Omany ny ho avinao miaraka amin’ny fandaminan’i Jehovah
“Fa matahora an’i Jehovah mandritra ny andro; fa raha mbola hisy koa ny farany [ho avy, MN], dia tsy ho foana ny fanantenanao.” — OHABOLANA 23:17, 18.
1, 2. Ankoatra ny zavatra hafa, inona no hitan’ny apostoly Jaona tany amin’ny faramparan’ny taonjato voalohany amin’ny fanisan-taona iraisana?
JEHOVAH dia mampiharihary ireo zavatra hiseho amin’ny ho avy amin’ny mpanompony, ka izany dia mahatonga an’ireo ho afaka hiasa amim-pahendrena (Isaia 42:9). Araka izany, tany amin’ny faramparan’ny taonjato voalohany amin’ny fanisan-taona iraisana, dia nomeny fahitana ho avy mendrika hantenaina ny apostoly Jaona efa zokiolona. Afaka midera tena isika ny amin’ny nanamarinan’i Jaona “ny zavatra rehetra izay efa hitany” tamin’ny fitantarana izany ao amin’ny bokin’ny Apokalypsy ao amin’ny Baiboly. — Apokalypsy 1:1, 2.
2 Ankoatra ny zavatra hafa, Jaona dia nahita “anjely efatra” nitana ny “rivotra” mpandringana izay hiteraka ny “fahoriana lehibe”. Fotoana toy inona no tokony hisakanan’izy ireo izany tsy hipoaka? Nilaza tamin’izy ireo toy izao ny anjely fahadimy: “Aza manimba ny tany, na ny ranomasina, na ny hazo, mandra-panisinay tombo-kase eo amin’ny handrin’ny mpanompon’Andriamanitra.” — Apokalypsy 7:1-3, 14; Matio 24:21, 22.
3. Alohan’ny handravan’ny “rivotra” mpandringana ny fandaminan’i Satana, inona no tokony hitranga? Ahoana no anaovana an’io asa io?
3 Rehefa halefa izany “rivotra” izany dia handrava ny fandaminan’i Satana Devoly eto an-tany ka hanafoana azy tanteraka (jereo Jeremia 25:32, 33). Alohan’izany anefa dia tokony hasiana “tombo-kase” ny sisa amin’ireo kristiana voahosotra voantso hanjaka any an-danitra miaraka amin’i Jesosy Kristy. Marina tokoa fa ireny “mpanompon’Andriamanitsika” ireny dia mandray ‘eo amin’ny handriny’ ny tombo-kasen’ny fanahy masina, dia ny hery miasa omen’Andriamanitra ireo kristiana mitafy hosotra ho antoky ny fandovany ny lanitra (II Korintiana 1:21, 22; Efesiana 1:12-14). Noho ny fitoriana ny vaovao tsaran’ny Fanjakan’Andriamanitra no ahavitan’ny fanangonana ireny “olom-boafidy” ireny ‘aty am-parany’. — Mika 4:1; Matio 24:14, 31.
4. Amin’ny farany, “mpanompon’Andriamanitsika” firy no ho voaisy tombo-kase tsy azo ovana? Amin’ny andinin-teny inona ao amin’ny Soratra masina no anorenanao ny valinteninao?
4 Amin’ny farany, “mpanompon’Andriamanitsika” firy no ho voaisy tombo-kase tsy azo ovana? Jaona izay anisan’izy ireny dia nampita ny valin’io fanontaniana io tamim-pahatokiana rehefa nanoratra toy izao: “Ary nahare ny isan’izay voaisy tombo-kase aho: efatra arivo amby efatra alina amby iray hetsy.” Ireo dia mahaforona “ny Isiraelin’Andriamanitra”, dia firenena ara-panahy iray voaforon’ny foko 12 misy mpikambana 12 000 avy (Apokalypsy 7:4-8; Galatiana 6:16). Fandaminana re izany! Eo ambany fitarihan’i Jesosy Kristy Mpanjaka, ireo 144 000 dia ho tonga “fanjakana sy mpisorona ho an’Andriamanitsika (...) ary manjaka [hanjaka, MN] ambonin’ny tany”. — Apokalypsy 5:10; 14:1-4.
