Mampiasà ny tenanareo amin’ny fikendrena ny fitiavam-pivavahana

“Mampiasà ny tenanao amin’ny fikendrena ny fitiavam-pivavahana.” — I TIMOTY 4:7, MN.

1. Noho ny antony inona moa no tsy nandresen’ny vehivavy mpanao fifaninanana iray tamin’ny hazakazaka?

IZY, tamin’ny fahaizany manokana, no tsara indrindra tamin’ny antokony. Noho ireo fandresena azony teo aloha tamin’ny hazakazaka an-tongotra, dia ambony laharana izy tamin’ny lafiny ara-pirenena. Nantenaina àry, tamin’io andro io, ny handreseny tamin’io hazakazaka nalaza tokoa io. Toy inona anefa ny fahadisoam-panantenan’ny mpanazatra azy, ny mpiray antokony taminy sy ny tenany koa, fa nanao ny hazakazaka ratsy indrindra tamin’izay nataony rehetra izy. Nahoana? “Nanao tsirambina ny fiomanako aho, nitsahatra tsy nanazatra tena mafy mihitsy aza aho”, hoy ny fiaiken’ilay vehivavy tanora, sakodiavatra aoka izany. “Tena nanandrana nanosika ahy hanazatra tena kokoa ny mpanazatra ahy ary nampitandrina ahy izy, kanefa tsy nihaino azy aho.” Noho ny nanaovany tsirambina ny fanazaran-tena tsy araka ny tokony ho nataony, dia tsy azony ny fandresena izay zava-kendreny anefa.

2. Ahoana no tokony hanazaran’ny kristiana tena, ary nahoana isika rehetra no tokony hitady izay hahafantarana ny hoe ahoana no hatao?

² Ianao izay kristiana, indrindra fa raha tanora ianao, dia tokony hiahy ny amin’ny fanazaran-tena koa ianao; zava-dehibe tokoa izany. ‘Mampiasà ny tenanareo amin’ny fikendrena ny fitiavam-pivavahana.’ (I Timoty 4:7, MN ). Ny matoanteny grika nadika hoe “mampiasa tena” (gumnazô) dia mifandray amin’ny fanazaran-tena mandreraka sy mampanaintaina matetika tsy maintsy natao tao amin’ny tokotany fampianarana fampiasan-tena. Kanefa ny amin’ny fitiavam-pivavahana sy ny valisoa avy amin’izany, dia izao no teny nanampin’ny apostoly Paoly: “Fa izany no ikelezanay aina sy iezahanay [anazaranay tena].” (I Timoty 4:10). Tsy azontsika avy hatrany akory io toetra tena lehibe io, dia ny fitiavam-pivavahana ary tsy tonga dia afindran’ny ray aman-dreny tia fivavahana amintsika. Inona àry no tokony hatao? Tokony hitady izay hahafantarana izany ny kristiana samy hafa taona rehetra.

Fifandraisana tsara amin’Andriamanitra

3. a) Nahoana no zava-dehibe tokoa ny fianarana manokana? b) Inona avy no toetr’i Jehovah nanintona anao ho aminy?

³ Koa satria ny fitiavam-pivavahana milaza tsy mivantana fankasitrahana amim-pahatsorana noho ireo toetran’i Jehovah, dia tsy maintsy fantarinao hoe iza tokoa moa izy. Manambara ny tenany amin’ny alalan’ny Baiboly anefa izy. Tokony hianaranao amim-pitandremana anefa ny Teniny mbamin’ireo zavatra voasoratra mifototra amin’izany mba ‘hotezaina [hofahanana, MN ] amin’ny tenin’ny finoana sy ny fampianarana tsara’. (I Timoty 4:6.) Ny fianarana toy izany dia hanampy anao ‘hijery ny fahasoavan’i Jehovah’. — Salamo 27:4.

4. Inona no zavatra tena nitranga mampiseho fa tena sarobidy tokoa ny fianarana manokana, ary inona avy no fanontaniana tokony hoheverinao tsara?

