokoa an’io lehilahy tsy isalasalana fa tanora kokoa io ho toy ny iray amin’ireo ‘zanany’ izy.
“Mpiara-miasa amin’ny fahamarinana”
9. Araka ny III Jaona 5-8, inona no namporisihana an’i Gaio mba hatao amin’ny rahalahy sasany?
9 Noho Gaio niantsoroka tsara ny andraikiny kristiana, dia noderain’i Jaona tamin’izao teny izao àry izy:
“Ry malala, manao asa mahatoky hianao na amin’inona na amin’inona ataonao amin’ireo rahalahy ireo, na dia vahiny aza izy, izay nanambara ny fitiavanao teo anatrehan’ny fiangonana; dia ho soa no ataonao, raha mamoaka azy koa araka izay mendrika hatao noho ny amin’Andriamanitra hianao; fa noho ny Anarana no niaingany, ka tsy naka na inona na inona tamin’ny jentilisa izy. Koa isika dia tokony handray tsara izay toy izany mba ho mpiara-miasa aminy amin’ny fahamarinana.” — III Jaona 5-8.
10. ‘Asa mahatoky’ inona no nataon’i Gaio, ary amin’ny fomba ahoana no anahafan’ny Vavolombelon’i Jehovah azy ankehitriny?
10 Gaio dia ‘nanao asa mahatoky’ na ‘nanao zavatra tamim-pahatokiana’ tamin’ny fampiantranoana ireo rahalahy izay nitsidika ny kongregasiona (Baiboly Segond). Ary dia mbola mahatalanjona kokoa aza izany satria “vahiny” izy ireo, izany hoe kristiana tsy mbola fantatry ny mpampiantrano azy teo aloha. Amin’izao andro izao koa, ny vavolombelon’i Jehovah dia “manao asa mahatoky” rehefa mampiantrano mpiara-miasa toy izany, ohatra, ireo mpiandraikitra mpitety faritany alefan’ny Fikambanana Watch Tower. — Romana 12:13.
11. Inona no azon’ireo rahalahy nifindrafindra toerana nambara ny amin’i Gaio?
11 Gaio, ilay malala, dia tsy isalasalana mihitsy fa nampiseho fitiavana tarihin’ny fotopoto-pitsipik’Andriamanitra, ka nahatonga ireto rahalahy mpitety faritany ireto hanao fanambarana ny aminy “teo anatrehan’ny kongregasiona”, angamba tamin’ny fivoriana kristiana iray tao Efesosy (jereo Asan’ny apostoly 14:27). Afaka nanamarina izy ireny fa Gaio dia niseho ho mpampiantrano vahiny. Nampiseho fitiavana ny vahiny izy, ary tamin’izany dia naneho ny toetra izay efa nampiavaka hatrizay ny olona tia fivavahana. — Genesisy 18:1-18; Matio 25:34, 35, 40.
12. a) Tamin’ny fomba ahoana no tokony ho nampandehanana ireny kristiana mpitety faritany ireny tamin’ny lalany? b) Tamin’ny anaran’iza no nivoaka ireny kristiana ireny? d) Tamin’ny fomba tsy nitovy ahoana no tokony hitondrana ireny rahalahy nahatoky ireny sy ny mpivadi-pinoana?
12 Ilay apostoly dia namporisika an’i Gaio mba hamoaka ireny kristiana ireny amin’ny lalany “araka izay mendrika hatao noho ny amin’Andriamanitra”, izay niasan’izy ireny mafy. Tokony ho nomena azy izay mety hilainy amin’ny diany, ohatra, sakafo sy vola (Titosy 3:13). Ireny rahalahy ireny dia tokony ho nampiana satria niainga noho “ny anarana” izy, araka ny filazan’ny andininy amin’ny teny grika. Ny tian’i Jaona holazaina eto dia azo inoana fa Jehovah, ny anarana tsy manan-tsahalan’Andriamanitra, satria vao avy niteny izy fa tokony hamoaka azy amin’ny lalany “araka ny mendrika hatao noho ny amin’Andriamanitra”. (Jereo Fandikan-tenin’izao tontolo izao vaovao; Kingdom Interlinear Translation; Darby f.a.p; Gros-jean & Léturmy f.a.p.) Raha tsy tokony hampiantranoina ireo mpivadi-pinoana nifindrafindra toerana,ny rahalahy mahatoky nitsidika ireo kongregasiona kosa dia mendrika ny horaisina toy ny vavolombelona mahatokin’i Jehovah sy ny Zanany. — Isaia 43:10-12; Asan’ny apostoly 1:6-8; II Jaona 9-11.