5. a) Iza no niaraka tamin’ny sisa amin’ny Isiraely ara-panahy? b) Mahaforona inona izay rehetra matahotra an’i Jehovah? Araka ny Ohabolana 23:17, 18, inona no misy ho azy ireo?
5 Rehefa avy nandinika ny Isiraely ara-panahy ny apostoly Jaona dia nahatsinjo “olona betsaka”, ary nanontany tena hoe iza ireo. Izao no fanazavana nomena azy: “Ireo no avy tamin’ny fahoriana lehibe, ary ny akanjony nosasany sy nofotsiany tamin’ny ran’ny Zanak’ondry.” Ireo anisan’izany olona betsaka izany dia ny vahoakan’ilay Fanjakana eto an-tany. Araka ny filazan’ny faminaniana, “ny Zanak’ondry”, Jesosy Kristy, dia tokony hitarika azy ireny “ho amin’ny loharanon’ny ranon’aina” — fiainana mandrakizay eo amin’ny tany paradisa (Apokalypsy 7:9, 14, 17; Lioka 23:43, MN). Dieny izao, ireny “ondry hafa” ireny dia mahaforona “andiany iray” ihany amin’ny sisa amin’ireo mpandova ny Fanjakana. Ireny olona rehetra ireny izay matahotra an’i Jehovah dia mahaforona ny fandaminany eto an-tany (Jaona 10:16). Amin’ny tsy fivadihana aminy hatrany, izy ireo dia manomana ho avy sambatra ho an’ny tenany, satria izao no voasoratra: “Fa matahora an’i Jehovah mandritra ny andro; fa raha mbola hisy koa ny farany [ho avy, MN], dia tsy ho foana ny fanantenanao.” — Ohabolana 23:17, 18.
Tsy manana ho avy intsony ny fandehan-javatra ankehitriny
6. Aiza ho aiza isika izao amin’ny fandehan’ny fotoana?
6 Efa lasa lavitra dia lavitra isika amin’ny “andro farany” ho an’ny fandehan-javatra ratsy ankehitriny (II Timoty 3:1-5). Ny fandaharan-taonan’ny Baiboly sy ny zava-miseho eo amin’izao tontolo izao dia mifanaraka mba hanaporofo fa nanomboka nanjaka tany an-danitra Kristy tamin’ny fararanon’ny 1914 (Salamo 110:1, 2). Isan’andro, ny filazam-baovao dia manamarina fa ny “famantarana” misy zavatra maro loha ny ‘fanatrehan’i Jesosy’ sy ny fifaranan’izao fandehan-javatra izao dia tena ao (Matio toko faha-24 sy 25). Marina fa efa mandroso fahanterana ny “taranaka” niaina tamin’ny fanorenana ilay Fanjakana tamin’ny 1914. Araka ny nampisehoan’i Jesosy azy anefa, dia “tsy mba ho lany” izany alohan’ny “fahoriana lehibe” izay hamarana izao tontolo izao ankehitriny, izao fitambaran’olona tsy marina izao izay “mipetraka eo amin’ilay ratsy”, dia Satana. Rahoviana no hitranga izany fiovana izany? Tsy isalasalana mihitsy fa tsy ho ela, satria efa eo amin’ny toerany hatramin’ny 70 taona ilay Fanjakana. — Matio 24:21, 34; I Jaona 5:19.
7. a) Inona no hitranga eo amin’ny tapany voalohany amin’ny “fahoriana lehibe”? b) Inona no hitranga aoriana kelin’ny fandravana ny fivavahan-diso?