⁴ Nanambara toy izao ny zazavavy kristiana iray 22 taona, izay mpitory maharitra (mpitory manontolo andro): “Arakaraka ny itomboan’ny fahalalanao an’i Jehovah no ahatsiarovanao ho akaiky azy kokoa. Rehefa mamaky faminaniana aho ary mahafantatra ny fomba nahatanterahany, dia mahatsiaro ho feno tahotra lehibe an’Andriamanitra aho. Manampy ahy marina tokoa ny fianarana manokana.” Ny zatovo iray 16 taona izay voan’ny fahaketrahana mafy, dia nanoratra izao manaraka izao ny amin’ny lahatsoratra iray tao amin’ny “Les jeunes s’interrogent”, mivoaka tsy tapaka ao amin’ny Réveillez-vous!: “Tamin’ny fotoana nampamoifo ahy tanteraka indrindra no nivoaka io lahatsoratra io. Nampihetsi-po ahy mafy izany ka tsy afaka nitsahatra tsy namaky azy aho. Nahatsiaro tena ho akaiky lavitra an’i Jehovah aho ary tsapako fa mahatakatra ny fihevitsika izy ary miahy be dia be ny amintsika. Tsapako izao fa mety ho tafavoaka avy amin’izany ahoa.” Raisinao ho adidy ve ny mamaky ny nomerao tsirairay avy amin’ireo gazetintsika? Na dia tsy maintsy manao fiezahana aza ianao amin’izany, moa ve ianao maka fotoana hamahanana ny sainao sy ny fonao noho ny fianarana manokana ny Baiboly? Rehefa ny tenanao mihitsy no manao fikarohana ao amin’ny Baiboly, dia tena afaka mampiaiky ny tenanao ianao fa manana ny fahamarinana. Raha tafalatsaka hatrany ao am-ponao izany fahalalana izany, dia saika azo antoka fa hanosika anao hanao zavatra, satria izany “fampianarana mifanaraka amin’ny fitiavam-pivavahana”. — I Timoty 6:3, MN; Romana 12:2.

5, 6. Karazam-bavaka inona no hampanatona anao bebe kokoa an’i Jehovah? Manomeza ohatra.

⁵ Mba hitanana fifandraisana tsara amin’Andriamanitra, dia ilaina koa ny hanaovana aminy vavaka amim-pahatsorana sy hentitra. Izany dia hanampy anao hamboly fisakaizana manokana amin’Andriamanitra. Rehefa manao fahadisoana ianao, dia manàna fahavononana hivavaka toy ny nataon’i Davida manao hoe: “Aza ny fahotan’ny fahatanorako, na ny ratsy nataoko, no tsarovanao.” (Salamo 25:7, 11). Fantaro koa fa hamela ny helokao Andriamanitra raha mibebaka ianao. Mianara mivavaka tsy maimaika, mamboraka ny ao am-ponao. Na dia notezaina tao anatin’ny fianakaviana tia fivavahana aza ny zazavavy iray 22 taona, dia tsy niditra tanteraka tamin’ny fanarahana ny fivavahana marina satria niboredi-piteny. “Indray alina, hoy ny nambarany, dia nitalaho tamin’i Jehovah tamin’izao teny izao aho: ‘Ampio aho hanana faniriana ny hanompo anao, ary tsy hanompo anao fotsiny satria maniry izany ireo loholona sy ny ray aman-dreniko.’ ” Tamin’izay no nanomboka niova ny fiainany. Na dia niboredika aza izy dia niditra tanteraka hanao ny fanompoana. Tamim-pifaliana no nanambarany hoe: “Mamboraka be lavitra ny ao am-poko amin’i Jehovah aho izao satria fantatro fa mahita fanafodiny foana izy.” — Salamo 62:8.

⁶ Ny zazavavy kristiana iray dia nivavaka tamin’ny firesahana tamin’ny fomba hentitra dia hentitra ny fikasany ho tonga mpitory maharitra. Rehefa nivaly ny vavaka nataony, dia nihiaka toy izao izy: “Fantatro fa Olona tena misy Jehovah ary mikarakara antsika. Nieritreritra koa ny hitana fifandraisana aminy aho, nefa ankehitriny dia mitovy betsaka lavitra amin’ny sakaiza izy; izy no Sakaizako tsara indrindra.” Tsy hamaly foana ny vavaka ataonao amin’ny fomba mahagaga akory Jehovah, nefa raha tso-po ianao ka miasa mifanaraka amin’ny hataka ataonao, dia hahatsikaritra fa mitari-dalana anao amim-pitiavana izy. — Salamo 145:18.

