‘Manana ny fivavahako aho, ampy ahy io!’
MBOLA tsy nilaza toy izany mihitsy tamin’ny Vavolombelon’i Jehovah iray tonga teo am-baravaranao ve ianao? Angamba aza ianao nanampy teny hoe: ‘Io no fivavahan’ny ray aman-dreniko sy ny raibe aman-drenibeko. Koa nahoana no tokony hiova aho?’
Marina tokoa fa mandray soa lehibe avy amin’ny fahendrena sy ny fanandraman-javatra efa nataon’ireo ray aman-drenintsika isika. Nefa moa ve tsy maintsy ho fanehoana fahaiza-mitsara zavatra ny fitokisana amin’izy ireny raha ny amin’ny fivavahana? Azo antoka fa tsy manahaka an’ireo ray aman-drenintsika sy ireo raibe aman-drenibentsika isika amin’ny lafiny rehetra. Nahoana? Satria tsy mitsahatra ny mitatra ny fari-pahalalan’ny olombelona.
Aoka haka ohatra iray isika: Rehefa nisy olona voan’ny aretina sasany, 40 taona mahery izay, dia nety ho faty izy satria tsy mbola fantatra ny fomba fitsaboana nety nanasitrana azy. Nanomboka tamin’ny 1943, dia azo nampiasaina ny “antibiotiques” ka nahavonjy aina maro. Lavintsika amim-pitompoan-teny fantatra ve ireny fanafody ireny satria fotsiny tsy fantatr’ireo raibe aman-drenibentsika? Tsia, mitana ny saintsika hivelatra isika ka mandanjalanja ireo fahitan-javatra vaovao. Fahendrena ny hanarahana fihetsika toy izany raha ny amin’ny fivavahana.
Ny hita tamin’ny apostoly Paoly dia manamafy koa fa tsy voatery ho izay ankasitrahan’Andriamanitra akory ny fivavahan’ireo razambentsika. Talohan’ny niovana hanaraka ny kristianisma i Paoly dia niady tamin’ny fomba nahery vaika nihoa-pampana tamin’ny “Lalana” kristiana, ‘nanenjika ny fiangonan’Andriamanitra [kongregasionan’Andriamanitra, MN ] efa izay tsy izy sy nandrava azy’ izy. Nahoana no nanao toy izany izy? Satria ‘fatra-pitana ny fampianarana voatolotry ny razany indrindra’ izy. Ny fifikirany tamim-pahatsorana tamin’ny fivavahan’ireo razambeny tamin’izany fotoana izany dia nisakana azy tsy hanaiky ny fahamarinana momba an’i Jesosy Kristy, ka izany dia tsy nety nahafaly an’Andriamanitra. — Asan’ny apostoly 9:1, 2; Galatiana 1:13, 14.
Ny fivavahanao: nofidina sa kisendrasendra?
Raha ny marina, ny ankamaroan’ny olona dia nahazo ny fivavahany avy amin’ny fifanandrifian’ny toe-javatra miseho. Ahoana izany? Angamba ianao teraka katolika, protestanta, hindoa, taoista na bodista, satria izany no fivavahan’ireo ray aman-dreninao. Nefa aoka hatao hoe teraka tany amin’ny tany hafa iray ianao na tao anatin’ny fianakaviana hafa iray. Tsy isalasalana fa amin’izao andro izao ianao dia ho nanaraka fivavahana hafa iray tamin-kafanam-po. Noho izany, ara-dalàna ve ny hiheverana fa marina avy hatrany ny fivavahana nahaterahanao?
Na hatramin’ny nahaterahanao na tsia no anananao ny fivavahanao, dia milaza anakampo angamba ianao fa na ahoana na ahoana dia mahafapo anao izany. Kanefa, moa ve ny fanompoam-pivavahana marina raharaha mahakasika ny hevitra na ny fitiavan-javatra manokana fotsiny? Azo atao ve ny mitoky amin’ny fitsaran’ny tena amin’io lafiny io?
Ho azontsika atao ny hanazava io hevitra io amin’ny firesahana ny amin’ny fifidianana sakafo. Anontanio ny ankizy iray izay tiany kokoa: silaka mofomamy sa anana eran’ny lovia? Tena azo inoana fa hifidy ny mofomamy izy. Izany anefa ve no hahasoa indrindra? Toy izany koa, tsy hoe satria mifanitsy amin’ny fitiavanao zavatra manokana ny fivavahana iray dia hoe tsy maintsy ho izay hanome fahafahampo anao indrindra amin’izay ilainao ara-panahy. — Jereo Romana 10:2, 3.
Tsy raharaha mahakasika ny hevitra manokana fotsiny akory ny fivavahana. Izany dia ny fanompoam-pivavahana atokana ho an’Andriamanitra ka noho izany dia tokony hankasitrahany. Noho izany antony izany, ny fanontaniana lehibe dia tsy ny hahafantarana loatra raha mahafapo antsika ny fivavahantsika, fa ny hahafantarana kosa raha tena ankasitrahan’Andriamanitra tokoa izy io.