7 Hipoaka tampoka amin’ny fomba mahagaga ny “fahoriana lehibe” (Matio 24:36-44). Eo amin’ny tapany voalohany amin’io fikorontanana io, dia hamely an’i “Babylona Lehibe”, empira maneran-tanin’ny fivavahan-diso, ny fandravana. Ny fanafoanana an’io tapany lehibe amin’ny fandehan-javatr’i Satana io dia tsy hoe hamela ny politika sy ny varotra tsy hiraika akory. Nohazavain’ny apostoly Jaona fa hitomany ireo “mpanjakan’ny tany” amin’ny filazana hoe: “Indrisy! indrisy! Babylona, ilay tanàna lehibe! ry ilay tanàna mafy! fa tamin’ny ora iray monja dia tonga ny fitsarana anao.” Hanao ahoana izao tontolo izao ara-barotra. Nanampy teny toy izao i Jaona: “Ary ny mpandranto amin’ny tany dia hitomany sy hisaona azy; fa tsy hisy mpividy intsony ny entany.” (Apokalypsy 18:1-19). Fotoana fohy aorian’ny handravana ny fivavahan-diso, Jesosy Kristy dia hampiasa ireo tafiny any an-danitra mba hanafoanana ny tapany sisa amin’izao fandehan-javatra ratsy izao amin’ny “adin’ilay andro lehiben’Andriamanitra Tsitoha”, ao Hara-Magedona. Manatona manao dingan-dava koa io fisehoan-javatra io. — Apokalypsy 16:14-16; 19:11-21.
8. Inona no hany fandaminana manana ho avy azo antoka? Nahoana no toy izany no izy?
8 Milaza inona izany rehetra izany ho an’ireo manana tahotra an’i Jehovah mahasoa? Milaza fa tsy manana ho avy mihitsy intsony izao tontolo izao fehezin’i Satana. Madiva hifarana ny fahavelomany mihitsy. Noho izany, dia ao anatin’ny fandaminan’i Jehovah ihany no azo anomanana ho avy mandrakizay ho an’ny tena.
9. a) Rehefa heverina amin’izay madiva hitranga, fanontaniana inona avy no tsara raha hapetratsika amin’ny tenantsika? b) Inona no torohevitra mety, hitantsika ao amin’ny I Timoty 6:17-19?
9 Rehefa heverina amin’izay madiva hitranga, moa ve ho fanehoam-pinoana na fahaiza-mitsara zavatra tsotra fotsiny aza ny fitadiavana hiantoka ny ho avin’ny tena ao anatin’ny tapany toa an’itsy na iroa amin’izao fandehan-javatra voaheloka izao? Ohatra, moa ve eo amin’izao tontolo izao misy raharaha na dia iray aza azontsika anorenana ho avy azo antoka haharitra. Miharihary tokoa fa tsy misy. Moa àry ve tsy fahendrena kokoa ny hianinana amin’ny sakafo sy ny fitafiana ary hanaovana ny tombontsoan’ilay Fanjakana ho ny voalohany amin’ny zavatra mitana ny sain’ny tena (Matio 6:33; I Timoty 6:7-12; II Timoty 2:4)? Izao torohevitra manaraka izao, avy amin’ny apostoly Paoly, dia amin’ny fotoana ilana azy indrindra amin’izao androntsika izao: “Anaro ny mpanan-karena amin’izao fiainana ankehitriny izao mba tsy hiavonavona, na hatoky ny harena miovaova, fa Andriamanitra, Izay manome antsika malalaka ny zavatra rehetra mba hifaliantsika, mba hanao soa, mba hanan-karena amin’ny asa tsara, hazoto manome sy miantra, ka dia hihary fanorenana tsara ho an’ny tenany ho amin’ny andro ho avy, mba hihazonany ny tena fiainana.” — I Timoty 6:17-19.