Mitana fieritreretana tsara

7. Inona no atao hoe fieritreretana, ary nahoana ianao no tokony hitana fieritreretana tsara?

⁷ Rehefa nananatra an’i Timoty ny apostoly Paoly mba hanohy ‘hitana fieritreretana tsara’, dia fantany tsara tokoa fa nitaky fiezahana nitohy izany (I Timoty 1:19). Nahoana? Ny fieritreretantsika dia ny fahafahana nomen’Andriamanitra antsika handini-tena sy hitsara ny ataontsika na izay kasaintsika hatao. Izany dia mety, na, ‘hiampanga’ antsika, amin’ny fanamelohana ny lalantsika, ka mampanaintaina izany, na ‘manafaka’ antsika, izany hoe manamarina ny ataontsika (Romana 2:15). Raha simba anefa ny fieritreretantsika, dia mety hilaza hafatra ratsy amintsika. Ireo izay manana fieritreretana simba amin’izany dia mety hitondra tena toy ny biby tsy mifaditrovana. Tsy ‘miampanga’ azy ireny anefa io ‘feo anaty’ io. Mety hanambara aza ireny olona ireny fa ‘mahalala an’Andriamanitra, nefa mandà Azy amin’ny asany’. Ahoana no azo analavirana ny fampitomboana fieritreretana simba? — Titosy 1:10-16.

8. Ahoana no ‘nanarian’ny’ kristiana sasany tamin’ny taonjato voalohany ny fieritreretana tsaran’izy ireo?

⁸ Nanoratra ho an’i Timoty koa i Paoly fa ny kristiana sasany dia ‘nanary’ ny fieritreretany tsara tamin’ny ‘fitandremana anganongano’ sy “fibedibedena foana”. (I Timoty 1:4, 19, 20; 6:20; II Timoty 2:16-18.) Noho izy ireny nihaino izany zavatra izany, dia nivadika ny finoany, ka izany dia niafara tamin’ny faharendrehany ara-panahy. Nasehon’i Paoly anefa fa ankoatra ireo fampianarana tsy marina, dia nisy zavatra hafa ‘nifanohitra tamin’ny fampianarana tsy misy kilema’. Ao amin’ny I Timoty 1:9, 10, dia tanisainy ireny zavatra ireny ka anisan’izany ny famonoana olona, ny fijangajangana sy ny fandrian’ny lehilahy amin’ny lehilahy.

9, 10. a) Inona no azonao ianarana avy amin’ny ohatra nomen’ilay mpivady kristiana tsy nitana fieritreretana tsara? b) Ahoana no azontsika analavirana ny fahatongavan’ny fieritreretantsika ho donto?

⁹ Amin’izao androntsika izao, ny herisetra sy ny fahalotoam-pitondrantena dia nameno ny sarimihetsika, ny fandaharana ao amin’ny televiziona mbamin’ireo boky. Raha mamelona ny saintsika amin’ireny zavatra ireny isika, dia hihadonto tsikelikely ny fieritreretantsika. Izany no nitranga tamin’ny mpivady tanora izay nijangajanga taloha kelin’ny andro fampakaram-badiny. “Inoako fa nisy heriny tamin’izany izay nojerenay tao amin’ny televiziona, hoy ny fiaiken’ilay zazavavy. Hita foana ny lehilahy sy vehivavy mifanoroka sy mifanafosafo, hany ka toa tsy dia ratsy loatra izany. Zatra amin’izany ny tena ka manomboka manao toy izany koa. Raha mba nieritreritra kokoa ny haratsin’ilay zavatra mantsy aho!” Tsy tsapany akory fa veriny ny fieritreretany tsara. Tetsy andaniny koa, dia nilaza toy izao ilay zazalahy: “Nanana zava-nanahirana hafa iray aho: ny ‘masturbation’ (fikasikasihana ny faritra maha-lahy na mahavavy amin’ny tena ihany). Nihadonto àry ny fieritreretako. Avy amin’izany nankeo amin’ny fifanorohana sy ny fifanafosafoana, ary farany dia ny fijangajangana, dia tsy nisy afa-tsy dingana iray monja natao.” Toa ohatra tsara ho an’ny hafa ireo tanora roa ireo. Kanefa ny fialam-bolin’izy ireo sy ny fanao maloto niafina dia namono tsikelikely ny fieritreretany, toy ny nofo amin’ny fifampikasohana miverimberina amin’ny vy mahamay. — I Timoty 4:2.

