Ny fomba fanaovana fanapahan-kevitra amim-pahendrena
NANAO fanapahan-kevitra tsy tamim-piheverana izay niharihary ho nampidi-doza i Alice. “Nanapa-patorana tamin’i Jehovah sy ny fandaminany aho”, hoy ny fiaikeny. Tafaverina izy tamin’ny farany, nefa nitaky telo ambin’ny folo taona mahery ho azy izany — “taona maro nampahory”, hoy izy.
Tsy tokony hanamaivana ny loza setrainy ny kristiana amin’ny fanaovana fanapahan-kevitra tsy dia mampiseho fahendrena loatra mifandray amin’ny fanompoany an’Andriamanitra. Tsy hoe minia manao fanapahan-kevitra ratsy izy, aorian’ny fandinihana ireo zavatra rehetra tafiditra. Indraindray izy dia hetsehin’ny fanaovan-javatra araka ny sitrapon’ny tenany ihany. Raha vao manakona ny tena zava-manahirana anefa ireo fihetseham-pontsika ary mampihatra fitaomana mihoa-pampana eo amin’ny fahaizantsika ara-tsaina ny fontsika tsy tanteraka, dia manatona ny fahasahiranana sy izao karazam-pahoriana rehetra izao isika.
Marina tokoa fa “ny fo dia mamitaka mihoatra noho ny zavatra rehetra”. (Jeremia 17:9.) Asehon’ny Baiboly amintsika anefa ny fomba azontsika iarovan-tena. “Raha latsaka ao am-ponao ny fahendrena, hoy izy, (...) dia hiaro anao ny fisainana mazava [fahaiza-manavaka, MN ].” (Ohabolana 2:10, 11). Ahoana anefa no azontsika andatsahana ny fahendrena ao am-pontsika?
Mandraisa fianarana avy amin’ny lasa
Ataovy izao fanandramana manaraka izao: Alao sary an’eritreritra ho tany amin’ny andro fahiny ny tenanao, teo amin’ny toeran’ireo mpanompon’Andriamanitra niatrika fitsapana maro azo ampitahaina amin’ny anao. Aoka hatao hoe misy toe-javatra mitana ny sainao eo anivon’ny kongregasiona kristiana misy anao. Aoka amin’izay ianao hiezaka hitady ao amin’ny Baiboly tarehin-javatra mitovy amin’izany.
Ahoana raha ny kongregasiona kristiana tao Korinto tamin’ny taonjato voalohany no resahintsika? Alao sary an-tsaina izao: anisan’ny kongregasiona ao Korinto hatramin’ny roa na tela taona ianao, ary tsaroanao ny fifaliana nanananao rehefa nianatra ny fahamarinana ianao. Tamin’izany fotoana izany i Paoly dia nivahiny tao amin’ilay kongregasiona, izay nitoerany valo ambin’ny folo volana. Ankehitriny anefa, dia toa miharatsy ny zavatra.
Tandindomin-doza tokoa ny firaisan-tsain’ny kongregasiona: miteraka fisarahana ny fironana hanao antoko (I Korintiana 1:10, 11). Ambonin’izany, dia rahonan’ny loza ny toe-tsainy satria leferina ny fahalotoam-pitondrantena momba ny lahy sy ny vavy (I Korintiana 5:1-5). Voaloto ny laza tsarany, satria nampiseho ampahibemaso ny tsy fifanarahany teo anatrehan’ny fitsarana eo amin’izao tontolo izao ny sasantsasany amin’ireo mpikambana ao aminy. — I Korintiana 6:1-8.
Aoka hataontsika foana hoe ianao dia Korintiana iray tamin’ny taonjato voalohany. Velom-panahiana ianao ny amin’ny olona sasany eo anivon’ny kongregasiona eo am-piadian-kevitra hatrany ny amin’ny lafin-javatra maro tena tsy misy antony (jereo I Korintiana 8:1-13). Mampalahelo anao ny fifandirana, ny fialonana, ny lolompo ary ny fikorontanana tsapanao (II Korintiana 12:20). Eny, voakorontana ianao mahita mpikambana miavonavona maro manampy fifandirana tsy mahasoa eo amin’ny kristiana (I Korintiana 4:6-8). Mampahory anao ny mandre fa misy sasany tonga hatramin’ny fiadian-kevitra indray ny amin’ny toerana sy ny fahefan’i Paoly, manao fiampangana tsy marina aminy ary maneso ny tsy fahampiam-pirehetany mandaha-teny (II Korintiana 10:10; 12:16). Matahotra mafy ianao fandrao ireo izay mandroso ny heviny manokana manimba ny finoan’ny mpianatra ireo fampianarana fototra. — I Korintiana 15:12.