Omany amim-pahendrena ny ho avinao
10. Rehefa manatona ny “fahoriana lehibe”, inona no asa tokony hataontsika am-po indrindra?
10 Ireo tenin’ny apostoly ireo dia mampiseho taratry ny fifandanjana ara-panahy lehibe. Hitan’ny mpanompon’i Jehovah amin’izany ny anankiray amin’ireo tsiambaratelon’ny fahatafitana velona. Izao izany: Avelao ho amin’ny ny toerana tandrifina azy ny fananana ara-nofo, noho ny fahafantarana fa aleo ‘manan-karena amin’ny asa tsara’ toy izay hanangona “harena miovaova”. Mba hanaovana izany, dia zava-dehibe, ankoatra ny zavatra hafa, ny handraisana anjara tsy tapaka sy amin-jotom-po amin’ny fanompoana kristiana. Rehefa heverina amin’ny rahona maintin’ny “fahoriana lehibe” misavovona eny am-paravodilanitra, dia tsy isalasalana fa tsy izao no fotoana tokony hikasana hanana ho avy feno fanambinana eo amin’ny raharahan’izao tontolo izao na hikelezana aina mba hisondrotana ho eo an-tampon’ny ambaratonga ara-tsosialy. Izao kosa no ora tokony hanambarana ny vaovao tsaran’ny Fanjakan’Andriamanitra sy hampiomanana ny amin’ny loza mananontanona ny olona izay tsy manahy na inona na inona. Afa-tsy izany koa, dia Jesosy Kristy no nanendry antsika hitory sy hanao mpianatra. Amin’ny maha-Vavolombelon’i Jehovah àry, dia io asa io no tokony hataontsika am-po indrindra. — Matio 24:14; 28:19, 20; Isaia 43:10-12.
11. Tonony ny sasantsasany amin’ireo soa maharitra avy amin’ny fanompoana kristiana.
11 Ny ankamaroan’ny asa ataon’ny olona eo amin’izao tontolo izao dia hanjavona amin’ny “fahoriana lehibe”. Marina fa hipoitra indray ny sasany aminy ao anatin’ny fandehan-javatra vaovao nampanantenain’Andriamanitra. Na ahoana na ahoana, moa ve ianao mahita raharaha mitondra soa toy ny fanompoana kristiana? Ireo fandrosoana ara-panahy avy amin’ny fanatanterahana io asan’Andriamanitra io dia hahasoa indrindra ao anatin’ny fandaharan-javatra vaovao nampanantenain’Andriamanitra. Ny fifandraisana mafy mampifamatotra amin’i Jehovah rehefa mandany hery amin’ny asany dia haharitra ao anatin’io fandehan-javatra ho avy io. Ankoatr’izany, ny fahaiza-mampianatra ampitombointsika amin’ny fitoriana dia tsy isalasalana fa ho sarobidy amintsika rehefa tsy maintsy hampianatra ireo olona an-tapitrisany maro hatsangana amin’ny maty isika. — Isaia 54:13; Jaona 5:28, 29; Apokalypsy 20:12.
12. Raha manompo an’i Jehovah isika, inona no fahatsinjovan-javatra ho avy ananantsika? Inona anefa no tokony hataontsika amin’izao fotoana izao?
12 Raha toa amin’izao andro izao, ny zavatra ahintsika voalohany indrindra dia ny hahazo sitraka amin’Andriamanitra sy hanao ny sitrapony, dia tena kanto tokoa ny fahatsinjovantsika ho avy (Salamo 40:8; Romana 12:1, 2). Eny, raha mitoetra ‘ao amin’ny fahatahorana an’i Jehovah isika, dia hisy ho avy ho antsika, ary tsy ho foana ny fanantenantsika’. (Ohabolana 23:17, 18). Handova ny fiainana mandrakizay tokoa isika raha manohy mandeha eo amin’ny “làlan’aina” ao anatin’ny fahatahorana an’Andriamanitra (Salamo 16:11). Eo am-pandehanana anefa dia ilaintsika ny mametra sy manatratra ho antsika, zava-kendrena maromaro mety ao amin’ny lafiny ara-panahy.
Zava-kendrena mety
13. a) Araka ny filazan’ny Soratra masina, amin’ny heviny ahoana moa ny fanompoam-pivavahana amin’i Jehovah no asandratra hatrany? b) Inona avy moa ireo zava-kendrena efa tratran’ny lehilahy sy vehivavy an’arivony maro?
