Jesosy, ny fiainany sy ny fanompoany

Nampianatra vehivavy samaritana iray Jesosy

MBA handehanana avy any Jodia mankany Galilia, Jesosy sy ny mpianany dia namakivaky ny distrikan’i Samaria. Ary satria sasatra izy ireo tamin’ny nalehany, dia nijanona niala sasatra teo anilan’ny fantsakana iray, tamin’ny antoandro, akaikin’ny tanàna Sykara. I Jakoba no nandavaka io fantsakana io taonjato maro tany aloha, ary mbola ao mandraka ankehitriny izany tsy lavitra loatra ny tanànan’i Naplouse amin’izao andro izao.

Raha mbola naka aina teo i Jesosy, ireo mpianany kosa dia lasa nankany an-tanàna mba hividy hanina. Rehefa nisy vehivavy samaritana iray tonga hantsaka rano, dia hoy Jesosy taminy: “Omeo Aho hosotroiko”.

Amin’ny ankapobeny, ny Jiosy dia tsy manan-draharaha amin’ny Samaritana noho ny fiheverana tsy voadinika latsa-paka lalina. Izany no antony nametrahan’ilay vehivavy gaga izao fanontaniana izao: “Nahoana Hianao no Jiosy, ka mangataka amiko hosotroina nefa aho vehivavy samaritana?”

Jesosy namaly azy fa raha fantany hoe iza izy dia izy indray no hangataka aminy “rano velona”. Io rano io, hoy ny nanampiny, dia ho tonga “loharano miboiboika ao anatiny ho fiainana mandrakizay”.

“Tompoko, omeo izany rano izany aho”, hoy ny navalin’ilay vehivavy.

Noho izany dia hoy Jesosy: “Andeha ary, antsoy ivadinao”.

“Tsy manam-bady aho”, hoy ny navaliny.

Nanamafy ny teniny Jesosy. Nanambara izy hoe: “Marina ihany izay nolazainao hoe: Tsy manam-bady aho; fa efa nanam-bady indimy hianao, sady tsy vadinao ilay itoeranao ankehitriny.”

“Tompoko, hitako fa mpaminany Hianao”, hoy ny fanatsoahan-kevitr’ilay vehivavy, talanjona. Nampiseho ny fahalianany amin’ny zavatra ara-panahy izy ka nanamarika fa ny Samaritana dia nanompo teo amin’ny tendrombohitra Gerizima, fa ny Jiosy kosa nanompo tany Jerosalema.

Kanefa, tsy ny toerana anompoana akory no zava-dehibe, hoy ny fanantitranteran’i Jesosy. “Andriamanitra dia Fanahy, hoy ny fanazavany, ary izay mivavaka aminy tsy maintsy mivavaka amin’ny fanahy sy ny fahamarinana.”

Gaga dia gaga Ravehivavy. “Fantatro fa avy ny Mesia, (Ilay atao hoe Kristy), hoy izy, ka rehefa tonga Izy, dia hambarany amintsika ny zavatra rehetra”.

“Izaho izay miresaka aminao no Izy”, hoy Jesosy. Alao sary an-tsaina kely ange e! Ity vehivavy Samaritana ity dia mantsaka antoandro, angamba mba tsy hifankahitana amin’ireo vehivavy tao an-tanàna izay mety hanaraby azy noho ny fomba fiainany. Kanefa, indro fa nomen’i Jesosy tombontsoa mahavariana izy. Nambarany taminy mazava izay tsy nambarany an-karihary tamin’olon-kafa na dia iray aza. Inona no vokany? Hamaly an’io fanontaniana io ny laharana manaraka. Jaona 4:3-26.

◆ Nahoana ilay vehivavy samaritana no gaga raha niresaka taminy Jesosy?

◆ Inona no nampianarin’i Jesosy azy momba ny rano velona sy ny toerana tokony hivavahana?

◆ Tamin’ny fomba ahoana no nampahafantaran’i Jesosy ny tenany, ary nahoana izany fanambarana izany no tena nahatalanjona?

[Sary, pejy 9]