Fanapahan-kevitra horaisina
‘Tsy tokony ho hita na oviana na oviana izany, hoy ny fisentoanao. Nahoana ireo loholona no tsy manao na inona na inona? Misy zavatra tsy mandeha mihitsy.’
Handao ny kongregasion’i Korinto ve ianao amin’ny filazana fa ho tena tsaratsara kokoa ho anao ny manompo an’Andriamanitra any ho any? Sa hanapa-kevitra ianao fa ny fanafodiny tsara indrindra dia ny fitsaharana tsy hivory miaraka amin’ireo kristiana namanao? Havelanao hanamatroka ny fifalianao ve ireo zava-manahirana ireo ka hampihena ny finoanao mafy fa handray an-tanana ireny zavatra ireny Jehovah Andriamanitra sy Jesosy Kristy? Andeha hamelona toe-tsaina tia fanakianana ve ianao, fironana hitaraina izay hitarika anao hiady hevitra ny amin’ny antony manosika ireo kristiana namanao? Andeha hampihena ny asa fitorianao ve ianao, amin’ny filazana anakampo fa zava-poana ny hitarihana ireo izay mampiseho fahalianana amin’ny fahamarinana ho amin’ny kongregasiona toy izany?
Raha heverina ankehitriny ny tarehin-javatra, amin’ny fiverenana amin’ny lasa, dia tsara toerana ny tena hitsara izany amin’ny maso mahiratra sy hilaza fa ho nanapa-kevitra hitoetra ho tafakambana amim-pahatokiana tamin’ny kongregasionan’Andriamanitra ny tena na dia teo aza ny tsy fahatanterahany. Raha ao anatin’ny fisehoan-javatra toy izany anefa ny tenanao amin’izao fotoana izao, moa ve ianao hihazona ny saina tsy hihontsina sy ny fo ho tony? Horaisina ve amin’izao fotoana izao ny fanapahan-kevitra izay, araka ny hevitrao, dia ho noraisinao tamin’izany fotoana izany raha velona tamin’izany ianao?
Mandraisa soa amin’ireo torohevitra feno fahendrena
Ireo kristiana tao Korinto nanao fanapahan-kevitra feno fahendrena dia ireo izay nitoetra teo akaikin’ny kongregasiona. Nahatsapa marina izay tsapan’i Petera taona maro talohany izy ireo. Rehefa nandao an’i Jesosy tokoa ny mpianatra sasany dia niteny Petera hoe: “Tompo ô, hankany amin’iza moa izahay? Hianao no manana ny tenin’ny fiainana mandrakizay. Ary izahay mino ka mahalala fa Hianao no Ilay Masin’Andriamanitra.” (Jaona 6:68, 69). Tsy misy isalasalana mihitsy fa amin’ny fijanonana ho tafakambana amin’ny fandaminan’Andriamanitra ihany no ahafahantsika mandray soa amin’ny toroheviny.
Ao amin’ireo kongregasiona vaovao, sahala amin’ny an’i Korinto tamin’ny taonjato voalohany, dia tsy mahalana ny tsy fahatanterahan’olombelona no miteraka zava-manahirana izay mitaky torohevitra mahery. Rehefa nanome torohevitra ny Korintiana anefa i Paoly, dia nitadidy tao an-tsainy fa mbola “malala” ny ankamaroan’izy ireo. (I Korintiana 10:14; II Korintiana 7:1; 12:19.) Tsy nohadinoiny fa Jehovah dia manome ny fankasitrahany ho an’izay tsy mendrika akory sy ny famelany heloka an’ireo izay manaiky ny fitarihany. — Salamo 130:3, 4.
Marina tokoa fa satria olona isan-karazany no voasinton’ny kongregasiona kristiana, dia misy amin’izy ireny miadana kokoa noho ny hafa rehefa hoe hanaiky ny fitarihan’Andriamanitra. Antony maro be no mahatonga izany. Misy fiovana sasany tokoa sarotra atao kokoa noho ny hafa. Ambonin’izany, ny olona tsirairay avy dia miavaka amin’ny namany noho ny toe-tenany ara-tsaina sy ara-batana, ny faritra iainany, ny fiaviany ary ny toerana misy azy. Noho izany, dia fahendrena ny hisorohana ny hanjary ho mpanakiana loatra sy ny hitadidiana fa “ny fitiavana manarona fahotana maro”. (I Petera 4:8.) Rehefa dinihina, raha Jehovah sy ny Zanany aza maniry tsy hijery ny tsy fahatanterahana sy ny tsy fahampiam-pahamatoran’ny kongregasionan’izy ireo, moa ve isika koa tsy tokony hanana toe-tsaina mitovy amin’izany? — I Korintiana 13:4-8; Efesiana 4:1, 2.
