Fanontanian’ny mpamaky

◼ Moa ve ny sisa amin’ireo kristiana voahosotry ny Tompo mbola eto an-tany anisan’i “Jerosalema any ambony”, dia ny vady na fandaminan’i Jehovah any an-danitra?

Azo atao ny miresaka ny amin’ireo voahosotra mbola eto an-tany ho anisan’ny tapany hita maso amin’ny fandaminan’Andriamanitra, dia ny fianakaviany eo amin’izao rehetra izao voaforon’ny zavaboary manan-tsaina.

Noho izy ireny ‘ateraka indray’, dia zanak’i Jehovah ara-panahy izy ireny (Jaona 3:3, 5; Romana 8:15-17). Rain’izy ireo izy, nefa manana ‘reny’ koa izy ireo. Ny apostoly Paoly tokoa dia niresaka an’i “Jerosalema any ambony (...) renintsika”. Azo antoka fa ny noeritreretiny dia fandaminana iray any an-danitra voaforon’ny fanahy (esprits) mahatoky heverin’i Jehovah ho ‘vadiny’ ara-panoharana (Galatiana 4:26). Rehefa mandray ny valisoany any an-danitra ireo kristiana voahosotra, dia tena miditra tokoa ao amin’io fandaminana any an-danitra io. — Apokalypsy 4:4; 14:1-5.

Ny sisa amin’ny voahosotra ankehitriny eto an-tany dia mbola tsy anisan’i “Jerosalema any ambony” amin’ny heviny ara-bakiteny. Noho ny toeran’izy ireo miavaka amin’ny maha-zanaka ara-panahy manana fahatsinjovana ny fiainana any an-danitra anefa, ary noho izy mampiseho ny ‘vadin’i’ Jehovah any an-danitra, indraindray Jehovah dia mampiditra azy ho fanitarana ao amin’ireo toromarika, faminaniana, fampanantenana sy teny fampaherezana ataony ho an’ny fandaminany na vadiny any an-danitra.

Ho ohatra, dia aoka horaisintsika ireo teny nahakasika ny Isiraely taloha. Tamin’ny alalan’Isaia, Jehovah dia nilazalaza ny amin’ny vehivavy iray nifatotra, tao anaty vovoka ka nila ny hifoha sy hampiely ny fahazavany (Isaia 51:9, 14; 52:1, 2; 60:1). Ireo zanaka ara-panahy mahatokin’i Jehovah izay mahaforona ny ‘vadiny’ any an-danitra dia tsy nahita ireo toe-piainana voalazan’ireo teny ireo. Tena nisy tokoa tao amin’ny firenen’ny Isiraely anefa izany. Rehefa avy nafahana avy tany Babylona ny Isiraelita tamin’ny 537 alohan’ny fanisan-taona iraisana, dia nifoha izy ireo, nitsangana avy tao amin’ny vovoka ary nanomboka nanome taratry ny fahazavan’i Jehovah. Ilay Jerosalema voaorina indray (izay nampiseho ilay firenena) dia azo nampitahaina tamin’ny vehivavy iray izay, rehefa avy nariana, dia noraisina indray sy niteraka zanaka, dia ireo Jiosy tao amin’ilay firenena tafatsangana (Isaia 54:1-8; 60:1-22; 66:7-14). Araka izany àry, ireo teny notononin’Isaia nifandray tamin’ny toeran’ilay “vehivavy” (izay Jehovah no ‘tompony sady vadiny’) dia nahakasika ilay firenena teto an-tany izay nampiseho azy.

Aoka isika izao hampitodika ny saintsika any amin’ilay firenena ara-panahy horaisin’Andriamanitra raha vao hitsahatra tsy hampiasa ny Isiraely ara-nofo izy (sy ny ‘vadiny’ any an-danitra) (Galatiana 6:16). Rehefa ‘tsy niteraka’ nandritra ny taonjato maro ilay “Jerosalema any ambony” dia nanomboka niteraka zanaka ara-panahy. Jesosy no voalohany nateraka toy izany, tamin’ny 29 amin’ny fanisan-taona iraisana, avy eo dia nisy zanaka hafa 144 000, nanomboka tamin’ireo apostoly, ary izany dia hatramin’izao androntsika izao (Galatiana 4:21-31). Nandritra ny vanim-potoana fohy teo am-piandohan’ny taonjato, dia resin’ny fanerena ny sisa tamin’ny Isiraelita ara-panahy ka azo lazaina hoe nentina ho babo. Avy eo, tamin’ny 1919 izy ireo dia nafahana tamin’ny fanandevozana babyloniana mba hahaforona firenena vao teraka tao amin’ny tany ara-panahy iray. Hitantsika àry fa ireo teny ara-paminanian’Isaia nahakasika an’i Jerosalema fahiny dia mahita ny fampiharana azy koa eo amin’ny Isiraely ara-panahy eto an-tany.