13. a) Tamin’ny heviny ahoana ireny kristiana mpitety faritany ireny no “tsy naka na inona na inona tamin’ny jentilisa”? b) Tamin’ny fomba ahoana no azon’ny kristiana hafa nanaovana ny tenany ho ‘mpiara-miasa amin’ny fahamarinana’?
13 Ny kristiana be zotom-po izay nifindrafindra toy izany dia “tsy naka na inona na inona tamin’ny jentilisa”. Sahala amin’ny apostoly Paoly, dia niharihary fa izy ireny dia naniry ny ‘tsy hampisy fandovam-bola ny filazantsara’, tamin’ny fanomezana enta-mavesatra ara-bola ho an’ireo izay nitoriany (I Korintiana 9:18; II Korintiana 11:7; I Tesaloniana 2:9). Koa satria ireny kristiana ireny dia niainga noho ny anaran’i Jehovah ka nitory ny “vaovao tsara” tamin’ny jentilisa tsy nisy fandoavam-bola avy tamin’izy ireny, ireo rahalahiny àry dia tokony handray tsara izay [evanjelisitra] toy izany”. Tamin’ny fanolorana ny fanampiany, ireny mpanompon’i Jehovah tia nampiantrano vahiny ireny dia nandray anjara lehibe teo amin’ny fitararan’ny kristianisma. Niseho ‘ho mpiara-miasa amin’ny fahamarinana’ izy ireny tamin’izany fomba izany. Toe-tsaina toy izany ankehitriny no manetsika ny Vavolombelon’i Jehovah.
Fanohanana mahatoky na dia ao aza ny fanoherana
14. Fanoherana inona no nitranga tao amin’ny kongregasionan’i Gaio?
14 Gaio dia nanompo tamim-pahatokiana toy ny ‘mpiara-miasa amin’ny fahamarinana’, nefa nahita fanoherana izy, satria izao no nanampin’i Jaona:
“Nanoratra tamin’ny fiangonana ihany aho; nefa Diotrefa izay te-ho lohany, dia tsy mba nandray anay. Koa amin’izany, fa mibedibedy foana manaratsy anay izy; ary tsy afa-po amin’izany ihany, fa ny tenany dia tsy mandray ireo rahalahy ireo, ary izay ta-handray az dia rarany sy roahiny hiala amin’ny fiangonana.” — II Jaona 9, 10.
15. Fihetsika manao ahoana no noraisin’i Diotrefa, ary inona no azontsika lazaina ny amin’izay rehetra mihambo ho kristiana ka manahaka azy ankehitriny?
15 Efa nanoratra “ihany” tamin’ny kongregasiona i Jaona, nefa Diotrefa, lehilahy mpieboebo iray, dia tsy nandray tamim-panajana izay rehetra avy tamin’ilay apostoly. Raha ny marina, io kristiana niavonavona io dia “te-ho lohany” teo amin’ny rahalahy; tiany ny “ ho filoha” (Bible en fran<u481>ais courant). Io mpiavonavona io dia tsy nanahaka velively an’i Jesosy Kristy izay nilaza tamin’ny mpianany hoe: “Hianareo rehetra dia mpirahalahy avokoa. (...) Ary aza mba mety hatao hoe mpitarika hianareo, fa iray ihany no Mpitarika anareo, dia Kristy.” (Matio 23:8-12). Koa satria “ny fiandranandran’ny maso sy ny fiavonavonan’ny fo, (...) dia ota”, ary ‘ny mpiavonavona fantatr’i Jehovah eny lavitra eny’, dia miharihary tokoa fa izay kristiana anarana rehetra hanahaka an’i Diotrefa amin’izao andro izao, dia tsy hanana fifandraisana akaiky dia akaiky mihitsy amin’Andriamanitra. — Ohabolana 21:4; Salamo 138:6.
