Tokony hampifanarahina amin’ny famporafesana ve ny Baiboly?
Ao amin’ilay revio katolika neherilanday atao hoe Bijeen (Miaraka), Sjef Donders, tonian’ny fanoratana dia nivaofy ny amin’ilay fiadian-kevitra teraka tany amin’ny tany sasany any Afrika noho ny fifanoheran’ny lalàna araka ny Baiboly momba ny fanambadiana tokana sy ny famporafesana, eken’ny olona maro. Voalamina io ady io, hoy izy, “amin’ny fanambarana fotsiny fa tsy azo ekena ny fampianarana ara-pivavahana [ny amin’ny fanambadiana tokana]”.
Mba hanazavana ny fiheveran’ny Eglizy tsy mazava loatra, dia notononin’i Donders ilay pretra amerikana atao hoe Eugene Hillman. Izy io dia anisan’ny kongregasionan’ny Fanahy Masina, fikambanana katolika iray niandohan’ny asa misionera tatsy Afrika. Tao amin’ny boky iray mivaofy ny amin’ny famporafesana, dia nanoratra toy izao i Hillman: “Raha mitranga tampoka ny hoe noho ny loza araka ny natiora sasany na ny loza aman’antambo ateraky ny olombelona dia vitsy dia vitsy monja ny lehilahy ary saika vehivavy fotsiny no hita, dia azo antoka fa ho hita ny antony araka ny Baiboly hamelana ireny lehilahy ireny hanana firaisana amin’ny vehivavy maromaro.”
Ho izany tokoa ve no izy? Mifanohitra amin’ny hevitra moramorainy ananan’io pretra io, dia tsy azo leferina eo amin’ny kristiana iray ny famporafesana, na toy inona na toy inona fireneny na toe-javatra miseho. Tena ny fanambadiana tokana tokoa no nomanin’Andriamanitra ho an’ny olombelona tany Edena. Afa-tsy izany koa, dia nasehon’i Jesosy mazava tsara ny tokony hiverenana amin’io fitsipika io ao anatin’ny kongregasiona kristiana (Matio 19:4-6). Izao no nosoratan’ny apostoly Paoly ara-tsindrimandrin’Andriamanitra: “Ny mpitandrina dia tsy maintsy ho tsy manan-tsiny, manam-bady tokana.” (I Timoty 3:2). Nanome izao torohevitra izao ho an’ny kristiana rehetra izy: “Anefa noho ny fijangajangana dia aoka ny lehilahy rehetra samy hanana ny vadiny avy, ary aoka ny vehivavy rehetra samy hanana ny vadiny avy.” (I Korintiana 7:2). Tsy mamela toerana mihitsy ho an’ny famporafesana izany eo amin’ny kristiana marina.