13 Ny sasany zara raha vao nanomboka niakatra eo “an-tendrombohitr’i Jehovah”. Nanomboka tamin’ny ady 1914-1918, dia tsy nitsahatra ny nasandratra ny fanompoam-pivavahana tamin’i Jehovah, izay ny “trano” na tempoly taloha dia teo amin’ny toerana avo iray tao Jerosalema. Izy io dia naorina ho “avo noho ny tampon’ny tendrombohitra” nasiana ireo fitoerana masin’ny andriamanitra sandoka. Tamin’izany heviny izany koa ny fivavahana tamin’i Jehovah no nasandratra ho “avo noho ny havoana”. Lehilahy sy vehivavy be dia be no mirohotra ho amin’io fanompoam-pivavahana mitatra io (Mika 4:1-4, MN; Isaia 2:2-4). Rehefa avy nandray fahalalana marina ny Soratra masina izy ireo dia mibebaka, miverina, manolo-tena ho an’Andriamanitra ao amin’ny vavaka sy mampiseho ampahibemaso izany amin’ny filatsahana hatao batisa amin’ny fandrobohana (Jaona 17:3; Asa. 2:38; 3:19). Izany dia samy zava-kendrena efa notratrarin’ny olona ana hetsiny maro avy amin’ny firenena rehetra mba hahafahana manompo an’i Jehovah amim-pahatokiana eo anivon’ny fandaminany eto an-tany. Faly aoka izany izy ireny manolotra fanompoam-pivavahana avo toy izany amin’ilay hany Andriamanitra marina. Ary ianao, moa ve ianao nanao izany dingana isan-karazany izany?
14. Raha efa manompo an’i Jehovah isika, tokony handroso ho amin’ny inona moa isika? Inona no azontsika atao amin’io lafiny io?
14 Rehefa miara-manompo an’i Jehovah amin’ny vahoakany isika, dia mbola ilaintsika koa ny mamboly sy mamelona fahazotoan-komana ara-panahy. Rehefa nahafantatra “ny abidim-pianarana ny amin’i Kristy” isika, dia mety ny ‘handrosoantsika ho amin’ny fahamasahana’ amin’ny fandraisan-tsoa amin’ny sakafo ara-panahy rehetra omen’i Jehovah antsika amin’ny alalan’ny ‘mpanompony mahatoky sy malina’. (Hebreo 6:1-3; Matio 24:45-47.) Ho tsara àry ny hieritreretanao ireto fanontaniana ireto: Mamaky tsy tapaka ny Tenin’Andriamanitra ve ianao? Ianaranao amim-paharisihana ve ireo zavatra vita an-tsoratra anananao noho ny kilasin’ny “mpanompo”? — Hebreo 5:11-14.
15. a) Inona no torohevitra nomen’i Paoly ao amin’ny Hebreo 10:24, 25? Mampalahelo anefa fa inona no ataon’ny sasany? b) Raha tsy mety loatra ny fihetsitsika raha ny amin’ny fivoriana na ny fanompoana kristiana, inona no azontsika atao?
15 Etsy andaniny koa, dia zava-dehibe ny handatsahantsika am-po izao toro-hevitr’i Paoly izao: “Ary aoka isika hifampandinika hampandroso ny fitiavana sy ny asa tsara; aza mahafoy ny fiarahantsika miangona, tahaka ny fanaon’ny sasany, fa mifananara kosa, mainka satria hitanareo fa mihantomotra ny andro.” Anisan’ny “fanompoana masina” ataontsika ny famonjena tsy tapaka ireo fivoriana kristiana. Isan-kerinandro anefa dia misy manatrika ny lahateny ampahibemaso ary dia dodona mandao ny Efitrano Fanjakana alohan’ny fianarana Ny Tilikambo Fiambenana. Misy hafa koa tsy manatrika matetika ny fivoriana momba ny asa. Tsy hahaliana azy firy ve izany noho izy ireo tsy marisika loatra amin’ny fitoriana isam-baravarana sy amin’ny lafiny hafa amin’ny fanompoana kristiana. Raha ny amin’izay mahakasika anao, raha tsapanao fa tsy mety loatra ny fihetsikao amin’ny lafiny toy izao na izao, nahoana raha mivavaka amin’i Jehovah ny amin’izany, amin’ny fangatahana aminy mba hanampy anao tsy ho tapatapaka sy ho faka tahaka eo amin’ny lafiny rehetra amin’ny “fanompoana masina”? — Hebreo 12:25-29.
