Ho afaka ‘hanitatra ny faritaninao’ ve ianao amin’ny fahatongavana ho mpitory maharitra?
NILAZA toy izao i Jesosy Kristy indray andro: “Tsy maintsy mitory ny teny soa mahafaly ny amin’ny fanjakan’Andriamanitra any amin’ny tanàna hafa koa Aho, satria izany no nanirahana Ahy.” (Lioka 4:43). Tsy azo lavina fa Jesosy no mpitory ilay Fanjakana lehibe indrindra. Tena mpitory maharitra teo amin’ny asa masin’i Jehovah izy.
Ny apostoly Paoly, izay mpitory manontolo andro koa, dia nihevitra mafy ny asa fitoriana ny filazantsara. Raha ny marina, dia niriny mafy ny hanitatra ny faritany nanatontosany ny fanompoany. — Jereo Romana 15:23, 24; II Korintiana 10:15, 16.
Amin’izao androntsika izao, dia azo antoka fa tamin’izany toe-tsaina izany koa no mahatonga Vavolombelon’i Jehovah maro hanao izay hahafahany hiasa amin’ny maha-misionera any an-tany hafa. Ny mpitory kristiana hafa dia lasa niasa tany amin’izay nilana izany indrindra, ary be dia be no nahatsikaritra fa azony natao ny ho tonga mpitory maharitra, izany hoe mpitory ny vaovao tsara manontolo andro.
Ary ianao? Raha tsy mpitory maharitra ianao amin’izao fotoana izao, azonao atao ve ny hanitatra ny faritaninao, azo lazaina hoe amin’ny fahatongavana ho mpitory ilay Fanjakana manontolo andro?
Ireo soa entin’ny asan’ny mpitory maharitra
Ny mpitory maharitra be zotom-po sy mahita vokatra dia tsy mitady ny tombontsoany manokana. Hetsehin’ny fitiavana an’Andriamanitra sy ny faniriana hanampy ny mpiara-belona aminy izy ireny. Tsapan’ireny minisitra ireny tokoa ny ilàna hampihatra ny Tenin’Andriamanitra eo amin’ny fiainany sy ny hifaliana satria nahazo fahafahana mba hanompo ny Mpamorona azy manontolo andro. Loharanon-tsoa tokoa io asa io.
‘Manambara isan’andro ny vaovao tsaran’ny famonjen’i Jehovah’, izany dia tombontsoa voalohany azo avy amin’ny asan’ny mpitory maharitra (Salamo 96:2, MN ). Mahatsapa fahafahampo lalina tokoa ny tena rehefa miresaka isan’andro ny amin’Andriamanitra sy ny fikasany, indrindra fa satria amin’izany no anampiana ny mpiara-belona amin’ny tena hahita ny lalana izay mitarika ho amin’ny fiainana. Ny amin’izany, dia nanambara toy izao ny anabavy iray izay mpitory maharitra hatramin’ny 46 taona: “Tsy misy na inona na inona mitondra fahafinaretana kokoa noho ny fiaraha-mianatra Baiboly amin’olona sy ny fahitana azy tonga mpivavaka amin’i Jehovah.”
Mampiasa amim-pahakingana kokoa ‘ny sabatry ny fanahy, dia ny tenin’Andriamanitra’, izany no tombontsoa faharoa raisin’ireo mpitory maharitra amin’ny fampiasana tsy tapaka ny Baiboly mandritra ny fanompoany (Efesiana 6:17). Mariho izao santionam-panambarana izao, mety ho re indray eo am-bavan’ny maro: “Mahatsiaro ho be herim-po kokoa aho ary, ankoatr’izany, dia mifankazatra amin’ny teny maro ao amin’ny Baiboly aho. Miraikitra ao amin’ny fitadidiako izany ary afaka mampiasa azy amin’ny fotoana rehetra aho.”
Rehefa misy mpitory manao ny asan’ny mpitory maharitra, dia mety hisy heriny tsara dia tsara koa izany eo amin’ny kongregasiona. Izao no nosoratan’ny loholona iray ny amin’izany: “Endrey ny fiovana hatramin’ny nanananay mpitory maharitra! Nisy vokany tsapa izany teo amin’ny asan’ny kongregasiona. Ankehitriny, dia tsy mitsahatra ny mampitombo ny fandraisanay anjara amin’ny asan’i Jehovah izahay.” Marina tokoa fa ny ohatra mampiseho zotom-po omen’ireo mpitory maharitra dia misy heriny mamporisika eo amin’ny mpikambana hafa ao amin’ny kongregasiona.
Afa-tsy izany koa, dia matetika ireo mpitory maharitra no mahita fitomboan’ny fitokisany an’i Jehovah. Mazava ho azy fa tsy maintsy misetra zava-manahirana ny mpitory manontolo andro indraindray. Naneho ny fitokisany tamin’izao teny izao anefa ny mpivady iray mpitory maharitra: “Noho Jehovah, dia tsy mbola nanana ny tsy ampy mihitsy izahay. Tamin’ny asan’ny mpitory maharitra, dia nanjary niankina tamin’i Jehovah izahay, ary tsapanay fa manampy anay izy rehefa tena mila izany izahay.” — Salamo 34:10; 37:25.
Voatahy ireo izay manitatra ny faritaniny
Taonjato maro lasa izay, dia izao no nambaran’i Jehovah: “Izahao toetra amin’izany Aho, hoy Jehovah, Tompon’ny maro, raha tsy hovohako ny varavaran’ny lanitra ho anareo ka hampidinako fitahiana manana amby ampy ho anareo.” (Malakia 3:10). Tao anatin’ny taom-piasana 1984, tamin’ny ara-keviny dia nisy mpitory maharitra 258 936 maneran-tany. Ary fitahiana toy inona moa no tsy nomen’i Jehovah ireny minisitra manontolo andro ireny!