Hevero koa ny Apokalypsy 12:1-17. Tamin’ny fahataperan’ny “andron’ny jentilisa”, tamin’ny 1914, ny ‘vadin’Andriamanitra’ tany an-danitra dia niteraka ilay Fanjakana na Fitondram-panjakana oharina amin’ny “zazalahy”. Rehefa naetry Satana dia “tezitra tamin’ilay vehivavy”. Tsy namely nivantana an’io vehivavy na fandaminan’Andriamanitra any an-danitra io anefa izy, satria tsy afaka nanatratra azy intsony. Lasa kosa izy niady tamin’ny “zanany sisa” mampiseho azy eto an-tany.

Araka izany àry, dia mitovy ny nitranga tamin’ny Isiraely ara-panahy sy ny Isiraely teto an-tany taloha. Hita taratra eo amin’ireo zanany eto an-tany ny toeran’i “Jerosalema any ambony”. Araka ny zava-misy, ny didy, ny fananarana, ny fampaherezana sy ny fampanantenana atao ho an’ny vadin’i Jehovah any an-danitra dia mahakasika indrindra ireo izay mampiseho azy eto an-tany ka manantena ho anisan’ny fandaminan’Andriamanitra any an-danitra.

◼ Moa ve ireo anisan’ny “olona betsaka” tonga anisan’ny fandaminan’i Jehovah eo amin’izao rehetra izao?

Amin’izao fotoana izao, atỳ alohan’ny “fahoriana lehibe”, ny Vavolombelon’i Jehovah rehetra dia faly manompo an’Andriamanitra ao anatin’ny firaisan-tsaina (Matio 24:21). Tsy misaratsaraka izy ireo satria hoe misy vitsy amin’izy ireny nohosorana tamin’ny fanahy ka manantena ny ho any an-danitra, kanefa ny ankamaroany manantena ny hiaina mandrakizay eo amin’ny tany voaova ho paradisa. Araka ny nampahafantarin’i Jesosy, ny “ondry” sy ny “ondry hafa” dia tonga “andiany iray” ihany tafaray tsara (Jaona 10:11, 16). Amin’izao andro izao, ny fandaminan’ireo mpanompon’i Jehovah dia voaforon’ireo anisan’ireo antokon’olona ireo izay tsy mitovy ny fanantenany.

Voaoman’i Jehovah ny hahitan’ny ‘vadiny’ fanambinana toy izany. Nilaza izy fa hisy olona avy amin’ny firenena rehetra, tsy ho Isiraelita ara-panahy, ho tafangona maro be (Isaia 60:1-22; 61:5-9). Fa raha ny amin’ny bokin’ny Apokalypsy, izany dia milazalaza ny amin’ny “olona betsaka tsy tambo isaina avy tamin’ny firenena rehetra sy ny fokom-pirenena sy ny olona ary ny samy hafa fiteny nitsangana teo anoloan’ny seza fiandrianana sy teo anatrehan’ny Zanak’ondry”. Izany dia kristiana izay manana fanantenana ny ho eto an-tany, fa tsy ny firenena ara-panahin’ny voahosotra izay mampiseho indrindra ny fandaminan’i Jehovah eo amin’izao rehetra izao ankehitriny. Ireo anisan’ny “olona betsaka” anefa dia mitsangana eo anoloan’ny seza fiandrianan’Andriamanitra sy eo anatrehan’ny Zanak’ondry ary manao akanjo nosasany tamin’ny ran’ny Zanak’ondry. Dieny izao àry izy ireny dia mitana toerana misy tombontsoa. — Apokalypsy 7:9-17.

Sedraina koa ny tsy fivadihan’ireo anisan’ny “olona betsaka”. Noho izy ireny tsy ho nivadika hatrany ankehitriny, mandritra ny Fanjakana arivo taona sy amin’ny fitsapana farany, dia hanambara azy ireny fa marina Jehovah amin’ny maha-olona tanteraka, dia izy ireo sy ny ho tafatsangana amin’ny maty izay ho tonga “ondry hafa” an’i Jesosy koa. Rehefa ‘novotsorana tamin’ny fanandevozan’ny fahalovana’ toy izany izy ireo dia hanana ny “fahafahana izay momba ny voninahitr’ireo zanak’Andriamanitra”. (Romana 8:21.) Amin’izay, toy ny hita tamin’i Adama sy Eva tamin’ny voalohany, izy ireo dia hahaforona ny tapany hita maso amin’ny fandaminan’i Jehovah eo amin’izao rehetra izao. Izy ireo dia ho zanaka tanteraka sy manan-tsainan’i Jehovah sy ny vadiny na fandaminana any an-danitra.