16. a) Zava-kendrena mety inona avy no azontsika ferana eo amin’ny fiainantsika ara-panahy? b) Raha misakana antsika tsy hanatratra zava-kendrena toy izao na izao ny andraikitra araka ny Baiboly, inona no azontsika atao ihany?
16 Moa ve misy zava-kendrena mety hafa koa azontsika ferana eo amin’ny fiainantsika ara-panahy? Mihamaro hatrany ny kristiana milatsaka amin’ny asa manontolo andro amin’ny maha-mpitory maharitra mandavantaona na mpanampy. Ho azonao atao ve ny hanitatra ny fanompoanao amin’ny fomba toy izany? Na dia misakana anao tsy hanatratra zava-kendrena toy izany aza ireo andraikitrao araka ny Baiboly, dia azonao atao ny manohana ara-tsaina ireo mpitory manontolo andro sady mandray anjara manokana amin’ny asan’Andriamanitra raha mbola mamela anao hanao izany koa ny toeranao. Amin’ny fivavahana sy amin’ny fanompoana amim-pahatokiana an’i Jehovah mba hiderana azy, dia azontsika rehetra atao ny mampiseho fa ‘tsy manorina ny fanantenantsika amin’ny harena miovaova isika, fa amin’Andriamanitra’. Fa raha ny amin’ireo izay afaka manomboka ny asan’ny mpitory maharitra, dia afaka mahazo antoka izy fa izany no anankiray amin’ireo fomba tsara indrindra ‘hihazonana ny tena fiainana’. — I Timoty 6:17-19.
17. a) Afaka mieritreritra tombontsoam-panompoana inona indrindra moa ny tanora? b) Fahafahampo inona no ananan’ireo mpianakavin’ny Betela?
17 Ny tombontsoa mahatalanjona hafa iray hanasana ny tanora indrindra mba hoheverina ao amin’ny vavaka dia ny fiasana ao amin’ny anankiray amin’ireo Betela maro miely patrana maneran-tany. Io asa io dia manome an’ireo izay manokan-tena ho amin’izany, fiofanana tsara dia tsara raha ny amin’ny fifandraisan’olombelona, satria ireo mpikambana ao amin’ny Betela tsirairay avy dia tokony hiara-miasa akaiky mba hampandrosoana ny asan’ilay Fanjakana. Afa-tsy izany koa, ny sasany amin’ny fahaizana azo ao amin’ny Betela dia azo inoana fa ho hita fa ilaina amin’ny asa lehibe hotontosaina ao anatin’ny fandaharan-javatra vaovao. Mazava ho azy fa satria betsaka amin’ireo miasa ao amin’ny Betela no niditra tao mbola tanora tokoa, dia mandrakariva izy ireny no tsy manan-karena amin’ny lafiny ara-nofo. Mianina amin’ny sakafo sy ny fitafiana anefa izy ireny, ary manana fahafahampo lalina mahafantatra fa mitondra soa ara-panahy ho an’ny olona maro be ny asany. — Mpitoriteny 3:12, 13.