¹⁰ Mety ho mihadonto toy izany ve ny fieritreretanao noho ny sarimihetsika na ny famakian-teny fidinao mba hialam-boly? Tena manao fiezahana tokoa ve ianao mba handresena ny fahazaran-dratsy rehetra mety handoto ny fieritreretanao? Mba hiarovan-tena, dia afaka manao zavatra amin’ny fomba manorina ianao amin’ny famakiana sy amin’ny famerimberenana mamaky soratra mifototra amin’ny Baiboly mamelabelatra mivantana ny zava-manahirana anao na amin’ny fiaraha-midinika ny amin’izany amin’ny loholona iray. Ny fieritreretana madio dia fanomezana sarobidy avy amin’Andriamanitra; hanampy anao hamboly fitiavam-pivavahana izany. Aza avela hisy na inona na inona hampanary anao izany fieritreretana tsara izany.

Fidio tsara ny fifaneraseranao

11, 12. a) Inona no fampitandremana hitantsika ao amin’ny II Timoty 2:20, 21? b) Ahoana no azontsika anarahana an’io fampitandremana io?

¹¹ Nanoratra toy izao koa ny apostoly Paoly: “Fa ao an-trano lehibe [ny kongregasiona], tsy dia fanaka volamena sy volafotsy ihany no ao, fa fanaka hazo sy tany koa, ny sasany homem-boninahitra, ary ny sasany halam-baraka. Koa raha misy olona manadio ny tenany ho afaka amin’ireny, dia ho fanaka homem-boninahitra izy, efa nohamasinina ka mahasoa ho an’ny Tompo, voavoatra ho amin’ny asa tsara rehetra.” (II Timoty 2:20, 21). Manan-kery lehibe eo amin’ny fihetseham-pontsika sy eo amin’ny ataontsika ireo namantsika. Miharihary fa tsy mety ho namana tsara ny tsy mpino. Asehon’i Paoly amim-pahatsorana tokoa eo anefa fa na dia ny mpikambana sasany ao amin’ny kongregasiona aza dia tsy faniry hifaneraserana. Angamba ho hitanao fa mahatsikaiky tokoa izy ireny rehefa miaraka amin’ny maro, nefa tsy hanosika anao ‘handositra ny filan’ny tanora fanahy’ ny fitaomany, na hamboly fitiavam-pivavahana. Mitadiava àry namana mampandroso eo anivon’ny kongregasiona. Nanampy teny toy izao i Paoly eo amin’ny andininy II Ti 2 faha-22: “Miezaha mitady fahamarinana, finoana, fitiavana, fihavanana amin’izay miantso ny Tompo amin’ny fo madio.” — Jereo Filipiana 4:8, 9.

¹² Raiso ho ohatra ny amin’ity zazavavy kristiana iray izay, na dia notezain’ny ray aman-dreny tia fivavahana aza, dia nanan-java-nanahirana foana. “Noho ireo olona nifaneraserako indrindra no nahatonga izany”, hoy izy. Rehefa tsapany fa tsy hahita fahombiazana izy eo amin’ny fiainany, dia niova namana izy. Namarana ny teniny toy izao izy: “Rehefa manana namana tia an’i Jehovah ny tena, dia mora kokoa ny mitana fieritreretana mora tohina sy ny manalavitra ireo fahasahiranana. Rehefa lazainy fa maharikoriko azy ireny ny manao zavatra ratsy, dia manjary miray fihetseham-po aminy ny tena.” Rehefa nanalavitra namana nanana fitondrantena nampiahiahy izy, dia tonga fanaka “mahasoa ho an’ny Tompo, voavoatra ho amin’ny asa tsara rehetra”. Rehefa manompo amin’ny maha-mpitory maharitra izy hatramin’ny 10 taona izao, dia afaka milaza hoe: “Tsapako ankehitriny fa nampiasa ahy mba hanampy olon-kafa Jehovah.” — II Timoty 2:21; Ohabolana 15:31.

