Hara-Magedonana na ny adin’ilay Andriamanitra fitiavana iray
“HARA-MAGEDONA” — Inona no dikan’io anarana notsoahina avy ao amin’ny Soratra masina io? Amin’ny janoary sy amin’ny febroary 1985, Ny Tilikambo Fiambenana dia manokana ireo pejiny voalohandohany ho amin’ny fitohitohizan-dahatsoratra mivaofy an’io foto-kevitra io. Manantena izahay fa hahita fampaherezana ianao ao amin’ireo fanazavana araka ny Baiboly aseho ao.
MAHATONGA anao hieritreritra inona ny teny hoe “Hara-Magedona”? Any amin’ireo tany anglo-saksona, dia matetika izany no mampahatsiahy hevitra ny amin’ny fifanatrehana mahery vaika eo amin’ireo firenena mahery. Be dia be no mieritreritra fa izany dia ho fikorontanan’ny ankapoben’olona tsy hisy toa azy, ady noklehera hanova ny planetantsika ho efitra “radioactif” (mandefa taratra) ka tsy hamela olona ho tafita velona na tsy hamela afa-tsy vitsy monja. Raha ny marina anefa, dia tsy misy ifandraisana mihitsy amin’izany hevitra ampiasaina matetika loatra izany ny Hara-Magedona.
Nalaina avy ao amin’ny Baiboly ny teny hoe “Hara-Magedona”. Indray mandeha monja no ahitana azy io ao, ao amin’ny toko fahenina ambin’ny folo amin’ny bokin’ny Apokalypsy (na Fanambarana). Taorian’ny nampisehoany hoe tamin’ny fomba ahoana “ny mpanjaka amin’izao tontolo izao” no nangonina “ho amin’ny adin’ilay andro lehiben’Andriamanitra Tsitoha”, dia izao no teny nanampin’io faminaniana io: “Ary nangoniny ho any amin’ny tany atao amin’ny teny Hebreo hoe Hara-Magedona ireny.” — Ap 16 Andininy faha-13 ka hatramin’ny faha-16.
Novakinao tsara hoe: “Ny adin’ilay andro lehiben’Andriamanitra Tsitoha. Adin’Andriamanitra àry Hara-Magedona. Marina fa ireo mpanjaka, ary miaraka amin’izy ireo ny firenena eo amin’izao tontolo izao, dia mandray anjara amin’izany koa. Tsy milahatra amin’ny Hara-Magedona mba hiady amin’izy samy izy anefa ireo, fa mba hiaraka hiady hanohitra an’Andriamanitra sy ireo tafika any an-danitra tarihin’i Jesosy Kristy, ilay Mpanjaka voatendrin’Andriamanitra izay, ao amin’ny fahitana, dia mitaingina soavaly fotsy. Hanao ahoana ny ho fiafaran’ny ady? Mitohy toy izao ny fitantarana ao amin’ny Baiboly: “Ny mpanjakan’ny tany mbamin’ny miaramilany [dia] tafangona mba hiady amin’Ilay mitaingina ny soavaly sy amin’ny miaramilany. (...) [Ary izy ireo] dia matin’ny sabatra mivoaka avy amin’ny vavan’Ilay mitaingina ny soavaly; ary ny vorona rehetra dia voky ny nofony.” — Apokalypsy 19:19-21.
Ady hisy ra handriaka
Hahatsiravina aoka izany ny fandringanana lehibe hateraky ny ady Hara-Magedona, hany ka nolazalazaina ho ‘fijinjana amin’ny tany’, dia fijinjana atao amin’ny alalan’ny “fijinjana maranitra”. Izao koa no vakintsika: “Ary naroson’ilay anjely tamin’ny tany ny fijinjany, dia nangoniny ny voaloboky ny tany ka nazerany tao amin’ny famiazana lehibe, dia ny fahatezeran’Andriamanitra. Ary voahitsaka teny ivelan’ny tanàna ny famiazana, ary avy tao amin’ny famiazana dia nisy ra nahadifotra hatramin’ny lamboridin-tsoavaly ka lasa hatramin’ny enin-jato amby arivo stadio.” — Apokalypsy 14:15-20.
Eny, handriaka ny ra rehefa hiasa ny tafika mpandringan’Andriamanitra. Ho hita fa tsinontsinona ireo maty 69 tapitrisa tamin’ny ady lehibe roa raha oharina amin’ny isan’ny ho faty amin’ny adin’Andriamanitra, dia ny Hara-Magedona. Ny amin’izany, dia nanoratra toy izao Jeremia mpaminany: “Ary amin’izany andro izany ny voavonon’i Jehovah, dia hiampatrampatra hatramin’ny faran’ny tany anankiray ka hatramin’ny farany koa; tsy hisaonana, na hangonina, na halevina ireny, fa ho zezika eny ambonin’ny tany.” — Jeremia 25:30-33.
Hamafy horohoro eo amin’ny olombelona ny zavatra halefa hirehitra, ny afo hiraraka sy ny loza aman’antambo hafa hisehoan’ny fanamelohan’Andriamanitra. Amin’ny fahaverezan-tsain’ny ankapoben’olona, dia hifamely izy ireo, fa ny tafika voatendry handringana kosa dia hamely amin’ny toerana rehetra, tsy misy fanavakavahan-taona, tsy misy lahy sy vavy. Nandidy azy ireo tokoa Andriamanitra mba tsy hitsimbina aina. Izao no toromarika nomeny: “Mameleza; aoka tsy hamindra fo aminy ny masonareo, ary aza ananana antra izy, fa na lahy antitra, na zatovo, na virijina, na zaza madinika, na vehivavy, dia aringano avokoa.” — Ezekiela 9:5, 6; Zakaria 14:12, 13.
Mety hisy ve izany? Ahoana no mety hanomezan’ny Andriamanitra fitiavana iray toromarika toy izany? Sa rehefa dinihina, ilay Fisiana tampony dia olona mafy fo, tsy azo ifonana sy mpamaly faty izay tsy miahy firy ny amin’ny olombelona nohariny? Moa ve ny Andriamanitra fitiavana iray tena afaka mahatonga ady maha-raiki-tahotra toy ny an’ny Hara-Magedona?