Jesosy, ny fiainany sy ny fanompoany
Mitady mpanapaka mihoatra lavitra ny olombelona izy ireo
REHEFA nahita an’i Jesosy namahana olona an’arivony maro tamin’ny fomba mahagaga ny olona dia zendana. Nihiaka toy izao izy ireo: “Ity tokoa no Ilay mpaminany Izay ho tonga amin’izao tontolo izao.” Ny fanatsoahan-keviny dia tsy vitan’ny hoe tokony ho Jesosy io mpaminany lehibe noho Mosesy io fa tena azo atao mpitondra tsara mihitsy izy io. Dia nikasa haka azy ho mpanjaka àry izy ireo.
Nefa fantatr’i Jesosy ny zavatra nahavonona azy ireo. Koa dia nandositra haingana izy mba hiarovana ny fakàna an-keriny. Narovany ny vahoaka, notereny ireo mpianatra hiondrana an-tsambokely mba ho any Kapernaomy, izy kosa lasa nitokana tany an-tendrombohitra mba hivavaka. Alina ny andro, ary teo Jesosy, izy irery.
Rehefa nadiva haraina dia tazan’i Jesosy avy eny amin’ny toerana nisy azy fa nasamboaravoaran’ny rivo-mahery ny ranomasina. Koa satria efa akaiky ny Paska tamin’izay dia efa nadiva ho fenomanana ny volana; tao anatin’ny tara-pahazavana nalefany no nahatazanan’i Jesosy ny sambo sy ireo mpianany izay niady mafy mba handroso ao anatin’ny ranomasina nisafotofoto. Nivoy tamin’ny heriny rehetra izy ireo.
Nahita izany i Jesosy dia nidina avy eny an-tendrombohitra ary nandeha nankeny an-tsambokely teny afovoan’ny onja. Nahavita dimy na enina kilaometatra izy ary, na dia efa nifanandrify tamin’ireo mpianany aza izy dia mbola nanohy namindra ihany toy ny hoe hihoatra azy ireo. Raha nahita azy izy ireo dia nihiaka hoe: “Matoatoa io!”
Nanome toky azy ireo i Jesosy tamin’izao teny izao: “Izaho ihany, aza matahotra.”
Nefa Petera nilaza taminy hoe: “Tompoko, raha Hianao ihany, dia asaovy manatona Anao eny ambony rano aho.”
“Manatòna”, hoy ny navalin’i Jesosy.
Ary dia nidina ny sambokely Petera, nandeha teny ambony rano ho eny amin’i Jesosy. Tamin’izay indrindra, rehefa nahita ny tafio-drivotra izy, dia natahotra ary nanomboka nilentika, dia niantso izy hoe: “Tompo ô, vonjeo aho!”
Avy hatrany dia natsotran’i Jesosy ny tanany, noraisiny izy ary nilazany hoe: “Ry kely finoana, nahoana no niahanahana hianao?”
Rehefa tafakatra indray tao an-tsambo Petera sy Jesosy dia nitony ny rivotra ary dia gaga ny mpianatra. Tokony ho toy izany ve izy ireo? Raha takany ny dikan’ireo “mofo” ary fantany ny hevitry ny fahagagana lehibe nataon’i Jesosy, ora vitsivitsy talohan’izay, tamin’ny famokisana olona an’arivony maro tamin’ny mofo dimy sy hazandrano roa monja, dia tsy hahagaga azy ireo loatra toy izao raha mandeha eny ambony rano izy ary mahay mampitony ny rivotra. Kanefa izao ireo mpianatra dia nanome voninahitra an’i Jesosy tamin’ny filazana hoe: “Zanak’Andriamanitra tokoa Hianao.”
Fotoana fohy taorian’izany, dia tonga tao Genesareta, tany lemaka iray tsara tarehy sy lonaka ao akaikin’i Kapernaomy izy ireo ary dia niantsona teo. Nefa rehefa tafiditra teo amin’ny tany maina izy ireo, tonga dia nahafantatra an’i Jesosy ny olona, dia lasa izy ireo nitety ny faritra manodidina mba hitady ireo izay marary. Rehefa nentina tamin’ny fandriany azo bataina izy ireo ary mikasika fotsiny ny moron-tongotr’akanjony ambony, dia sitrana tanteraka.
Ny ampitso, dia olona an’arivony maro izay novokisan’i Jesosy tamin’ny fomba mahagaga no nahatsapa fa lasa izy. Noho izany, rehefa misy sambokely tonga avy any Tiberiasy, dia niondrana izy ireo ary lasa nankany Kapernaomy, mba hitady an’i Jesosy. Rehefa nahita azy izy ireo, dia nanontany azy hoe: “Raby ô, oviana no tonga teto Hianao?” Ny valintenin’i Jesosy dia tena hampiharihary zavatra. Jaona 6:14-25; Matio 14:22-36; Marka 6:45-56.
◆ Rehefa avy namahana olona an’arivony maro tamin’ny fomba mahagaga i Jesosy, notadiavin’ny olona hatao inona izy?
◆ Inona no tazan’i Jesosy avy eny an-tendrombohitra nitokanany, ka inona no nataony?
◆ Nahoana moa ireo mpianatra no tsy tokony ho gaga toy izany noho izay nataon’i Jesosy?
◆ Inona no nitranga rehefa tonga teo amoron-drano izy ireo?
[Sary, pejy 9]