1986 — Taona “ho fitandroana ny fiadanana” ve?
NY Firenena mikambana dia nanambara ny 1986 ho Taonan’ny fiadanana iraisam-pirenena. Moa ve amin’izany mandroso ho amin’ny fiadanana izao tontolo izao? Manazava antsika ny amin’io fanontaniana io ireto fanambarana manaraka ireto, avy any amin’ny faritra samihafa amin’ny gilaoby.
Nanomboka tamin’ny 7 ka hatramin’ny 12 aprily 1986, dia nisy solontenan’ny tany 103 nandray anjara tamin’ny Fiaraha-midinika nataon’ireo solombavambahoaka natao tany Mexico.
Nanome izao fampandrenesana izao tao ny sekretera jeneralin’ny O.N.U., Atoa Javier Pérez de Cuellar: “Amin’izao fanombohan’ny Taonan’ny fiadanana iraisam-pirenena izao, dia aoka tsy hohadinointsika fa ny foto-keviny — ‘Fitandroana ny fiadanana sy ny ho avin’ny olombelona’ — dia fototry ny fiheverana tena lehibe, tsy ho an’ny 1986 ihany, fa ho an’ireo taona ho avy koa. Aoka horaisintsika amim-pahavononana ireo anjara tsara amin’ny 1986.”
Ny prezidàn’ilay Fiaraha-midinika dia nanambara fa nitsidika tany sasany izy “mba hanontany raha ho afaka hiasa ho an’ny fiadanana ireo solombavambahoaka”. Omeny antsika ny fanatsoahan-keviny: “Hitako fa sarotra tokoa izany ary indraindray, tsy misy fanantenana.”
Ny Antoko meksikana koa dia nilaza “ny fahadisoam-panantenany lalina mahita fa na dia ao aza ny fitomboan’ny fiahian’ny vahoaka ny amin’ireo loza entin’ny fifaninanana manao fitaovam-piadiana sy ireo fiezahana ataon’ny Firenena mikambana, dia tsy nisy tena fandrosoana vita tao anatin’izao taona faramparany izao teo amin’ny lafin’ny fampihenana fitaovam-piadiana”.
Ny Antoko “argentin” dia nampahatsiahy “fa na ny fahafatesan’olona enimpolo tapitrisa nateraky ny Ady Lehibe Faharoa, na ny famaranana noklehera izany tao Hiroshima, na ireo ady telopolo amby zato nipoaka hatramin’izay dia tsy ampy nampianatra ny olombelona fa eo an-tokonan’ny fandringanan-tena izy”. Nitana ny sain’io Antoko io ny hoe “fanjakana noklehera dimy no nanangona fiadiana ataomika 50 000, ka izany dia mampiseho zavatra mipoaka nifanekena telo taonina isaky ny mponina eto amin’ny planeta”.
Ireo mpikambana maharitra ao amin’ny Filan-kevi-pilaminan’ny Firenena mikambana dia nandefa solontena ho any amin’ilay Fiaraha-midinika. Ireto ny sasantsasany amin’ireo fanambarana nataon’izy ireo:
Ho an’ny Antoko britanika, “ny zava-kendrena tena lehibe dia tokony ho ny hisakanana ny fifaninanana manao fitaovam-piadiana eny amin’ny habakabaka. Tokony hihevitra ny zavatra tena misy anefa isika (...). Efa iasan’ny tafika ny habakabaka”. Ny Antoko frantsay dia nanipika ny amin’ny hoe “ny tsy fahaizan’ny Firenena mikambana mitana ny fiadanana sy ny filaminana itambarana dia avy amin’ny fandikan’ny fanjakana sasany indrindra ireo fotopoto-pitsipika tena lehibe amin’ny zo iraisam-pirenena sy ara-pitondrantena”. Nasehon’ny Antoko sovietika “ny fanahiany lalina eo anoloan’ny loza aman’antambo noklehera mandrahona ny olombelona izay mety hitarika ho amin’ny fahataperan’ny sivilizasiona eto an-tany”. Nanambara ny solontena amerikana fa “hiezaka izy hanao izay hahatsapana [hahatsapan’izao tontolo izao] ny ilàna fiaraha-miasa iraisam-pirenena mba hiadiana amin’ny fampihorohoroana”.
Any amin’ny tendrony hafa amin’ny tany, ny Taonan’ny fiadanana iraisam-pirenena dia voamariky ny fivoriana natao ny 21 martsa tao amin’ny Trano lehiben’ny vahoaka tany Pékin. Ny praiminisitra sinoa, Tchao Tseu-yang, dia niseho ho nanampo fihatsaran-javatra kokoa rehefa nanambara hoe: “Raha manohy ny fiezahany tsy mety sasatra ny vahoaka eto amin’izao tontolo izao, dia tsy maintsy ho tonga amin’ny fiadanana.”
Ny amin’ny Taonan’ny fiadanana iraisam-pirenena apetraka eo ambany fiarovan’ny O.N.U., dia nilaza ny papa Jean-Paul II fa nirin’ny Saint-Siège ny hitarika “fihetsiketsehana maneran-tany hanao vavaka ho an’ny fandriampahalemana handraisan’ny firenena rehetra sy ny fivavahana rehetra anjara”.
Tsy hita eo amin’izao tontolo izao ny fiadanana. Nahoana? Satria ny tena fiadanana dia tsy azo aorina afa-tsy amin’ny fitiavana; ary izao tontolo izao dia saratsarahin’ny fankahalana sy ny fireharehana noho ny firenen’ny tena. Ny tena fiadanana dia mitaky fanapahana marina sy feno fahendrena; ary ireo mpitondra olombelona, izay tsy tanteraka, dia tsy mahafeno izany fepetra takina izany. Ny tena fiadanana dia tokony hifantoka manodidina ny fanompoam-pivavahana misy firaisan-tsaina atao ho an’ilay hany Andriamanitra marina; ary ireo fivavahana eo amin’izao tontolo izao dia voazarazara tsy misy fanafodiny ho Fiangonana sy antokom-pinoana an’arivony maro, izay tsy misy aminy manome voninahitra an’i Jehovah Mpanjaka Tompo. Ny tena fiadanana dia mitaky ny hanesorana “ny andriamanitr’izao fandehan-javatra izao”, dia Satana Devoly, sy ny fandaharam-panapahany; ary ny Fanjakan’i Jehovah nankinina amin’ny Kristiny ihany no afaka manorotoro an’i Satana sy ny asany. — II Korintiana 4:4, MN.
[Sary, pejy 15]
Ho famantarana ny fiadanana
Volamena iray dôlara aostraliana.
Any Kenya, hajiam-paositra folo shillings.