16. a) Inona no fihetsik’i Diotrefa teo anoloan’i Jaona? b) Lesona inona no azon’ny kristiana tsoahina avy amin’izany ankehitriny?
16 Tamin’ny tsy fandraisana tamim-panajana izay rehetra avy tamin’i Jaona, Diotrefa dia nikomy tamin’ny fahefana noraisin’ilay apostoly avy tamin’Andriamanitra. Noho izany no nanoratan’i Jaona fa raha tonga ao amin’io kongregasiona io izy dia ‘hotsarovany’ ny asa ratsiny sy ny tenin’i Diotrefa. Izy dia ‘ nibedibedy foana nanaratsy’ an’i Jaona; nanendrikendrika apostoly iray, izay anisan’ny vato fanorenan’i Jerosalema Vaovao any an-danitra izy (Apokalypsy 21:2, 14). Tsy ho afa-maina amin’ny fanaovana toy izany izy, tahaka ireo izay mihambo ho kristiana ankehitriny, nefa manendrikendrika ny rahalahiny sy manamavo ny fahefana naorin’Andriamanitra, ka tsy mibebaka, dia tsy afaka hanantena handositra ny fanamelohan’Andriamanitra. — Levitikosy 19:16; Joda 8-13.
17. Meloka ny amin’inona koa moa Diotrefa?
17 Ankoatr’izany, Diotrefa dia nanda koa ny fampiantranoana ireo rahalahy be zotom-po nitsidika ny kongregasiona. Raha ny marina, dia nanandrana nandrara ny kristiana hafa tsy handray ireny evanjelisitra mpitety faritany ireny mihitsy aza izy. Mbola ratsy kokoa aza fa nanandrana nandroaka ny kristiana mpampiantrano vahiny sy be fitiavana tsy ho ao amin’ny kongregasiona tamin’ny fomba tsy marina izy. Nefa na dia tao aza ny fanoherana toy izany, ny kristiana mahatoky dia nanohy nanohana tamin-kerim-po ny fitoriana ny Fanjakana.
Tahafo ny tsara
18. Araka ny III Jaona 11, 12, inona no nolazain’i Jaona tamin’i Gaio, ary nahoana?
18 Raha toa tsy niova Diotrefa dia nety ho voaroaka tsy ho ao amin’ny kongregasiona ny tenany tamin’ny faran. Kanefa izay kristiana mahatoky rehetra dia tokony hanao zavatra mifanaraka amin’ireto tenin’i Jaona izay nalefany ho an’i Gaio avy eo:
“Ry malala, aza ny ratsy no alain-tahaka, fa ny tsara. Izay manao ny tsara no avy amin’Andriamanitra; fa izay manao ny ratsy tsy mba nahita an’Andriamanitra. Demetrio dia tsara laza amin’ny olona rehetra sy amin’ny fahamarinana koa; ary izahay koa manambara izany, ary fantatrao fa marina ny fanambaranay.” — II Jaona 11, 12.
19. Inona no hevitry ny hoe ‘manahaka tsara’?
19 Jaona dia namporisika an’i Gaio mba ‘haka tahaka ny tsara, fa tsy ny ratsy’, ny dikan’izany dia fankahalana ny ratsy sy fifikirana amin’izay tsara (Salamo 97:10; Romana 12:9). Izany dia tena zava-dehibe tokoa, satria “izay manao ny tsara no avy amin’Andriamanitra”. — I Jaona 3:4-12.
