Ilay soavaly maintin’ny mosary

“ARY hitako fa, indro, nisy soavaly mainty: ary izay nitaingina azy dia nitondra mizana teny an-tànany. Ary nahare aho, ka toa nisy feo teo afovoan’ny zava-manan-aina efatra nanao hoe: Venty ny vary tritika eran’ny fatam-bary kely, ary venty koa ny vary hordea intelon’ny fatam-bary; ary aza manimba ny diloilo na ny divay hianao.” — Apokalypsy 6:5, 6.

Tamin’ireo teny mampatahotra ireo no nilazan’ ny apostoly Jaona ny fahatelo tamin’ireo mpitaingin-tsoavaly efatry ny Apokalypsy, dia ilay mitaingina ny soavaly maintin’ny mosarya. Efa mba nanontany tena ve ianao hoe oviana io olo-malaza io no nanomboka ny dia an-tsoavaly maheriny? Tokony ho fantatrao izany. Raha ny marina, ny fisehoany dia mahaforona ny fanambarana ny fikorontanana lehibe indrindra izay tsy mbola hitan’ny tany mihitsy.

Misy olona sasantsasany mihevitra fa io mpitaingin-tsoavaly io dia efa nandringana ny olombelona foana. Zavatra tsy maintsy hataontsika àry ny mahafantatra fa ny tantara dia mamoaka fitantarana maro izay nandraisan’ny mosary anjara, nanomboka tamin’ny andron’i Abrahama sy Josefa ka hatramin’ny tsy fahampian-kanina lehibe indrindra fantatra, dia ilay namely an’i Chine tamin’ny 1878 sy 1879 (Genesisy 12:10; 41:54). Arak any fanombantombanana dia Sinoa teo amin’ny 9 ka hatramin’ny 13 tapitrisa no maty tamin’io loza io.

Kanefa, ilay soavaly mainty sy ny mpitaingina azy dia tsy tompon’andraikitra tamin’ny tsy fahampian-kanina rehetra teo amin’ny Tantara. Nahoana àry? Satria, tao amin’ny fahitany, Jaona dia efa nahita ny soavaly mena mpandringan’ny ady nandroso teo alohan’ izy ireo; hitany koa ny mpitaingin-tsoavaly iray nanao satroboninahitra sy nitaingina soavaly fotsy lehibe sady tsara. Ary io mpitaingin-tsoavaly io dia tsy iza fa i Jesosy Kristy izay, taoriana kelin’ny nandraisany ny fiandrianana dia nivoaka “ ka naharesy sady mbola haharesy.” (Apokalypsy 6:1,2.) Hatramin’izay, ilay soavaly mainty niriotra sy ny mpitaingina azy dia nampiseho ireo tsy fahampian-kanina izay mamely ny tany hatramin’ny nanaovana an’i Jesosy ho Mpanjakan’ny Fanjakan’Andriamanitra.

Afa-tsy izany, ny fahitana ny amin’ireo mpitaingin-tsoavalin’ny Apokalypsy dia azo ampitahaina amin’ny faminaniana nataon’ny tenan’i Jesosy mihitsy. Indray andro tokoa izy dia nanome fitantarana tamin’ny antsipiriany ireo toe-javatra hanjaka eto ambonin’ny tany rehefa hanatrika amin’ny fomba tsy hita maso amin’ny maha-Mpanjaka any an-danitra izy. Toy izao indrindra no nolazainy: “Fa hisy firenena hitsangana hamely fanjakana; ary hisy mosary sy horohorontany amin’ny tany samy hafa.” — Matio 24:3, 7.

Oviana io famantarana io no nitranga? Tamin’ny fotoana toy inona ilay mpitaingin-tsoavaly mahaliana antsika no nanomboka namakivaky ny tany ka namafy hanoanana tamin’izay nolalovany? Efa hatramin’ny taona maro izay, ny vavolombelon’i Jehovah dia manambara fa ny taranaka nahita maso ny zava-nitranga tamin’ny 1914 ihany ho hany vavolombelon’i fandravana nentiny. Marina ve ny fandraisana hevitry ny faminaniana nataon’izy ireo?

‘Tsy isalasalana fa tsia, hoy angamba ny filazan’ny sasany. Hevero ange fa ny tany dia mahavokatra sakafo betsaka kokoa hatrany ihany noho ny teo aloha noho ny fambolena araka ny toetr’andro. Ary koa, misy ireo fikambanana naorina manokana an’ny Firenena mikambana, toy ny O.A.A. (fandaminana momba ny hanina sy ny fambolena), izay manao izay azony atao rehefa mba hahazoan’ny olona tsirairay avy sakafo ampy. Fanampin’izany koa, ny fari-piainan’ny olona dia nisondrotra tamin’ny fomba manaitra any amin’ny faritra sasany amin’ny gilaoby. Any amin’ireo firenena toa an’i Angletera izay nahitana mosary matetika vao haingana, ny tsy fahampian-tsakafo dia efa mahalana dia mahalana amin’izao fotoana izao. Tany maro no efa mihamanana antoka kokoa ankehitriny. Koa ahoana no hahafahana hanamarina fa ity taranaka misy antsika ity dia hahita fampahoriana bebe kokoa avy amin’ilay soavaly maintin’ny mosary noho ny hafa rehetra?”

Izany ka fanontaniana mahaliana. Marina aloha fa hatramin’ny tantarany rehetra, ny olombelona dia nahita tsy fahampian-kanina tokoa. Tsy hoe tsy fantatry ny apostoly Jaona sy Jesosy akory izany. Kanefa, izy roa ireo dia samy nanambara fotoana iray izay hamelezan’ny mosary mafy ny tany, amin’ny fomba tsy fahita. Amin’ahoana ireo tsy fahampian-kanina voalaza mialoha no tokony hiavaka amin’ny hafa? Fanampin’izany, raha heverina ny fitaovana ara-nofo mampiadana ananan’ny ankamaroan’ny tany ankehitriny,moa ve misy antony tokony hiheverana fa ny taranaka ankehitriny dia vavolombelon’ny tsy fahampian-kanina toy izany?

[Fanamarihana ambany pejy]