Aoka horesahintsika izay noraisin’ireo mpitory maharitra miasa any Amazonia, any Brésil. Amin’ny ankapobeny izy ireny, dia mandeha amin’ny sambo mba hanatrarana ireo vohitra miely patrana manaraka ny rano mandeha. Ny sasany amin’ireny vohitra ireny dia miorina ao anatin’ny rano ka ireo trano mahaforona azy dia misy tongony mba ho eo ambonin’ny faritry ny haavon’ny rano foana mandritra ny fotoan’ny ranonorana. Ireny fonenana ireny dia mifandray amin’ny alalan’ny tetezan-kazo kely izay tsy azo antoka tokoa indraindray, indrindra fa ho an’ny olona vaventy. Na dia sarotra aza izany, rehefa iva ny rano, dia azo atao ny manatratra ireny vohitra ireny amin’ny fanavatsavana eny anelanelan’ny zavamaniry na amin’ny firobohana ao amin’ny fanambanin’ny ony be fotaka. Tena zava-tsarotra setraina koa ny fandehanana amin’ny lakanjila kely, satria indraindray dia mivadika izy ireny. Etsy andaniny koa, dia tokony hanampy izany rehetra izany ireo zava-manahirana ateraky ny tazo, ny tefoedra, ny kankana, ny hafanambe sy ny bibikely. Kanefa, na dia ao aza izany fahasahiranana maro izany, dia mahavita fanambarana ny vaovao tsara any amin’ireny faritany ireny ireo rahalahintsika noho ny fanohanan’ny fanahin’i Jehovah. — Zakaria 4:6.
Araka izany, dia izao no nolazain’ny anabavy iray nanao ny asan’ny mpitory maharitra tany Amazonie: “Nitondra fifaliana tsy nanam-petra ho anay ny asanay.” Mba hampiaikena anao ny amin’izany, dia hevero izao zava-nitranga izao: Indray andro izy io dia nandeha sambo adiny roa mba hitsidihana indray ny lehilahy iray izay nandray boky vitsivitsy teo aloha. Rehefa tonga anefa izy dia nahita azy teo am-pahandroana koba mangahazo tao amin’ny lafaoro lehibe iray. Tsy afaka nanapaka ny asany izy raha tsy nety handoro ny zavatra rehetra. Inona no nataon’ilay anabavintsika? Nangataka an’ilay namany izy mba hanohy hangaroharo ny koba tamin’ny lapelina hazo lehibe. Araka izany, dia afaka nihaino azy tamim-pitandremana ralehilahy rehefa nanazava taminy ny fomba fianatra ireo boky nananany izy.
Matetika tokoa, ireo rahalahintsika izay mitory any Amazonia dia mifoha alohan’ny vao mazava ratsy mba hahatongavana aloha any amin’ny olona. Manaraka izany, ireo mpitory maharitra dia manohy manao fanambarana mandritra ny andro. Tsy ilaina ny milaza fa mitahy azy ireny be dia be Jehovah. — Ohabolana 10:22.
Any amin’ny faritra hafa any Brésil, dia mandray fitahiana maro koa ireo mpitory maharitra eo amin’ny asan’i Jehovah. Alao sary an-tsaina, ohatra, ny fifalian’ilay afaka nanampy mpigadra hahafantatra ny fahamarinana. Io voatana io izay nampihorohoro teo aloha noho ny toetrany nahery setra, dia nanala sazy naharitra tany an-tranomaizina. Rehefa nanaiky ny fahamarinana anefa izy, dia niova aoka izany ny toetrany, hany ka nanaitra ny sain’ireo manam-pahefana tao an-tranomaizina ary navelany hitory tao an-tranomaizina. Io lehilahy io, izay vita batisa ankehitriny, dia nomena fahafahana misy fepetra, ary miara-mianatra ny Baiboly amin’olona maromaro.
Ilay mpitory maharitra nanampy azy dia mbola mikarakara koa voaheloka hafa ao amin’io tranomaizina io ihany. Ny amin’izany, dia manao izao famoaboasan-kevitra izao izy: “Mahatonga ahy ho sambatra aoka izany io asa io satria efa nitsiry ireo voa nafafiko ary mamokatra.” Mpigadra taloha efatra fara fahakeliny, no mamonjy tsy tapaka ireo fivoriana kristiana. Nandatsaka am-po ny fahamarinana ny efatra hafa, ary miomana hatao batisa ny anankiray amin’izy ireny.
Midadasika ny faritany
Ny fitomboana tsy ankijanona amin’ny isan’ireo mpivavaka amin’i Jehovah dia mampiseho miharihary fa mbola manana olona maro hangonina maneran-tany Andriamanitra (jereo Asan’ny apostoly 18:9, 10). Raha ny aminao, azonao atao àry ve ny mandray anjara bebe kokoa amin’ny asa fanaovana mpianatra?
Raha tsy mpitory maharitra ianao, nahoana raha miresaka ny amin’izany amin’ireo izay nahita ny fifaliany tamin’ny asa manontolo andro? Ho tsikaritrao angamba fa azonao atao ny manana anjara amin’ny fahasambaran’izy ireny. Raha mandinika ny toeranao ao amin’ny vavaka ianao, dia mety ho afaka hanitatra ny faritaninao amin’ny fahatongavana ho mpitory maharitra.
[Sary, pejy 26]
Any Amazonia, dia matetika ireo mpitory maharitra no mandeha amin’ny lakanjila na ny lakan-drafitra lehibe.