Raha anisan’ny kongregasionan’i Korinto fahiny ianao, ireo torohevitr’i Paoly feno fitiavana nefa koa hentitra dia ho nampahatsiaro anao fa Kristy, amin’ny maha-filohan’ny kongregasiona kristiana azy, dia niahy fatratra ny amin’ny fahasambarany (Matio 28:20). Izany dia ho nanamafy ny fitokisanao ny fampanantenana nomen’i Jesosy hiaro ny firaisan-tsain’ireo mpianany, raha mbola manaiky koa ny fanampiana homeny amin’ny alalan’ny “mpanompo mahatoky sy malina” izy ireo. (Matio 24:45-47, MN ); Efesiana 4:11-16.) Eny, ireo tenin’i Paoly dia ho nanampy anao hihazona ny fifalianao sy ny fijoroanao na dia ao anatin’ny fisehoan-javatra misedra aza. Ho nitana ny finoanao mafy ianao fa Andriamanitra dia hanome anao ny hery hiatrehana ny fahasahiranana rehetra izay avelany hisy vetivety.
Tsy milaza akory izany fa ny kristiana dia tokony hijanona fotsiny manohon-tanana rehefa misy toe-javatra ratsy mitoetra ao amin’ny kongregasiona. Tao amin’ilay Korinto fahiny, dia nanao zavatra ny lehilahy matotra, toa an’i Stefanasy, Fortonato, Akaïko ary olona sasany avy tamin’ny ankohonan’i Kloa. Niharihary fa nampahafantatra an’i Paoly ny tarehin-javatra izy ireny (I Korintiana 1:11; 5:1; 16:17). Taorian’izany anefa, dia navelany tamim-pitokisana ho eo an-tanany ny zavatra rehetra. Tsy nampanary azy ny fitokisany ny fahefan’i Jesosy ny zotom-pony ho an’ny fahamarinana, na nanao izay ‘hampahasosotra ny fony amin’i Jehovah’. — Ohabolana 19:3.
Amin’izao androntsika izao, noho ny zotom-po ho an’ny fahamarinana, dia tsy hirintsika akory ny hihevitra izay mety hanaketraka antsika, dia ny hitory ny vaovao tsara. Ho fanehoana tsy fahampiam-piheverana ny hahasambatra ny hafa ny fanaovan-javatra toy izany sady ho tsy fahatanterahana izay irin’i Kristy hataontsika. “Koa amin’izany, ry rahalahy malalako, hoy i Paoly, dia miorena tsara, aza miova, ary mahefà be mandrakariva amin’ny asan’ny Tompo, satria fantatrareo fa tsy foana tsy akory ny fikelezanareo aina ao amin’ny Tompo.” — I Korintiana 15:58.
Fantaro ny hafetsen’i Satana
Mety ho sarotra setraina kokoa noho ny fanenjehana mivantana indraindray ireo fahasahiranana hitantsika ao amin’ny kongregasiona, sahala amin’ireo izay niseho tamin’ny Korintiana. Mampiasa izany tarehin-javatra izany Satana mba hitarihana antsika hanao fanapahan-kevitra ratsy, izay hampanalavitra antsika amin’i Jehovah. ‘Fantatsika, anefa ny hafetseny’. — II Korintiana 2:11.
Nanazava tamin’ireo kristiana tany Korinto i Paoly fa nety ho nahasoa azy ireo ny fandinihana ny tantaran’ireo mpanompon’Andriamanitra fahiny. “Ary izany dia nanjo azy mba ho anatra, hoy izy tamin’ny firesahana ny Isiraelita, sady voasoratra izany ho fananarana antsika izay niharan’ny faran’izao tontolo izao.” (I Korintiana 10:11). Toy izany koa, amin’izao andro izao, dia handresy isika amin’ny fandinihana amim-pitandremana ny tantaram-piainan’ireo kristiana voalohany. Azontsika atao, ohatra, ny mihevitra izay nitranga tao Korinto. Amin’ny fisaintsainana ny fomba nety ho nanaovantsika fanapahan-kevitra tsara tamin’izany fotoana izany, no hisorohantsika ny fanaovana ratsy amin’izany ankehitriny.
Miresaka amintsika ny fotoana voalohany niverenany tao amin’ny Efitrano Fanjakana i Alice, taorian’ny telo ambin’ny folo “taona nampahory” tsy naha-teo azy: “Natahotra aho sao mitomany raha vao miteny. Tonga ato amiko indray aho, eny, ato amiko. Tsy azoko inoana izany.” Araka izany àry, aoka ianao ho tapa-kevitra, na dia eo aza ny fahasahiranana maro mety hitranga, hitana mafy ny fanapahan-kevitra feno fahendrena noraisinao dia ny tsy handao na oviana na oviana ny fandaminan’i Jehovah! Ho maro sady tsy hisy farany ny fitahiana ho azonao amin’ny fifaneraserana amin’ny vahoakan’i Jehovah. — Ohabolana 2:10-15, 20, 21.