Jesosy, ny fiainany sy ny fanompoany

Tao amin’ny synagoga tany Nazareta

AZONTSIKA atao ny maka sary an-tsaina ny fihetsiketsehana nanjaka tany Nazareta fony Jesosy niverina tany aminy. Nandao ny tanàna izy herintaona mahery teo ho eo talohan’izay mba handeha hataon’i Jaona batisa. Hatreo i Jesosy dia fantatra fotsiny ho mpandrafitra. Nahazo laza hanao fahagagana izy izao. Ireo mponina tao Nazareta dia naniry fatratra ny hahita fahatanterahan-javatra nahatalanjona teo amin’izy ireo.

Nitombo ny fahadodonan’izy ireo rehefa nankao amin’ny synagoga, araka ny fanaony, i Jesosy. Nandritra ny fombam-pivavahana, dia nitsangana izy mba hamaky teny, ka nomena azy ny horonambokin’Isaia mpaminany. Hitany ilay andinin-teny misy firesahana ny amin’ny olona iray nohosoran’i Jehovah tamin’ny fanahiny, dia andinin-teny mifanitsy amin’izao andro izao amin’ny Isaia toko faha-61 ao amin’ny Baibolintsika.

Rehefa avy namaky izy fa io olona io dia hitory fanafahana amin’ny babo, fampahiratana ny mason’ny jamba, ary hanambara taona ankasitrahan’i Jehovah, dia naverin’i Jesosy tamin’ny mpikarakara ny horonamboky ka nipetraka izy. Nibanjina azy ny maso rehetra. Azo inoana fa niresaka lavalava ihany tamin’ny vahoaka izy tamin’izay, ary nilaza mazava toy izao: “Androany no efa tanteraka eto anatrehanareo izany soratra izany.”

Gaga ireo mpihaino azy noho ny “tenin’ny fahasoavana” nolazainy ka nifampiresaka hoe: “Tsy Zanak’i Josefa va ity?” Nefa noho ny fahafantarana fa tian’izy ireo ny hahita azy manao fahagagana, dia nanampy teny toy izao i Jesosy: “Hataonareo amiko tokoa izao ohabolana izao hoe: Mpanao fanafody, sitrano ny tenanao: Izay renay fa nataonao tany Kapernaomy dia mba ataovy eto amin’ny taninao koa.” Niharihary fa ireo mpiray tanàna tamin’i Jesosy taloha dia nihevitra fa tokony ho nanomboka nanao fanasitranana tao amin’ny tanànany izy, mba hahatonga azy ireo ho voalohany handray soa amin’izany. Noheveriny àry fa nanala baraka azy ireo i Jesosy.

Nahatsapa ny noeritreretin’izy ireo i Jesosy ka nampahatsiahy azy zava-nitranga ara-tantara nahakasika azy ireo: Betsaka ny vehivavy mpitondratena teo amin’ny Isiraely tamin’ny andron’i Elia, hoy ny nasainy nomarihina, kanefa i Elia tsy nirahina ho any amin’ireny vehivavy rehetra ireny. Raha ny marina, dia nankany amin’ny vehivavy mpitondratena tsy isiraelita iray tany Sidona izy, ary namonjy ny ainy tamin’ny alalan’ny fahagagana. Toy izany koa, betsaka ny boka tamin’ny andron’i Elisa, kanefa Namana Syriana ihany no nodioviny.

Izany fampitahana ara-tantara izany dia nampiseho tsy fankasitrahana ireo tao amin’ny synagoga, satria nampiharihary ny fitiavan-tenan’izy ireo sy ny tsy fahampiam-pinoany. Nisafoaka ireo Jiosy ka nitsangana ary nanosika an’i Jesosy ho any ivelan’ny tanàna. Nanandrana nanjera azy teo an-tsisin’ny tendrombohitra niorenan’ny tanànan’izy ireo izy. Nandositra anefa i Jesosy ary nanalavitra tsy naninon-tsy naninona. Lioka 4:16-30; I Mpanjaka 17:8-16; II Mpanjaka 5:8-14.

◆ Nahoana no nisy fihetsiketsehana tao Nazareta?

◆ Ahoana no nieritreretan’ny Jiosy ny lahateny nataon’i Jesosy, kanefa inona nony avy eo no niteraka fahatezerana lehibe teo amin’izy ireo?

◆ Inona no nandraman’ny vahoaka natao tamin’i Jesosy?