13. Ahoana no azontsika amantarana na tsara na tsia ny namana sasany? Ahoana no mety hananan’ireny namana ireny hery eo amintsika?

¹³ Diniho amin’ny fomba mihevitra ny zavatra tena misy àry ny olona ifaneraseranao. Miezaka mitady fahamarinana, finoana, fitiavana tarihin’ny fotopoto-pitsipika sy ny fiadanana ve izy ireny? Feno zotom-po kristiana ve izy ireny? Amin’ny fifidianana ireo namanao akaiky amin’ireo izay mahafeno izany fepetra izany, ny tenanao dia mety ho tonga ohatra amin’ny teny, amin’ny fitondrantena, amin’ny fitiavana, amin’ny finoana sy amin’ny fahadiovana, tahaka ny naha-toy izany an’i Timoty, mpiara-niasa akaiky dia akaiky tamin’i Paoly. Tsy milaza anefa akory izany fa tokony hiseho hangatsiaka na tsy hampiseho fitiavana kokoa an’ireo izay tsy ohatra amin’izany lafiny izany ianao. Ny ohatra falifaly omenao kosa aza dia mety hanosika azy ireny koa hanao lala-mahitsy ho an’ny tongony. — I Timoty 4:12; Hebreo 12:12-15.

Manàna fahafoizan-tena ho an’Andriamanitra

14, 15. a) Fahizay, inona no fifehezan-tena tsy maintsy narahin’ireo mpanao fifaninanana rehefa nanaza-tena izy ireo? b) Asa inona no mitaky fahafoizan-tena, ary inona no ohatra tsara ananantsika?

¹⁴ Tamin’ny andron’i Timoty, rehefa nanao fanazaran-tena ireo mpifaninana tamin’ny fanatanjahan-tena, dia niahy ny amin’ny ‘hahononan-tena amin’ny zavatra rehetra’, ka namoy mihitsy aza fahafinaretana maro izay ara-dalàna anefa (I Korintiana 9:25). Nitandrina ny sakafony aoka izany izy ireny. Araka ny filazan’i Horace, poeta tamin’ny taonjato voalohany alohan’ny fanisan-taona iraisana, ireo mpanao fifaninanana dia ‘nifady vehivavy sy divay’ mba ‘hahatratrarana ny zava-nokendrena nirina aoka izany’. Toy izany koa, mba hanazaran-tena amin’ny fikendrena ny fitiavam-pivavahana, dia ilaina ny hananana fahafoizan-tena. Izao no nosoratan’i Paoly ny amin’i Timoty: “Tsy mahita olon-kafa manana finiavana tahaka azy aho (...) Ny hafa rehetra tokoa dia samy mitady ny tombontsoan’ny tenany avy, fa tsy ny an’i Kristy Jesosy. Izy kosa anefa (...) nanompo noho ny vaovao tsara.” — Filipiana 2:19-22, MN.

¹⁵ Nanao izao fananarana izao ho an’i Timoty i Paoly: “Ataovy ny asan’ny evanjelisitra, tanteraho amin’ny fomba feno ny fanompoanao.” (II Timoty 4:5, MN ). Na dia nanintona tokoa aza ny zavatra nahaliana azy, dia nataony sorona izany mba hamitana ny asan’Andriamanitra. Vonona ny hanao toy izany ve ianao? Amin’izao androntsika izao, ny tanora kristiana sasany izay tsy manana andraikitra lehibe araka ny Baiboly anefa dia niditra hanao fianarana ambony na nifidy asa manontolo andro be karama tokoa fa tsy nanao ny fanompoana kristiana ho raharahany. Araka izany, dia tsy andrin’ny tanora kristiana iray ery izay hahazoana asa karazan’izany. Alohan’ny hanombohana an’io asa io anefa, dia nekeny ny fanasan’ny mpivady mpitory maharitra izay nanipy hevitra taminy mba hiaraka tamin’izy ireo tamin’ny fanompoana nandritra ny lohataona manontolo. Nahafinaritra azy tokoa izany. Noho izany, dia navelany ilay asa manontolo andro niriny fatratra ka nanaiky asa tapak’andro tsy nahaliana kokoa izy, mba hahafahana ho mpitory maharitra. Noho izy io namboly toe-tsaina sahala amin’ny an’i Timoty, amin’izao fotoana izao izy dia manompo ao amin’ny foibe maneran-tanin’ny Vavolombelon’i Jehovah. Araka ny nety ho tsapany, izay vonona ny hahafoy tena dia mampiseho amin’izany, tena fitiavana ary ho valiny, ny sorona nekena hatao dia mahatonga izany fitiavana izany ho lalina kokoa.

