Mamoha ny lalana izay mitarika ho ao amin’ny Paradisa izy ireo
INDRAY andro nangatsiatsiaka sy nazava tamin’ny volana martsa, dia olona teo amin’ny 4 300 no tafavory tao amin’ny Efitrano fanaovan’ny Vavolombelon’i Jehovah fivoriambe any Jersey City. Avy tany amin’ny faritra rehetra amin’i Etazonia sy avy tany amin’ny tany maro hafa koa izy ireo. Ny nahafahana nanao an’io fivoriana manokana io dia noho ny fisehoan-javatra nitranga, 43 taona lasa izay, rehefa novohana ny sekoly iray ho an’ny misionera teo ambany fitarihan’i Nathan Knorr, izay prezidàn’ny Fikambanana Watch Tower tamin’izay.
Nalamina tamin’ny volana martsa io fivoriana io tamin’ny fanomezana diplaoma ny kilasy faha-80 amin’ny Sekolin’i Gileada. Fa nahoana no nisy olona be dia be toy izany nisahirana mba hanatrika izany? Satria azon’izy ireo antoka fa hisy fandaharana tsara haseho ao.
Ny fihetsiky ny misionera: fanalahidin’ny fahombiazana
Ny prezidàn’ny fandaharana dia Karl Klein, anisan’ny Kolejy foiben’ny Vavolombelon’i Jehovah. Nanolotra ny mpandahateny voalohany izy, izany dia i Lloyd Barry, izay misionera tany Japon ary anisan’ny kolejy foibe izao. Tao amin’ny lahateniny nitondra ny lohateny hoe “Ampio asa ny finoanareo”, dia nanome izao torohevitra izao ho an’ireo misionera i Lloyd Barry: ‘Taorian’ny dimy volana niofanana mafy tao amin’ny Sekolin’i Gileada, dia azo antoka fa lalina kokoa tsy mbola nisy toy izany ny fitiavanareo sy ny finoanareo. Rehefa ho any amin’ireo faritany omena anareo ianareo izao, dia tokony hampianareo asa izany.’ (Jakoba 2:22, 23). Nohazavainy tamin’izy ireo fa, tahaka ny nataon’i Jehovah, izy ireo dia tokony ‘hifoha maraina’ sy handany hery amim-paharisihana mandritra ny andro amin’ny fanompoana masina. — Jeremia 7:25.
Daniel Sydlik, mpikambana hafa iray ao amin’ny Kolejy foibe, dia nanome torohevitra nampahery tao amin’ny foto-dresany hoe “Afaka mamboly fihetsika tsara ianareo”. Amin’ny toe-javatra miseho rehetra, hoy izy, dia mety hanana fihetsika manorina na mandrava ianareo. Nanankina ny fanamarihany tamin’ny Malakia 3:15, 16 izy ka nampiseho fa mora ny mahita hokianina rehefa tonga ao amin’ny tany mbola tsy hita iray ny tena. “Aza malaky manakiana, hoy izy nanohy ny teniny. Manàna fihetsika falifaly izay hotahin’Andriamanitra.”
Ny mpandahateny hafa, anisan’izany Ulysses Glass, mpitantsoratry ny sekoly, dia nanipika ny amin’ny ilàna haneho fiaretana, herim-po sy hahita fahafahampo amin’ny asan’ny tena. Jack Redford, misionera taloha izay anankiray amin’ireo mpampianatra ao amin’ny sekoly izao, dia nanome torohevitra azo ampiharina ny amin’ny fomba hitanana saina mivelatra. Tadidio, hoy izy, fa “ny adala ihany no tsy miova hevitra mihitsy”! Namporisika an’ireo misionera vaovao àry izy mba hihazatra, sahala amin’ny apostoly Paoly izay afaka nanonona tononkira teo an-toerana mihitsy aza (Asan’ny apostoly 17:28). “Mivelara eo amin’izay nambolena anareo. (...) Manàna saina sy fo mivelatra hatrany”, hoy izy namarana ny teniny.
Ny lahateny lehibe indrindra dia notononin’i Frederick Franz, prezidàn’ny Fikambanana Watch Tower, izay 92 taona izao. Araka ny foto-kevitra hoe “Vohay izao ny lalana lehibe mitarika ho amin’ny Paradisa an-tany”, dia nampahatsiahiviny ny fomba nahaterahan’ny Sekolin’i Gileada, “zazakely iray teraka nandritra ny ady, zanaky ny finoana, teo afovoan’ny Ady Lehibe Faharoa. Nampiasa ny Isaia 62:10 ho teny fototra tamin’ny lahateniny izy, ka nampiseho hoe amin’ny fomba ahoana no handraisan’ireo misionera vaovao anjara amin’ny asa fanorenana lehibe ny lalana midadasika sy azo antoka iray izay hahatonga an’ireo manaraka ny fanompoam-pivavahana marina ho afaka handroso hanatona ny Paradisa ho tafaorina indray. Ho famaranana ny fandaharana ny maraina, dia nandray ny diplaomany ireo misionera vaovao 24.
Tao anatin’ny fotoam-pivoriana ny tolakandro, ireo nahazo diplaoma dia namintina tamin’ny fomba nahafinaritra izay nianaran’izy ireo tao amin’ny sekoly ary nomeny ny mpanatrika ny vinavinan’ny zava-tsarotra tsy maintsy hosetrain’izy ireo. Namaranana ny fandaharana ny fampisehoana tantara araka ny Baiboly araka ny fitafiana taloha izay nampiseho tamin’ny fomba velona hoe ahoana no nanehoan-dRahaba, ary ny Gibeonita taty aoriana, finoana nahatonga azy ireo hahazo ny famonjena. — Josoa toko faha-2 ka hatramin’ny faha-6, sy toko faha-9.
Amin’ny fitambarany, miaraka amin’ireo 24 nahazo diplaoma tamin’io kilasy faha-80 amin’ny Sekolin’i Gileada io, dia misionera 6 234 no lasa maneran-tany mba ho andiany tsara indrindra amin’ny tafiky ny mpitory manao ny asa voambara ara-paminaniana ao amin’ny Matio 24:14.