20. Amin’ny fomba ahoana no ‘ahitan’ny’ mpanompon’i Jehovah eto an-tany azy?
20 Raha nanonona fahamarinana lalina iray ilay apostoly dia nanampy izao: “Izay manao ny ratsy tsy mba nahita an’Andriamanitra”. Amin’ny alalan’ny fitsanganana ho amin’ny fiainana ara-panahy, ny kristiana mahatoky voahosotry ny fanahy dia afaka manantena ny hahita an’Andriamanitra sy Kristy. Nefa ny mpanompon’i Jehovah eto an-tany dia ‘mahita’ azy koa amin’ny heviny hoe mahita ny asa ataony ho azy ireo. ‘Mahita an’Andriamanitra amin’ny ‘mason’ny fo’ izy ireo. (Efesiana 1:18, MN; Eksodosy 33:20; Joba 19:26, MN.) Amin’ny alalan’ny karazam-pandrenesana izay mahafaoka ny saina sy ny fo, dia tonga amin’ny fahalalana marina an’i Jehovah izy ireo, amin’ny maha-mpanompony izay mankasitraka ny toetrany lehibe, toy ny fitiavana tsy misy fetra nasehony tamin’ny fanolorana ny Zanany lahy tokana ho tombontsoan’n taranak’olombelona. — Jaona 3:16.
21. a) Iza moa Demetrio? b) Amin’ny heviny ahoana izy no nahazo ‘laza tsara (...) avy amin’ny fahamarinana koa’?
21 Raha nasaina ‘haka tahaka ny tsara’ i Gaio, Demetrio kosa dia nanao ny tsara. Azo inoana fa anisan’ireo rahalahy nitsidika ireo kongregasiona izy, angamba aza mpiandraikitra tao amin’io antokon’olona mpitory na misionera io mihitsy (jereo II Korintiana 8:16-24). Nety tsy dia nahafantatra loatra an’i Demetrio i Gaio, angamba aza tsy nahafantatra azy mihitsy, nefa ny kristiana hafa dia niresaka tsara ny aminy, ary nahazo ‘laza (...) ny amin’ny fahamarinana koa’ izy. Ny fanambarana tsara nataon’ny rahalahy ny amin’i Demetrio dia voaporofon’ny fitondrantenany tia fivavahana, satria nanana fiainana nifanaraka tamin’ireo fepetra takin’i Jehovah izy ka ‘niainany ny fahamarinana’. Tamin’izany fomba izany koa no nanaovan’ “ny fahamarinana” fanambarana ny amin’i Demetrio. Ny apostoly Jaona koa dia nanao fanambarana ny amin’i Demetrio, ary fantatr’i Gaio fa marina izany (jereo Jaona 19:35; 21:24). Na dia teo aza ny fanoheran’i Diotrefa, ny mpitorin’ny Fanjakana mpitety faritany àry dia noraisin’i Gaio sy ireo ‘mpiara-miasa amin’ny fahamarinana’ nahatoky hafa tamin’ny fomba tsara.
Voamarika eo amin’ireo mpiara-miasa kristiana ny fitiavana
22. Toy izay hanoratra lava be, inona no nantenain’i Jaona hatao?
22 Ny fiafaran’ny taratasin’i Jaona ho an’i Gaio dia mampiseho miharihary ny fitiavana nisy teo amin’ny ‘mpiara-miasa amin’ny fahamarinana’. Hoy izy:
“Nanana zavatra maro hosoratana aho, nefa tsy tiako hosoratana aminao amin’ny ranomainty sy ny penina; fa manantena hahita anao faingana aho, dia hiteny mifanatrika isika. Ho aminao anie ny fiadanana, Ry sakaiza aty manao veloma anao. Veloma amin’ny sakaiza tsirairay araka ny anarany avy.” (III Jaona 13, 14).
Jaona àry dia nanan-javatra betsaka holazaina tamin’i Gaio, nefa tsy naniry hanoratra lava kokoa ho azy izy. Ilay apostoly dia ‘nanantena hahita [an’i Gaio] mivantana’ na “faingana”. (Kingdom Interlinear Translation) Ho afaka hiresaka “mifanatrika” na ‘manokana’ izy ireo. — Bible en fran<u481>ais courant.