16. Inona moa no sasany amin’ireo sorona tsy maintsy eken’ny tanora angamba?

¹⁶ Tamin’ny naha-“mpitory sy Apostoly” azy, dia nasehon’i Paoly tsara fa misy tombontsoa ny hitafiana amim-pahamaotinana tanteraka. Moa ve ianao vonona ny hahafoy fomba fitafy na taovolo sasany izay mety hanakorontana ny sain’ny hafa na hanimba ny fahitam-bokatra amin’ny fitorianao (I Timoty 2:7-10)? Izao koa no nolazain’i Paoly: “Izay rehetra te-ho velona amin’ny toe-panahy araka an’Andriamanitra (...) dia henjehina.” (II Timoty 3:12). Vonona ny hiandany amin’ny fahamarinana ve ianao, na dia mety hiteraka fanesoana anao aza izany na hamoizanao laza sasany eo amin’ireo mpiara-mianatra aminao? Izany fahafoizan-tena rehetra izany, ekena noho ny antony tsara manosika dia hanampy anao hamboly fitiavam-pivavahana sy hampianatra anao koa mba hiantehitra amin’i Jehovah ka hihevitra ny heviny ho zava-dehibe kokoa noho ny zavatra hafa rehetra.

Mandrosoa hatrany

17. Ahoana moa, tamin’ny fandrosoana, no nisehoan’i Timoty ho ohatra ho an’ny mpitory tanora amin’izao andro izao?

¹⁷ Tsy misy fitsaharana mihitsy amin’ny fambolena fitiavam-pivavahana. Izao koa no nosoratan’i Paoly ho an’i Timoty: “Mazotoa hihevitra izany zavatra izany, dia mikeleza aina fatratra amin’izany, mba hiseho amin’ny olona rehetra ny fandrosoanao.” (I Timoty 4:15). Noho izy ireny tanora loatra ka tsy afaka ny ho mpikarakara momba ny asa na loholona, ny kristiana sasany angamba dia mahatsiaro ho tsy afaka mandroso ary mihevitra fa ny andrefesana ny fandrosoan’ny olona iray dia amin’ny andraikitra sy tombontsoa ankinina aminy ao anatin’ny kongregasiona ihany. Marina fa mba hahatongavana ho loholona, Timoty dia tokony hahafeno ireo fepetra takina na amin’ny lafin’ny fandrosoana ara-panahy na amin’ny an’ny taona. Tsy maintsy manohy manao fiezahana anefa izy, ary amin’izany izy dia ohatra miavaka ho an’ny minisitra kristiana tanora rehetra, na inona na inona fahafahana atolotra azy ireo. — I Timoty 4:12, 13.

18. Amin’ny fomba ahoana no azon’ny tanora kristiana androsoana?

¹⁸ Sahala amin’i Timoty, ianao izay mpanompon’i Jehovah eo am-pitomboana ho amin’ny fahamasahana, dia afaka ny ho ‘fianarana ho an’ny mino’ ianao raha avelanao ny fahamarinana hisy heriny lalina eo amin’ny fiainanao ary raha hatsarainao ny toetry ny fanompoanao. Azonao atao dieny izao ny miezaka handroso amin’ny fianarana mamboly toetra sasany, toy ny fahamaotinana amin’ny fitafiana, ny filaminana, ny fitiavana mampiantrano vahiny sy ny fahamaotinana. Amin’ny fanolorana ny fanampianao an’ireo loholona, sy amin’ny fanatontosana tsara izay rehetra mety ho asa ankininy aminao, dia ‘hozahan-toetra’ ny fahaizanao. (I Timoty 3:1, 2, 8-10.) Na dia tsy mahay manavaka avy hatrany ny fandrosoanao aza ny hafa, dia matokia fa hitan’i Jehovah izany. Hahamarika izany koa amin’ny farany ireo rahalahinao. — I Timoty 5:25.

