Tany ve hianao?
TSY dia lavitra loatra an’i Jonestown, ilay toerana izay nisehoan’ny famonoan-tena nalaza nahatsiravina nahafaoka olona maro, no misy ny tanàna iray antsoina hoe Matthew’Ridge. Tamin’ny taona lasa, dia nisy fitambarana kristiana fito tao izay namelona fikasana ny hanatrika ny fivoriamben’ny distrikan’ny Vavolombelon’i Jehovah mitondra ny foto-kevitra hoe: “Ny fahamarinan’ilay Fanjakana” izay tokony hatao ao Georgetown renivohitra. Eo amin’ny 45 minitra am-piaramanidina miala avy eo Georgetown fotsiny i Matthew’s Ridge, nefa ny mpikambana ao anatin’io fitambaran’olona io dia tsy afaka handoa ny saran’izany fomba fitaterana izany. Noho izany dia nandeha an-tsambokely izy ireo. Nandaniany fotoana fito andro ny dian’izy ireo.
Moa ve ianao nanatrika ny iray tamin’ireo fivoriamben’ny distrika an-jatony maro “Ny fahamarinan’ilay Fanjakana” nalamina maneran-tany tamin’iny taona lasa iny? Raha eny, ianao dia iray tamin’ireo mpanatrika maherin’ny efatra tapitrisa izay ny ankamaroany dia tsy maintsy nisetra zava-nisakana maro mba hahafahana ho tonga tamin’izany.
Nilaina ny fikirizan’izy ireo
Ny sasany dia nila fikirizana ampy tsara mba hahatongavana. Raha ny amin’ny fikirizanay, i Al, izay monina ao amin’ny tanàna breziliana ao Maceio, dia tena manana izany. Koa satria izy malemy, dia tsy afaka ny hitondra miaraka aminy ny seza mikorisany ao anaty aotobisy hatrany amin’ny kianja. Koa tsy maintsy nandady tamin’ny tany izy ary, raha vao teo amin’ilay toerana, dia nananika tamin’ireo ambaratongam-piakarana hatreny amin’ny fitoerany. Kanefa dia tapa-kevitra ny tsy ho diso ny fivoriambe izy.
Ny hafa indray dia nanolo-tena hanao asa miaraka. Ny anabavy japonezy iray dia niomankomana hanatrika ny fivoriambe raha nisy rivo-doza nifofofofo tampoka ka nanipy tamin’ny tany ireo voankazo poara rehetra tao amin’ny saham-boankazom-pianakaviana. Tonga nanampy io anabavy io hanangona ireo voankazo ny Vavolombelona tao amin’ny kongregasiona nisy azy mbamin’ny zanak’izy ireo, ary avy eo dia nivarotra izany. Vita tsara ara-potoana avokoa ny zavatra rehetra, hany ka tsy nananosarotra mihitsy ny vadiny tsy mpino mba hamelana azy hanatrika ny fivoriambe.
Ny hafa indray koa dia nampiseho fa nankasitraka hatramin’ny fara tampony an’ireny fivoriambe ireny izy. Ny kristiana iray tao Brésil dia vao avy namoy ny vadiny dimy andro talohan’ny fivoriambe. Na dia teo aza izany fitsapana mahatsiravina izany, dia tonga tany amin’ny fivoriambe izy niaraka tamin’ireo zanany kely telo. Ny fiaraham-pirahalahiana sy ireo torohevitra nomena tany dia nanampy azy sy ny fianakaviany hiaritra ny fandonana ara-pihetseham-po mafy izay namely azy ireo.
Nahoana ireo rehetra ireo sy ny an-tapitrisany maro hafa no nanapa-kevitra ny tsy hamela na inona na inona hanakana azy ireo tsy ho tonga tamin’ireo fivoriamben’ny distrika “Ny fahamarinan’ilay Fanjakan” tamin’iny taona lasa iny? Raha efa nanatrika ny iray tamin’ireny fivoriamben’ny Vavolombelon’i Jehovah ireny ianao, dia fantatrao ny antony. Voalohany indrindra, izy ireny dia manolotra ny hany fotoana hifankahitana indray miaraka amin’ny kristiana maro hafa (Salamo 133:1). Ny solontena iray tany amin’ny fivoriambe tany Nouvelle-Calédonie, any amin’ny ranomasina Atsimo, dia nanao izao fanamarihana izao: “Ny firaisan-tsain’ny vahoakan’Andriamanitra dia voalaza ao amin’ny Baiboly, ary miharihary indrindra izany mandritra ny fivoriambe.” Fanampin’izany, ny fampianarana izay omena any dia tena mendrika ny fitandremantsika rehetra.
‘Manohina ny fo izy ireny’
Nanomboka tamin’ny teny firarian-tsoa nataon’ny prezidà ny andro voalohany, ka hatramin’ny lahateny famaranana ny alahady, ny fandaharana dia nirakitra fitantarana zava-niseho maro be hita teny am-pitoriana nampahery, fifanakalozan-kevitra mahasoa sy torohevitra azo ampiharina.
