Jesosy, ny fiainany sy ny fanompoany

Nikasika ny fitafiany izy

TONGA tany Kapernaomy ny vaovao hoe niverina avy any Dekapolisy i Jesosy, ary vahoaka maro be no tafangona teo amoron-drano mba hitsena azy. Azo antoka fa ren’ny olona ny hoe nampitony ny tafiodrivotra izy ary nanasitrana olona azon’ny demonia. Rehefa nidina avy teo an-tsambo izy izao, dia nanodidina azy ny rehetra, dodona ny hahita izay hitranga.

Tamin’ireo izay may ny hahita an’i Jesosy, dia tao Jairo, anankiray tamin’ireo mpanapaka tao amin’ny synagoga. Niantoraka teo an-tongotr’i Jesosy izy ary niangavy azy imbetsaka: “Maty ankehitriny izao ny zanako-vavy; fa andeha re, mametraha ny tànanao aminy, dia ho velona izy.” Tian’i Jairo indrindra io zanaka io, satria vavy tokana ary vao roa ambin’ny folo taona monja.

Nanaraka avy hatrany an’i Jairo ho any an-tranony i Jesosy, ary nanara-dia azy ny vahoaka. Hitantsika sary an-tsaina ny fihetsiketsehan’ny olona izay nahatsinjo mialoha ny hisian’ny fahagagana indray. Tamin’izy ireo anefa tamin’izay fotoana izay, ny vehivavy iray dia tsy nieritreritra afa-tsy ny hamafin’ny nahazo ny tenany.

Hatramin’ny roa ambin’ny folo taona naharitra, dia voan’ny fandehanan-dra izy. Nitety mpitsabo izy, nandany ny fananany rehetra tamin’ny fitsaboana isan-karazany, nefa tsy nety sitrana; vao mainka niharatsy aza ny toe-pahasalamany.

Araka ny azo antoka fa takatrao, ambonin’ny fahosana mafy naterak’izany, ny aretiny dia nanembantsembana sy nampietry azy. Mandrakariva, dia tsy resahina ampahibemaso ny aretina toy izany. Ambonin’izany, teo ambanin’ny lalàn’i Mosesy, dia naloto ny vehivavy iray nitsi-dra ela, ary izay rehetra nikasika azy sy ny fitafiany voaloto dia tokony hosasana sy haloto mandra-paharivan’ny andro.

Nandre firesahana ny amin’ny fahagagana nataon’i Jesosy ilay vehivavy resahina ka izao izy tamin’ny farany dia tonga teo akaikiny. Noho ny fahalotoany, dia niezaka namakivaky mangingina araka izay azo natao ny vahoaka izy, sady niteny anakampo hoe: “Na dia ny lambany ihany aza no ho voatendriko, dia ho sitrana aho.” Izany no nataony; avy hatrany dia tsaroany ho ritra ny rany nitsika!

“Iza moa no nanendry Ahy?” Tsy maintsy ho nampahatahotra an-dravehivavy izany tenin’i Jesosy izany! Ahoana no nahafahany nahafantatra izany? ‘Tompoko, hoy ny fanoheran’i Petera, ny vahoaka betsaka mifanety ka manizina Anao, ka hoy Hianao va: Iza no nanendry Ahy?’

Nijerijery nitady an’ilay vehivavy tao anatin’ny vahoaka i Jesosy ka nanazava hoe: “Nisy olona nanendry Ahy; fa fantatro fa nisy hery nivoaka avy tamiko.” Tsy sahala amin’ny hafa tokoa io fikasihana io, satria ny fanasitranana avy amin’izany dia nanovo hery avy ao amin’i Jesosy.

Noho ny fahatsapany fa tsy niafina izy, dia nandroso izy ka nianjera teo amin’ny tongotr’i Jesosy, raiki-tahotra sy nangovitra. Teo anoloan’ny vahoaka rehetra, dia niaiky ny fahamarinana ny amin’ny aretiny sy ny amin’ny fomba vao nahasitrana azy izy.

Nampihetsi-po an’i Jesosy ny fiaikeny, ka noho ny fangorahany, dia nanome toky azy tamin’izao teny izao izy: “Anaka, ny finoanao no nahasitrana anao: mandehana soa aman-tsara, ary sitràna amin’ny aretinao.” Tsara tokoa ny mahafantatra fa Andriamanitra dia nifidy mba hanapaka ny tany, olona be hafanam-po toy izany, izay miahy ny olombelona ary manana fahefana hanampy azy ireny! Matio 9:18-22; Marka 5:21-34; Lioka 8:40-48; Levitikosy 15:25-27.

◆ Iza moa i Jairo, ary nahoana izy no tonga nanatona an’i Jesosy?

◆ Azon’ny aretina inona moa ny vehivavy iray, ary nahoana no sarotra taminy aoka izany ny nandeha nitady an’i Jesosy?

◆ Ahoana no nahasitrana ilay vehivavy, ary ahoana no nanomezan’i Jesosy toky azy?