23. a) Inona no tian’i Jaona hotenenina rehefa nirary ny hahitan’i Gaio sakaizany fiadanana izy? b) Ao amin’ny famaranana ny taratasiny fahatelo, amin’ny fomba ahoana no iresahan’ilay apostoly ny amin’ireo rahalahiny Malala?
23 Teo am-piandrasana, Jaona dia naniry tamim-pahatsorana ny hahitan’i Gaio fiadanana — ny fahatoniana azo avy amin’ny fifandraisana akaiky amin’i Jehovah, ny filaminana izay mandroaka ny tebiteby ary mampitony ny saina sy ny fo (Filipiana 4:6, 7). Farany, ho famaranana, ilay apostoly dia nandefa ho an’i Gaio ny fiarahaban’ireo “sakaiza”, izany hoe ireo mpino malala hafa, tahaka ny fanaon’ny Vavolombelon’i Jehovah matetika tokoa amin’izao andro izao (jereo Jaona 15:13, 14). Fantatr’i Jaona tsara tokoa ny mpikambana tao amin’ilay kongregasiona teo an-toerana matoa izy nangataka an’i Gaio mba hampita amin’izy ireo ny fiarahabany “araka ny anarany avy”.
Manohiza manompo amim-pahatokiana
24, 25. Araka ny taratasy faharoa sy fahatelo nosoratan’i Jaona, inona no ilain’ny Vavolombelon’i Jehovah, ary mahazo famporisihana hanao inona izy amin’ny alalan’ireo taratasy roa ireo?
24 Tsy azo lavina fa ny taratasy faharoa sy fahatelon’i Jaona azo tamin’ny tsindrimandrin’Andriamanitra dia mampiseho amin-kery amin’ireo kristiana amin’ izao androntsika izao ny ilàna hifankatia, handa ny fivadiham-pinoana, hifikitra amin’ny fahamarinana sy hiasa ho tombontsoan’ny fanompoam-pivavahana marina. Noho izany, isika Vavolombelon’i Jehovah dia tapa-kevitra ny hitoetra ho mahatoky amin’ny fahamarinana ao amin’ny Baiboly raha mbola mihira fiderana ny Raintsika isika, dia aoka hotorintsika ny vaovao tsaran’ny Fanjakana ary aoka hampahafantarintsika ny anjara lehibe raisin’i Jesosy Kristy ao amin’ny fikasan’Andriamanitra ho fitahiana ny olombelona.
25 Ny finoana ananantsika Vavolombelon’i Jehovah dia azo inoana fa ho azon’ny fisedrana maro amin’izao “andro farany” sarotra izao (II Timoty 3:1-5). Nefa ny torohevitra tsaran’ny apostoly Jaona dia hanampy antsika hanohy ‘ handeha amin’ny fahamarinana’, hanao azy ho fomba fiainantsika. Enga anie isika àry hanahaka tsara, hanao izay betsaka indrindra amin’ny fampandrosoana ny tombontsoan’ilay Fanjakana sy hanohy hanompo miaraka amim-pahatokiana toy ny ‘mpiara-miasa amin’ny fahamarinana’. Izany rehetra izany dia ho voninahitr’i Jehovah, ilay Andriamanitry ny fahamarinana!
Afaka mamaly ve ianao?
□ “Asa mahatoky” inona no nataon’i Gaio ho an’ny rahalahiny mpino?
□ Lesona inona no azontsika tsoahina avy amin’ny fihetsika ratsin’i Diotrefa?
□ Amin’ny fomba ahoana no azontsika anompoana amim-pahatokiana toy ny ‘mpiara-miasa amin’ny fahamarinana’, sahala amin’i Gaio?
[Sary, pejy 27]
Nanao “asa mahatoky” i Gaio tamin’ny fanehoana fitiavana mampiantrano vahiny tamin’ireo rahalahiny nitsidika ny kongregasiona.
[Sary, pejy 29]
Sahala amin’ireo kristiana tamin’ny taonjato voalohany, ny Vavolombelon’i Jehovah dia miara-manompo amim-pahatokiana amin’ny maha-‘mpiara-miasa amin’ny fahamarinana’.