Ny zoma maraina, ireo mpanatrika dia nanana fifaliana nifankahalala tamin’ny “mpikambana efa ela” sasany. Araka izany, tao Sidney, any Aostralia, izy ireo dia nihaino an’i Geordie Gibb, 85 taona, izay vita batisa tamin’ny 1927 ary manompo amin’ny maha-anisan’ny mpikambana ao amin’ny sampana aostraliana nanomboka tamin’ny 1929. Misy saika hatraiza hatraiza maneran-tany, olona sahala amin’i Geordie izay manana fiainana lany manontolo tamin’ny asa mahatoky vitan’izy ireo. Ireo fivoriamben’ny distrika tamin’ny 1982 dia nanome fahafahana mahafinaritra hihaona tamin’ny sasantsasany amin’izy ireny.
Nahitana fahombiazana betsaka ireo lahateny, indrindra fa ireo izay nanala sarona ny fandrika sasany. Rehefa avy nihaino ny foto-kevitra hoe “Mitandrema tena amin’ny mozika mampietry” i Ana, zazavavy breziliana, dia nilaza toy izao: “Nanana kapila maromaro aho izay ny tonon-kirany dia tsy ahitana na inona na inona manorina tsara. Kanefa notehirizinay izy ireny satria tianay ny feony. Rehefa avy nihaino ny lahateny izahay, dia tapa-kevitra ny hanaisotra azy ireny.”
Barbara kosa, tany amin’ny fivoriambe tany Hawaii, dia nilaza fa niombon-kevitra tanteraka tamin’ireo fampitandremana nomena tamin’ilay foto-kevitra hoe “Aoka isika hanala sarona ireo fikasana feno fitaky ny Devoly”. Ankoatra ny zavatra hafa, iny lahateny iny dia nirakitra fampitandremana amin’ireo fandaharana sasany amin’ny televiziona. Noho izy mpijery mafana fo ireo tantara mitohy ao amin’ny televiziona, dia takatr’i Barbara fa ireny fandaharana ireny dia nanadombo ny fahatsapany izay tsara sy izay ratsy. “Eny, fa na dia ‘ireo tovolahy tsara’ aza dia nandainga sy nanao faharatsiam-pitondrantena, hoy ny nambarany, ary izaho dia vao avy niara-niombon-kevitra tamin’izy ireo ny amin’ny fomba fijery ny fiainana.” (I Korintiana 15:33). Ny fianakaviana iray avy any Corée dia nanangom-bola mba hahafahana hividy televiziona miloko iray. Rehefa avy nihaino ireny lahateny ireny sy ny maro hafa koa tao amin[‘ny fivoriambe ireo mpianakavy ireo dia namela ny fikasan’izy ireo. Tsy ho tiany intsony ny handany ny volany amin’ny zavatra iray izay hitondra ho ao aminy ny hery mitaonan’i Satana.
Ireo fampisehoana tantara nampihetsi-po dia mahaforona ny sasantsasany amin’ireo fotoana lehibe tamin’ireo fivoriamben’ny Vavolombelon’i Jehovah rehetra. Izy ireny dia nampiseho an-tsehatra tarehin-javatra tamin’ny lasa na amin’izao androntsika izao izay misy heviny tokoa ho an’ireo kristiana ankehitriny. Nandritra ny fampisehoana manao hoe “Lehilahy iray tsy nanan-tahotra nitory hafatra iray tsy tiam-bahoaka”, ireo mpijery dia niray fihetseham-po tamin’i Jeremia. Ary maro no voatohina tamin’ilay fampisehoana hoe “Ataony ahoana no fandre raha tsy misy mpitory?” Izany dia tantara notsoahina avy amin’ny toe-javatra maro niainan’i Maxime Satisfait. Hita tamin’izany i Maxime Satisfait nanohitra ny hitorian’ny zanany lahy ny vaovao tsara, ary tonga hatramin’ny fandroahana azy hiala tao an-tranony. Nanaraka izany, taona maro taty aoriana, ny zafikeliny dia nanampy azy hanova ny toe-pony tamin’ny fitarihana ny sainy ho amin’ny anaran’Andriamanitra hoe Jehovah, voarakitra ao amin’ny Salamo 83:18.
“Manana Maxime Satisfait iray izahay ao amin’ny fianakavianay”, hoy ny naborak’i Loïs, ao amin’ny fianakaviana Bahamas, rehefa namisavisa tamim-pahasambarana ireo fiovana teo amin’ny fihetsiky ny vadiny izy. Ilay fampisehoana tantara ara-Baiboly dia niharihary ho loharanom-pampaherezana lehibe tokoa tany Corée izay ahitana vehivavy kristiana maro manambady manohitra.
