“Fihaonana nahitan-tsoa betsaka”
NANDRITRA ny fahavaratra 1984, ny tovolahy iray atao hoe Gérard dia niainga ho amin’ny dia tsy voafaritra iray. Haharitra enim-bolana no handaozany an’i Frantsa ary nanodidina tamim-bisikilety an’i Etazonia sy Kanada izy. Talanjona tamin’ireo tendrombohitra manerinerin’ny Rocheuses izy, nahafinaritra azy noho ny filaminany ireo saha iraisam-pirenena, nefa tao Montmagny, any amin’ny provans’i Québec, any Kanada, no niainany ny fotoana niavaka indrindra tamin’ny diany; niova noho izany ny fizotran’ny fiainany.
Ny alahady 16 septambra, raha nandeha tamin’ny bisikiletany tao Montmagny Gérard, dia nanaitra azy ny filaharana fiara lava be teo an-tsisin-dalana. Lavidavitra teo dia nisy olona an-jatony maro niasa nanodidina ny trano lehibe iray teo am-panorenana. “Fa misy inona eto?” hoy ny fanontaniany ny mpiasa iray tamin’ireo niandraikitra ny filaminana. Na dia sahirana be aza ilay lehilahy, dia naka fotoana hanazavana tamin’i Gérard fa ireo mpiasa rehetra ireo dia Vavolombelon’i Jehovah, izay nandany ny faran’ny herinandrony mba hanorenana efitrano iray hanaovany ireo fivoriany ara-pivavahana. Tsy fantatr’i Gérard fa tonga teo amin’ny fiafaran’ny fandaharam-panorenana Efitrano Fanjakana ao anatin’ny roa andro izy; ora vitsy monja sisa tamin’izay no hanaovana asa mafy. Izay rehetra reny sy hitany dia nanaitra ny sainy. Ny harivan’io, dia nanoratra izao tao amin’ny fitadidiany manokana izy: “Ny hariva dia nifanena tamin’ireo Vavolombelon’i Jehovah aho. Nanorina trano iray tao anatin’ny roa andro izy ireo. Arivo mahery ny isany. Fihaonana nahitan-tsoa betsaka izany.”
Fotoana fohy tatỳ aoriana dia niverina tany Frantsa izy. Roa taona taorian’izay, ny 26 jolay 1986, dia nandefa taratasy nitondra ny adiresin’ny Efitrano Fanjakanan’ny Vavolombelon’i Jehovah tao Montmagny izy, ary toy izao ny ambangovangony tamin’izany:
‘Tadidinareo ve ilay mpitaingina bisikilety frantsay iray niresahanareo nandritra ny andro faharoa nanorenana ny Efitrano Fanjakananareo? Tamin’io andro io dia namboly voa iray ilay lehilahy nandamina ny fifamoivoizana. Volana vitsivitsy tatỳ aoriana, tatỳ Frantsa, dia tonga nitsidika ahy ny Vavolombelon’i Jehovah, ary nekeko ny fanolorana nataony tamiko, dia ny hianatra ny Baiboly miaraka amin’izy ireo. Tsy mora foana akory izany, satria avy amin’ny fianakaviana iray tena katolika aho. Nefa nampitomboin’i Jehovah ilay voa. Tapa-bolana lasa izay dia natao batisa tamin’ny fivoriambe iray natao tao Nantes ny tenako. Misaotra an’i Jehovah aho noho ny nampahalalany ahy ny fahamarinana ary mankasitraka ilay rahalahy nampianatra zavatra betsaka ahy tamin’io alahadin’ny 16 septambra 1984 io aho. Fiarahabana amim-pirahalahiana avy amin’ny mpandehandeha iray lasa nanaraka ny fahamarinana.’
Alao sary an-tsaina ange ny hafalian’ireo mpikambana tao amin’ny kongregasion’i Montmagny tafavory tao amin’ny Efitrano Fanjakanany tamin’ny famakiana an’io taratasy io e! Ireo rehetra nandray anjara tamin’ny fanorenana dia afaka nanamarina ireto tenin’i Solomona ireto: “Atsipazo eny ambonin’ny rano ny haninao, fa ho hitanao ihany izy rehefa ela.” (Mpitoriteny 11:1). Eny, ny fanorenana efitrano ao anatin’ny roa andro dia mety hisy vokany mahasambatra, mitatra sy maharitra.