19. Na dia ilaina aza ny manao fiezahana, nahoana moa no tokony hampiasa ny tenanao amin’ny fikendrena ny fitiavam-pivavahana ianao?

¹⁹ Aza hadinoina mihitsy fa amin’ny fambolena fitiavam-pivavahana no hahombiazanao amin’ny famatorana fifandraisana manokana amin’i Jehovah, dia fifandraisana hankasitrahany. Ny tsy fisian’ny fanazaran-tena ara-panahy dia misy vokany ratsy lavitra noho ny tsy maintsy nihatra tamin’ilay mpifaninana menatra aoka izany resahina ery am-piandohan’ity lahatsoratra ity. Marina fa ilaina ny miasa mafy mba hambolena fitiavam-pivavahana, nefa maneran-tany, dia tanora falifaly maro be no mihiaka mafy hoe: MENDRIKA NY HANAOVANA FIEZAHANA IZANY. Noho io toetra io, dieny izao ny tena dia afaka manana fiainana ampoky ny soa tsy simban’ny nenina; ambonin’izany, izany koa dia mahatonga ho afaka hanantena fahasambarana mandrakizay. Manohiza àry manazatra tena. Omeo ny tsara indrindra amin’ny tenanao, na dia sarotra aza izany. Mahereza amin’ny fieritreretana fa “Andriamanitry ny fahasoavana rehetra (...) no hahatanteraka sy hampiorina ary hampitoetra anareo. Ho Azy anie ny fanjakana mandrakizay mandrakizay. Amena.” — I Petera 5:10, 11.

[Fanamarihana ambany pejy]

Afaka mamaly ve ianao?

◻ Inona avy no fiezahana tokony hatao mba hitanana fifandraisana tsara amin’Andriamanitra?

◻ Inona no tokony hatao mba hitanana fieritreretana tsara?

◻ Ahoana no azo ampiharana ny II Timoty 2:20-22 mba hambolena fitiavam-pivavahana?

◻ Ahoana no azon’ny tanora kristiana androsoana?

[Efajoro, pejy 17]

Ny sasantsasany amin’ireo toetran’ilay Andriamanitsika be hafanam-po

◼ Manana fihetseham-po izy; mety ‘hampalahelo’ na hahafaly azy àry ny ataontsika. — Salamo 78:40; Ohabolana 27:11.

◼ Raha matetika tokoa ny olombelona no tsy mijery afa-tsy ny miseho ivelany, izy kosa “mijery ny fo”. — I Samoela 16:7.

◼ Mikarakara antsika izy ary manasa antsika hametraka aminy ny fanahiantsika rehetra; “fiarovana mafy amin’ny andro fahoriana” izy. — Nahoma 1:7; I Petera 5:7.

◼ “Andriamanitra finaritra” izy ary “mankasitraka” ny mpanompony. — I Timoty 1:11; Salamo 35:27.

◼ Tsy hanao zavatra tsy ara-drariny sy amim-piangarana mihitsy izy. — Joba 34:10; Asan’ny apostoly 10:34, 35.

◼ Tsy manala tsiny ny ratsy izy, kanefa raha mibebaka noho ny fahadisoana na ny fahalemena iray isika, dia “mamela heloka” izy; tsy mba manao “amintsika araka ny fahotantsika” izy ary tsy “mamaly antsika araka ny helotsika”. — Salamo 86:5; 103:8-14.

◼ Azo hatonina izy ary mamporisika an’ireo zavaboariny mahatoky hampiasa ny fahaizan’izy ireo. Na dia ao aza ny fahendreny tsy hita lany, dia mihaino ny fanipazan-kevitra izy. “Hahatonga ahy ho lehibe ny fanetren-tenanao”, hoy ny nosoratan’i Davida mpanjaka. — Salamo 18:35, MN; I Mpanjaka 22:19-22.

[Sary, pejy 20]

Kristiana maro no mahita fifaliana lalina kokoa eo amin’ny fanompoana noho ny amin’ny asa tena tsara karama.