Ny vanim-potoana hafa iray voamarika amin’ny fivoriamben’ny distrika rehetra ataon’ny Vavolombelon’i Jehovah koa dia ny an’ny batisa. Tamin’ny fivoriambe “Ny fahamarinan’ilay Fanjakana”, dia kristiana an’aliny maro no naneho ny fanoloran-tenany ho an’i Jehovah tamin’ny fanaovana batisa ampahibemaso tao anaty rano. Ho an’ny ankamaroan’izy ireny, izany dingana izany dia nilana fiezahana be. Ny vehivavy iray 23 taona izay natao batisa tany Japon, ohatra, dia efa bevohoka tsy nanambady ary efa nifoka sigara 40 ka hatramin’ny 50 isan’andro. Nitaky fanaovana fiovana betsaka taminy izany alohan’ny hanaovana batisa, nefa, noho ny fanampian’i Jehovah, dia tonga tamin’izany izy ary, rehefa nanambady ny rain’ny zanany izy dia manana fiainana madio sy tsara ankehitriny.
Mbola nisy fotoana lehibe hafa ihany koa. Tsaroanao ve ny famporisihana vokatry ny famoahana ilay boky mahafinaritra hoe Vous pouvez vivre éternellement sur une terre qui deviendra un paradis, ny an’ilay bokikely hoe Vivez éternellement heureux sur la terre! na ilay taratasy mivalona hoe Har-Maguédon est-il proche?
Angamba ianao anisan’ireo olona izay, ny zoma hariva, dia nahazo ny fitsidihan’ireo Vavolombelona tonga mba hametraka tamin’ilay taratasy mivalona tamin’ny mponina tao amin’ny tanàna nanaovana ny fivoriambe. Maro be tamin’ireny olona ireny no tena nihetsi-po tokoa, sahala amin’ity zazalahy tanora iray tany Kalgoorlie, any Aostralia Andrefana, izay tena taitra tamin’ny resadresaka nifanaovany tamin’ny solontenan’ny fivoriambe anankiroa, hany ka nanapa-kevitra koa izy mba ho tonga any amin’ny fivoriambe.
Any amin’ny tany sasany, ireo mpanatrika dia nahazo fitahiana hafa ihany koa rehefa nivoaka ireo zavatra vita an-tsoratra mahakasika izay ilain’izy ireo manokana. Tany Japon, dia safononoky ny hafaliana izy ireny tamin’ny fahafantarana ny fivoahan’ny Soratra Masina — Fandikan-tenin’izao tontolo izao vaovao amin’ny fiteny japonezy manontolo. “Tsy afaka nanakimpy ny masoko aho tamin’ny alina”, hoy ny nambaran’ny mpanatrika iray faly, izay nahazo ny anjarany tamin’io Baiboly io.
“Tena nanohina ny fo marina tokoa ireo lahateny tamin’ity fivoriambe ity”, hoy ny nambaran’ny solontena “hawaiien” iray. Na dia ireo olona tsy Vavolombelona aza dia nitovy fomba fijery toy izany. “Vao voalohany teo amin’ny fiainako aho izao no nandre lahateny izay milaza hevi-dehibe tokoa”, hoy ny fiaiken’ny mpikambana iray tao amin’ny fitambarana mpanao politika iray izay nanatrika ny fivoriambe iray natao tany Bresil.
Ary vao haingana... “Tafaray noho ilay Fanjakana”!
Eny, nahitana fahombiazana voamarika tokoa ireo fivoriambe “Ny fahamarinan’ilay Fanjakana”. Nanampy olona an-tapitrisany maro izy ireny. Raha tany ianao, dia tsy isalasalana fa nandray tombontsoa lehibe tokoa. Ary raha mifanohitra amin’izany? Tsy mbola diso anjara akory. Tamin’ity taona ity indray ny Vavolombelon’i Jehovah dia nanao fitohitohiza-pivoriambe vaovao maneran-tany, nitondra ny foto-kevitra hoe “Tafaray noho ilay Fanjakana”.
Tamin’ity taona ity ihany koa, dia tao anatin’ny fandaharana ny fampisehoana tantara ara-baiboly, ny lahateny mampiorina sy ireo fampisehoana isan-karazany ary koa torohevitra nifanentana ary nisy zava-baovao tsy nampoizina ihany koa! Tianay indrindra ny hilaza ny maha-izy manokana an’ireny fivoriamben’ny distrika ireny, izay hahatonga azy tsy ho hay hadinoina. Raha tany ianao nandritra ny fivoriambe tamin’ny 1982, dia mino mafy izahay fa tsy ho tianao ny hanapaka na dia iray aza amin’ireo andro efatra. Raha tsy tany kosa ianao, dia manàna fanapahan-kevitra ny hanatrika izany amin’ny manaraka. Iza no mahita raha toa ka any no mety handanianao ny fotoana tsara indrindra ao anatin’ny taona?
[Sary, pejy 23]
Tany amin’ny fivoriambe tany Sâo Paulo, any Brésil, dia nisy Vavolombelona vaovao 626 natao batisa.
[Sary, pejy 24]
Io zazalahy kely io dia tany amin’ny fivoriambe “Ny fahamarinan’ilay Fanjakana” natao tany Kalgoorlie, any Aostralia Andrefana, tamin’ny 23 ka hatramin’ny 26 septambra 1982.