Fanontanian’ny mpamaky
◼ Nilaza toy izao tamin’ny Isiraelita i Mosesy: “Antsika sy ny zanatsika mandrakizay kosa ny zavatra ambara.” (Deoteronomia 29:28 [29:29, MN ]. Moa ve anisan’ireny “zavatra ambara” ireny ny fanazavana nalefa teo amin’ny Tenin’Andriamanitra ao anatin’ny andro farany?
Tsia, tsy hety ny hampitovina lenta ny fahatakarana ny hevitr’ireo faminaniana azontsika amin’ny andro farany sy ireo “zavatra ambara” noresahin’i Mosesy.
Araka ny teny manodidina, ny “zavatra ambara” nasian’i Mosesy fitenenana dia nahakasika ny faneken’ny Lalàna (Deoteronomia 29:25). Nasehon’i Mosesy fa ireny “zavatra ambara” ireny dia nitaky andraikitra. Raha tsy mahavita izany andraikitra izany ny vahoaka, dia hosazin’i Jehovah.
Mazava ho azy fa fanambaran’i Jehovah Andriamanitra ny faneken’ny Lalàna. Izany dia tohin’ny fanambarana hafa azon’ireo patriarika, Noa ary — raha miverina any amin’ny fanombohan’ny tantaran’olombelona indrindra — Adama. Nampiasaina Mosesy mba hitana an-tsoratra ireo zavatra nambara hatreo amin’ny androny, dia zavatra notehirizina ho antsika ao amin’ireo boky dimy voalohany ao amin’ny Baiboly. Tatỳ aoriana, araka ny nanazavan’ilay lahatsoratra hoe ‘Antsika ny zavatra ambara’ (Ny Tilikambo Fiambenana, 15 aogositra 1986) azy, ireny “zavatra ambara” ireny dia nanjary nahafaoka ny fahalalana rehetra voarakitra ao amin’ny Baiboly. — II Timoty 3:16.
Ny Baiboly àry dia mirakitra ireo “fanambarana masin’Andriamanitra”, ireo zavatra nambarany (Romana 3:2, MN ). Koa satria niseho ho nivadika ny Jiosy araka ny nofo, dia ireo kristiana voahosotry ny fanahy no tonga mpitandrina ireny “zavatra ambara” ireny, ary ny kongregasiona kristiana no “andry sy fiorenan’ny fahamarinana”. (I Timoty 3:15; I Korintiana 4:1.) Noho izany, ireo anisan’ny kongregasiona ankehitriny dia afaka mandray ara-dalàna ho azy ireo ny tenin’i Mosesy manao hoe: ‘Antsika ny zavatra ambara.’
Tamin’izao androntsika izao, Jehovah dia nandefa fahazavana be dia be teo amin’ireny “zavatra ambara” ireny. Araka ny naminanian’i Daniela azy, ny olon’i Jehovah dia ‘nazoto nandinika’ ny Teny ara-tsindrimandry, ary ‘nanjary nitombo ny fahalalana marina’. (Daniela 12:4.) Ohatra, fantatsika izao ny atao hoe “ondry hafa” (Jaona 10:16) sy ny “olona betsaka” (Apokalypsy 7:9-17), ary hitantsika tanteraka ny fanoharana ny amin’ny ondry sy ny osy (Matio 25:31-46). Tena naharihary tamintsika tokoa ireny zavatra ireny, kanefa tsy tamin’ny heviny nitantarana ao amin’ny Teny ara-tsindrimandrin’i Jehovah ny “zavatra ambara”.
Araka izany àry, dia tsy hety ny hampitovina lenta ny fandrosoana amin’ny fahatakarana ny hevitry ny Soratra Masina toy izany amin’ny fanambarana ara-tsindrimandry mahaforona ny “zavatra ambara” voasoratra ao amin’ny Tenin’Andriamanitra. Aoka holazaintsika kosa fa, noho ny fianarana mafy ny Baiboly, ireo mpanompon’i Jehovah dia nitady, tao amin’ny vavaka, hahafantatra ny tena hevitr’ireny “zavatra ambara” ireny. Tamin’ny alalan’ny fanahiny masina, Jehovah dia nanome izany fahatakaran-javatra izany tamin’ny fotoana voatendriny.
Lazain’ny Baiboly amintsika fa “ny làlan’ny marina dia toy ny fipoak’andro maraina, izay mihamazava mandra-pitataovovonan’ny andro”. (Ohabolana 4:18.) Ny fanazavana mihamahery alefan’i Jehovah eo amin’ireo “zavatra ambara” dia mampiseho fa akaiky izany ‘mitataovovonana’ izany ary eo amin’ny kongregasiona kristiana amin’izao andro izao ny fitahian’Andriamanitra.