18. Inona no ianarana rehefa manompo an’i Jehovah manontolo andro? Ahoana no anamarinan’ny Baiboly an’io hevitra io?
18 Amin’ny fandraisana anjara amin’ny karazan’asa manontolo andro no ianarana miantehitra bebe kokoa amin’i Jehovah. Ny olona eo amin’izao tontolo izao izay mametraka ny fitokisany amin’ny “harena miovaova” dia mihevitra matetika fa ny tsirairay avy dia tokony hitady izay hananana ny ampy amin’ny fahafahan’ny tenany ihany. Ny mpanompo manontolo andro kosa dia tsara toerana indrindra mba hahafantatra fa omen’i Jehovah malalaka ny ilain’ireo izay ‘mikatsaka ny fanjakany sy ny fahamarinany aloha’. (Matio 6:25-34.) Kristiana an’arivony maro miasa amin’ny maha-mpitory maharitra hatramin’ny taona maro no hanaiky fa tsy diso izay nilaina teo amin’ny fiainana mihitsy izy ireny. Miaraha mifanakalo hevitra amin’izy ireny, dia ho tsapanao fa ekeny amin’ny fo rehetra izao fanambarana nataon’i Davida mpanao salamo izao: “Efa mba tanora ihany aho, ary efa antitra ankehitriny; fa tsy mbola hitako izay marina nafoy, na ny zanany mangataka hanina.” — Salamo 37:25.
Manomàna ho avy azo antoka ho anao
19, 20. a) Koa satria kely sisa ny andron’ny fandehan-javatra ankehitriny, tokony hisahirana hanao inona moa isika? b) Ahoana no azontsika anomanana ny ho avintsika amim-pahendrena?
19 Raha anisan’ireo vavolombelon’i Jehovah mahatoky isika, dia takatsika fa fohy dia fohy sisa ny andron’izao fandehan-javatra izao. Amin’izany, tokony hanao ahoana ny fihetsika hasehontsika? Hanao zavatra amim-pahendrena isika amin’ny fihainoana ity fananaran’ny apostoly Petera ity: “Koa satria tsy maintsy ho levona toy izany ireo zavatra rehetra ireo, tokony ho karazan’olona manao ahoana moa ianao amin’ny asam-pitondrantena masina sy amin’ny asam-pitiavam-pivavahana, miandry sy tsy manadino na oviana na oviana ny fahatongavan’ny andron’i Jehovah izay handevona ny lanitra hirehitra sy hampitsonika ny zavatra hivaivay loatra!” — II Petera 3:11, 12,.MN.
20 Mampitandrina antsika koa ny apostoly Jaona fa mandalo izao tontolo izao (I Jaona 2:15-17). Tsy ho ela dia hanjavona izy. Noho izany, dia izao no fotoana tokony handanian’ireo izay matahotra an’Andriamanitra rehetra hery amin’ny “asam-pitondrantena masina sy amin’ny asam-pitiavam-pivavahana, miandry sy tsy manadino na oviana na oviana ny fahatongavan’ny andron’i Jehovah”. Tadidio fa ny fandaminan’Andriamanitra ihany no ho tafita velona amin’ny fifaranan’ity fandehan-javatra efa eo am-bavahoana ity. Aoka àry ianao hiseho ho hendry ary miasà ho fitsinjovana ny fiainana mandrakizay, amin’ny fanomanana ny ho avinao miaraka amin’ny fandaminan’i Jehovah.
Ho famerenana...
◻ Mahaforona inona izay rehetra matahotra an’i Jehovah. Inona no toky omena azy hita ao amin’ny Ohabolana 23:17, 18?
◻ Inona no hany fandaminana manana ho avy? Nahoana?
◻ Rehefa heverina amin’ny fahantomoran’ny “fahoriana lehibe”, inona no tokony ho zavatra hahin’ny Vavolombelon’i Jehovah indrindra?
◻ Zava-kendrena ara-panahy inona avy moa no mbola azon’ny maro tratrarina?
[Teny notsongaina, pejy 17]
Amin’izao andro izao, izay rehetra matahotra an’Andriamanitra tokoa dia manaiky an’i Jesosy ho Mpiandry azy ka miara-manompo ao anatin’ny firaisan-tsaina. Izy ireny no mahaforona ny fandaminan’i Jehovah eto an-tany.
[Teny notsongaina, pejy 19]
Manomana ny ho avinao miaraka amin’ny fandaminan’i Jehovah ve ianao? Ny asan’ny mpitory maharitra sy ny asa ao amin’ny Betela dia anisan’ireo zava-kendrena ara-panahy tsara dia tsara notratrarin’ny maro.