Jesosy, ny fiainany sy ny fanompoany

Tafaverina tany Kapernaomy

NIELY nanerana ilay tany manontolo izao ny lazan’i Jesosy, ary olona be dia be no nanaraka azy tany amin’ireo toerana nitokana nijanonany. Rehefa afaka andro vitsivitsy anefa, dia nankany Kapernaomy indray izy tamin’ny fandalovana tamin’ny ranomasin’i Galilia. Niely haingana tao amin’ilay tanàna ny vaovao ny amin’ny fiverenany, ary olona maro no nankany amin’ny trano nisy azy. Nisy Fariseo sy mpampiana-dalàna tonga avy lavitra toy ny avy any Jerosalema.

Nifanizina aoka izany ny olona teo am-baravarana ka tsy azo natao ny niditra. Tao anatin’izany faritra izany no hitranga ny fisehoan-javatra iray hafa dia hafa tanteraka. Izay nitranga tamin’izay fotoana izay dia zava-dehibe tokoa, satria izany mahatonga antsika hahatsapa fa Jesosy dia manana fahefana hanafoana ny antony mahatonga fahorian’ny olombelona ka hanome fahasalamana indray ho an’izay rehetra nofidiny.

Raha mbola nampianatra ny vahoaka i Jesosy, dia nisy lehilahy efatra nitondra ho ao amin’io trano io, malemy iray nandry teo am-pandriana azo nentina. Nirin’izy ireo ny hanasitranan’i Jesosy ilay sakaizany, kanefa tsy afa-niditra izy ireo noho ny vahoaka. Fahadisoam-panantenana re izany! Tsy niala anefa izy ireo. Niakatra teo an-tafontrano marin-tampona izy ireo, nandavaka tao tamin’ny fanesorana taila ary nampidina teo akaiky kelin’i Jesosy ilay fandriana azo entina nandrian’ilay malemy.

Tezitra ve i Jesosy satria notapahina ny teniny? Tsy izany velively! Nanaitra ny sainy mafy kosa ny finoan’ireo lehilahy ireo. Hoy izy tamin’ilay malemy: “Voavela ny fahotanao.” Tena afaka mamela ny fahotana tokoa ve anefa i Jesosy? Tsy nieritreritra izany ireo mpanora-dalàna sy ireo Fariseo. Nihevitra toy izao tao am-pony izy ireo: “Iza no mahavela heloka afa-tsy Iray ihany, dia Andriamanitra?”

Nahalala ny eritreriny i Jesosy ka nanambara tamin’izy ireo hoe: “Iza moa no moramora kokoa, ny manao amin’ilay mararin’ny paralysisa hoe: Voavela ny helokao, sa ny manao hoe: Mitsangàna, betao ny fandrianao, ka mandehana?” Tsy niandry ny valiny izy fa nitodika tany amin’ilay malemy ary niteny taminy hoe: “Mitsangàna, betao ny fandrianao, ka modia any an-tranonao.” Dia nanao izany avy hatrany ilay lehilahy ka nivoaka nitondra ny fandriany teo anoloan’ny rehetra! Talanjona ny vahoaka ka nihiaka hoe: “Tsy mbola nahita izay toy izao izahay.”

Voamarikao ve fa nampifandraisin’i Jesosy tamin’ny fahotana ny aretina ary ny famelana ny fahotana dia nampiarahina tamin’ny fahitana indray ny fahasalamana? Hazavain’ny Baiboly fa nanota Adama razambentsika rehetra ary nandova ny vokatr’izany fahotana izany, dia ny aretina sy ny fahafatesana, isika rehetra. Eo ambanin’ny fanapahan’ny Fanjakan’Andriamanitra anefa i Jesosy dia hamela ny fahotan’izay rehetra tia sy manompo ny Rainy, aorian’izany, dia hanjavona daholo ny aretina rehetra. Toy inona moa ny fahasambarana ho hitantsika amin’izay! Marka 2:1-12; Lioka 5:17-26; Matio 9:1-8; Romana 5:12, 17-19.

◆ Tao anatin’ny faritry ny inona moa ny fisehoan-javatra hafa dia hafa tanteraka iray?

◆ Ahoana no nahatongavan’ilay malemy hatreo amin’i Jesosy?

◆ Nahoana moa no mpanota isika rehetra, nefa ahoana no nampisehoan’i Jesosy fa afaka manantena ny hahita ny fahotantsika voavela isika ka hahazo indray fahasalamana tonga lafatra?